Егит дышетӥсез пумиталозы 6 сюрс 500 манетэн

Удмурт Дунне
By Удмурт Дунне 3 ноября, 2011 08:49

Школае лыктӥсь егит дышетӥсь уз узырмы. Толэзьлы быдэ со басьтыны быгатоз 6 сюрс 500 пала манет уждун. Нош апреле гинэ та лыдпус возиськиз 5 сюрс манет котырын.

Туэ вузъёсты йылпумъям 150 егит мурт школае вуиз. Валамон, соослэн категоризы но, стажзы но ӧвӧл, соин бадӟым уждун но сӥзьыны уг луы.

Егит специалистъёсты нокытын но бадӟым коньдонэн уг гочато, вераз дышетонъя но наукая министр Андрей Кузнецов. Ӟеч уждун басьтон понна адями ассэ возьматыны кулэ. Оло, со Инмарен сётэм ӟеч педагог луэ, ужаны мылкыдыз ӧръяське. Соку быгатоз ни 14 сюрс манет уждун понна но нюръяськыны.

Муниципал кылдытэтъёс быгато асьсэ ласянь юрттыны егит педагогъёслы. Куд-ог районъёсын толэзьлы быдэ 2 сюрс манет сёто. Мукетаз — араз оглом 10 сюрс манет.

Кивалтӥсьёс шуо, эн вунэтэ дышетӥсьлы чаклам льготаосты но. Гуртъёсын оклад вӧзы 25 процент ватсэт сётӥське, тыллы но газлы ӝыны дун тыроно.

Елена Скворцова.

Удмурт Дунне
By Удмурт Дунне 3 ноября, 2011 08:49