Гуртам ӵемгес бертылысал…

Удмурт Дунне
By Удмурт Дунне 8 ноября, 2011 11:11

Ижысь медициная академиын вунонтэм пумиськон ортчиз. Cтудентъёс лулысь-сюлмысь кенешизы егитъёсын ужанъя министрен Владимир Соловьёвен, солэн воштӥсьёсыныз, озьы ик Егитъёслэн парламентэнызы кивалтӥсен Андрей Макаровен.

Кызьы егитъёслэсь ваньмон дырзэс пайдаё радъяно, кыӵе ужрадъёс соослы уг тырмо, кытын ужаны быгато, будоз-а стипендизы? Ӵапак таӵе лэчыт юанъёслы валэктон утчазы люкаськемъёс. Нырысь ик ӝутэмын вал ужпум: кызьы кылдытоно студентъёсыз герӟась огазеяськон? Угось пӧртэм интыосын дышетскисьёс уг ик тодо, маин выро соослэн мукет дышетсконниосысь огъёзъёссы, кыӵе ужрадъёс отын ортчо. Огъясез вань — «Студенческая весна» но «Огъя улонниослэн фестивальзы» ужрадъёс. Но со туж ӧжыт, пусйиз В. Соловьёв. Азьло «Gaudeamus» газет потылӥз. Отысь тодыны луэ вал, кытын мар ортче. Али со уг печатласькы ни. Соин ӵош ивор вӧлмытӥсь ёзъёс но егитъёс сярысь ичигес гожъяны ӧдъязы. Та ужпумез мон одно ик санэ басьто, оскытӥз министр.

Берло вакытэ паськыт вӧлмизы уй клубъёсыз пытсан сярысь веранъёс. Мылкыдъёс, валамон, пӧртэм. Та пумысен Егитъёслэн парламентэнызы кивалтӥсь Андрей Макаров тазьы вераз:

— Ачим но куддыр клубъёсы потасько. Отын егитъёс ог-огенызы пумисько, шулдыръясько. Сыӵе клубъёсын ик выль кырӟасьёс, группаос кылдо. Егитъёслы быгатонлыкъёссэс возьматыны мукет площадкаос асьмеос ӧм кылдытэ на. Мон малпамъя, уй клубъёсын нюръяськем интые, кудӟытӥсь юонъёсты вузанэз сюбегатоно.

Валамон, студентъёсты туж сюлмаськытэ стипендилэн быдӟалаез. Медициная академиысь одӥгез дышетскись тунсыкъяськиз: 2000-тӥ аръёсы но солэсь вазьгес студентъёс доразы дунтэк бертылӥзы яке сюрес дунлэсь пичи люкетсэ гинэ тырылӥзы. Али дунтэмен поездын гинэ ворттылыны луэ. Автобусъёсын билет дунэз нокин уг кулэсты.

Жаляса верано, студентъёслы кыӵе ке капчиятонъёс-льготаос сётон шаермылэсь бюджетсэ зол бушатэ. Соин ик матысь дыре студентъёслы тросгес льготаос сётон чакламын ӧвӧл, валэктӥзы Егитъёсын ужанъя министерствоысь специалистъёс. Андрей Макаров оскытӥз: та ужпумез со депутатъёс азьын одно ик ӝутоз.

Пусйыны кулэ, таӵе пумиськонъёс ӟеч сяме пыӵало ини. Алигес та выллем ужрад ортчиз Ижысь гурт хозяйствоя академиын. Студентъёс кивалтӥсьёслы сюлэмшугъяськытӥсь юанъёссэс сётыны быгатӥзы.

Елена Рябина,

Удмурт кун университетын дышетскись.

Удмурт Дунне
By Удмурт Дунне 8 ноября, 2011 11:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<