Крезьгурчиосын узыр музъем

Удмурт Дунне
By Удмурт Дунне 22 ноября, 2011 14:30

Та нуналъёсы Ижевск но Воткинск городъёсын Волга но Урал улосъёсысь крезьгурчиослэн 23-тӥ фестивальзы ортчиз. Отчы пыриськизы Башкортостанысь, Марий Элысь, Мордовиысь, Комиысь, Татарстанысь, Удмуртиысь но Чувашиысь композиторъёс. Куноосын котырес ӝӧк ортчытӥз культурая, печатья но иворъёсъя министр Дмитрий Иванов.

— Та ужрад нырысьсэ усьтӥськиз Казаньын 1982-тӥ арын, — вера Россиысь Композиторъёслэн огазеяськонзылэн тӧроез Владислав Казенин. — Волга но Урал котырысь улосъёс узыр крезьгурчиосын. Усто быгатонлыкъёсыныз быдэс дуннелы тодмо луиз пианистка Ася Корепанова. Со алигес Америкае вуылӥз, отын кык симфонической концерт возьматӥз. Таӵеез асьмелэн ӧй вал на. Фестиваль 23 ар куспын одӥг арзэ вис кариз — 90-тӥ аръёсы секыт вал композиторъёсты люканы. Ньылетӥ ползэ ини шумпотыса вуимы Удмурт шаере. Кылем арын та ужрад Йошкар-Олаын вал. Вуоно арын композиторъёс люкаськозы Мордовие.

Фестиваль куинь нунал радъяськиз. Крезьгурчиос нуналаз кык концерт сётылӥзы. Нуназе — Ижысь крезьгурчиослэн колледжазы, ӝытсэ — Операя но балетъя кун театрын. Нырысетӥ нуналаз Г. Корепановлэсь «Наталь» операзэ возьматӥзы. Удмурт опера кылдэм дырысен туэ 50 ар тырме. Озьы ик возьматэмын вал камерной но симфонической концертъёс. Марий Элысь егит крезьгурчи Григорий Архипов вера:

— Кылем арын консерваториез йылпумъяй. Нырысь баянэн шудылӥ, собере рок-группаын асме эскери. Берло аръёсы сочинениос гожъяны ӧдъяй. Удмуртиын ортчись фестивальын мон возьматӥ инструментальной но симфонической ужъёсме. Учкисьёс туж шуныт пумитазы.

ӟеч кылъёс вера Башкортостанысь Композиторъёслэн союззылэн тӧроез Айрат Гайсин но:

— Мон нырысьсэ вуи Удмурт шаере. Озьы ик мыным нырысьсэ та фестивальын шуд усиз симфония поэмаысьтым кыкетӥ люкетсэ возьматыны. Фестиваль туж валаса дасямын вал. Режиссёръёс умойёсыз пӧлысь умойёссэ ужъёсты бырйиллям. Удмурт шаерысь капчи мылкыдын кошкисько.

Тросэзлэн крезьгурчиослэн нылпиоссы но крезьгур гожъяло. Кылсярысь, Владимир Рузманов, Александра Корепанова (Павлова) но мукет.

Жаляса верано, таяз радэ фестивальысь адӟыны ӧз кылды Ася Корепановаез.

Любовь Тихонова.

Удмурт Дунне
By Удмурт Дунне 22 ноября, 2011 14:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<