Катанчи усьтӥське!

Удмурт Дунне
By Удмурт Дунне 3 ноября, 2011 08:38

Катанчи усьтӥське!

Сяме пыӵаз ни: элькунмылэн вордӥськем нуналэз азьын шаерамы одно ик шумпотымон корка пырон ортче. Удмурт калыклэн кунлык  басьтэмез дырысен 91 ар тырмонэз асьмеос пусъём Драмая ӟуч кун театрлы выль юрт усьтонэн.

— Вералэ ай, ку татын берпуметӥзэ ортчиз культураен герӟаськем ужрад? — дась залэз учкыса, Александр Волков вазиськиз котыраз люкаськем муртъёслы.

Театрлэн кивалтӥсез но, лэсьтӥськисьёс но, кун чиновникъёс но ма вераны ёрмизы. Валамон со. Та юртын кемалась ӧз чузъяське ни кырӟан гуръёс, далай ӧз кылӥське тыпыртэмъёс. Уго берло дас ар ӵоже «Ижмаш» культура дворец Ижын уноез улӥсьёс понна вуз карон интылы пӧрмиз. Пыдкук, дӥськут, сиён-юон, эмъяськон тӥрлык — мар гинэ ӧз вузалэ татын шӧртчи адямиос.

Элькун кивалтӥсьёс вазенгес ик учкылӥзы ни туж адскымон но дано интыын сылӥсь юрт шоры. Но отын вордскем «базарез» ворсаны кужымзы ӧз тырмылы. Уго дворец «Ижмаш» завод киын вал. Нош соиз — аслыз ачиз кузё.

Трос кужымзэ сётоно луиз Александр Волков культура юртэз государстволы берыктон понна. Куинь ар талэсь азьло Удмурт театрлэн корка пыроназ лыктэм калыкез со оскытӥз, матысь аръёсы Ижысь вань театръёс ужан юртъёссэс выльдозы шуыса. Валля арын шумпоттӥзы Мунё театрын ужасьёсты но соослэсь учкисьёссэс. Нош табере данъяськыны черод вуиз Драмая ӟуч театрлы. Бӧрысьгес элькун выльдоз Операя но балетъя театрез.

«Ижмаш» культура юрт шоркарын но быдэс элькунын улӥсьёс понна куке но туж яратымон инты вал. Ма, отын кӧня удмурт артистъёс кыдазы, кӧня выль коллективъёс ӝужазы. Отчы мыло-кыдо ветлӥзы быдэс страналы тодмо артистъёс но. Кылсярысь, сӥё-дано ӟуч кырӟась Александр Вертинский туж паймиз татысь акустикалы. Бен, юртысь валтӥсь залын куаралэн аспӧртэмлыко чузъяськемез уноезлы тодмо вал. Соин ик коркаез кык ар талэсь азьло выльдыны басьтӥськем проектировщикъёс кема малпаськизы со тодметэз утён сярысь.

— Юрт быдэсак сазнамын, пулэсь перекрытиос  кортэн но бетонэн воштэмын, чылкак выль гумыос но езъёс инъямын, сцена паськытатэмын, — вера культурая, печатья но иворъёсъя министр Дмитрий Иванов. — Со дыре ик ми утьыны тыршим дворецлэсь вылтуссэ но пуш чеберзэ. Туж оскисько, акустика ӧз уродмы шуыса. Лыктэ но учке — одно ик кельшоз.

Валлян театрысь артистъёс выль интыын нырысетӥ репетиция ортчытӥзы ни. Соос туэ учкисез ньыль премьераен шумпоттыны малпало. Нырысетӥез спектакль дасямын Александр Островскийлэн ужезъя («Вещий сон»), кыкетӥез — Николай Гоголья («Женитьба»), куинетӥез — Бернард Шоулэн творчествоезлы сӥземын, тазэ пуктӥз театрлэн выль валтӥсь режиссёрез Виктор Прокопов. Со сяна, Выль арлы артистъёс выль сцена вылын нылпи выжыкылэз улӟытыны чаклало.

Нырысетӥ возьматонъёсы, кызьы ивортӥзы театрын ужасьёс, вань билетъёс вузамын ни. Мар шуод: талы шум гинэ потоно.

— Государство 650 миллион манет коньдон шедьтӥз тӥледлы таӵе чебер юрт кузьман понна, — шуиз культура удысын ужасьёслы Удмуртилэн Президентэз Александр Волков, театрез адӟыса. — Табере тӥляд сюлмаськонды — залэз котьку тырмытон, учкисез выль, туала куронъёслы тупась ужъёсын шумпоттон. Оскисько, озьы ик луоз шуыса.

Элькун кивалтӥсь пусйиз на, выль интыын Драмая ӟуч театр гинэ уз ужа. Матысь аръёсы татчы интыяськоз Егит учкисьлэн театрез — ТЮЗ (Театр юного зрителя).

Выль юртэз котыр ласянь чакламез бере Александр Волков вазиськиз Лэсьтӥськонъя 8 номеро управленилэн кивалтӥсезлы Алексей Прасоловлы:

— Тӥ зол ужады. Пусйымон. Номыр уродзэ вераме уг поты, но тани та люстра сюлэмъям ӧвӧл. Ойдо сое воштом, выльзэ, бадӟымзэгес, басьтом.

Прасолов мыньпотӥз. Тросэз та суредэз адӟисьёс валазы: озьы ик луоз. Волков уго котькуд малпанзэ пумозяз вуттэ. Таӵе сямыз тодмо ни.

Сергей Захаров.

Туспуктӥз Андрей Поздеев.

Удмурт Дунне
By Удмурт Дунне 3 ноября, 2011 08:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<