Кезьытъёс кышкыт ӧвӧл

Удмурт Дунне
By Удмурт Дунне 21 ноября, 2011 15:54

Кезьытъёс кышкыт ӧвӧл

Ижысь 60-тӥ школае вуиз 12 выль компьютер.

Республикаямы бадӟым саклык висъяське дышетскон учреждениосты тупатъянлы. Озьы туэысен Ижысь школаосын выльдыны кутскемын укноосты. Шудоос пӧлын — Ленин ёросысь 60 номероез. Та нуналъёсы отчы вуылӥз Президент Александр Волков, озьы ик Правительстволэн Тӧроезлэн воштӥсез Людмила Чунаева, дышетонъя но наукая министр Андрей Кузнецов. Лэсьтӥськисьёслэсь ужзэс эскерем сяна, соос пыриськизы выль компьютер классэз усьтонэ.

Школалы укно вошъянлы 5 миллион манет висъямын вал. Президент уж борды кутскемзылэсь азьло школалэсь администрацизэ алӥз: шырытгес кариськиды ке, шыръяны быгатэм коньдонды асьтэлы ик кылёз, сое чакламдыя кутыны быгатоды. Озьы та дышетскон учреждениын выльдӥськизы на ӧсъёс — 1 но ӝыны миллион манет тыр.

— Школамы кылем даурысь 60-тӥ аръёсы пуктэмын ни, укноос но со дырысен выльдылэмын ӧй вал,  — вераз школалэн директорез Александра Лыкова. — Соин ик классъёсын толалтэзэ котьку ик кезьыт возиськылӥз.

Школалэн директореныз ӵош шумпотэмзэ ватыны уг быгаты эшшо одӥг мурт — информатикая дышетӥсь Полина Праздникова. Шуныт классъёсын ужам сяна, табере со нылпиосты дышетоз ӵыжак-выль компьютеръёс сьӧрын.

— Вазен 41 компьютермы вал ини, — пусйиз Полина Алексеевна. — Но пӧлысьтызы тросэз дыг-мог ужало. Табере туала куронъёслы тупась 12 компьютер вуиз на. Соослэн «йырвизьзы» но золгес, ӝоглыксы но бадӟымгес… Информатикаез сяна, та компьютеръёс сьӧрын ортчыломы биология, физика, химия но мукет урокъёсты. Али школаямы котькуд 12 дышетскисьлы 1 компьютер лыдъяське ни.

Информатикая уроке лыктӥллям 10-тӥ «а» классысь нылъёс но пиос. Президент соослэсь юалляське:

— Тодӥськоды-а, кӧня школа асьме республикаын?

— Трос! — соосыз туж ӝог шедьто валэктон.

— Зэмен но — трос: ог 650 пала. Пӧлысьтызы 100-эз — Ижын. Та нуналъёсы котькуд куинетӥез дышетскон заведение тӥ сямен ик кузьым басьтӥз. 27 миллион манет тыр 1 сюрс 623 компьютер вуиз. Ог дасо ар талэсь азьло гинэ, пумиськонъёсы потакум, дышетӥсьёслэн валтӥсь куронзы вал: туж кулэ компьютер класс. Кема ик дыр ӧз ортчы, табере соос вань школаосын сыло ини, кыскемын Интернет но. Туннэ республикаысьтымы котькуд 16 пиналлы 1 компьютер усе. Вуозы сыӵе вакытъёс, котькуд пиналлэн аслаз ноутбукез кылдоз. Чакламын ни: республикамылэн бюджетысьтыз 2012-тӥ-2013-тӥ аръёсы 27 миллион, нош 2014-тӥ -2015-тӥ аръёсы 30-32 миллион манет висъяськоз компьютеръёс басьтонлы.

Таӵе кылъёс бере шып возиськыны дышетӥсьёс ӧз чидалэ:

— Витёмы сыӵе вакытъёсты!

— Возьмано, но соин ӵош ужано на! — индылӥз Александр Волков. — Пӧлысьтымы котькудмы сюлмаськыны-тыршыны кулэ, улонмы ӟечгес мед луоз шуыса.

Дышетонъя но наукая министр Андрей Кузнецов тодэ: 60 номеро школаысь дышетӥсьёс вань тодон-валанзэс, быгатонлыксэс, сюлэмзэс поно зэмос кивоштӥсьёсты будэтон понна. Угось ачиз но со куке-соку татын визь-нод басьтӥз. Куд-ог дышетӥсьёсыз али но тыршо на. Но туж потэ, пе: егит специалистъёс но школае тросгес мед лыктозы.

Элина Кумачёва. 

Туспуктӥз Владимир БЕЛОМОРСКИХ.

Удмурт Дунне
By Удмурт Дунне 21 ноября, 2011 15:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<