Герд лыдӟонъёс ваньмызлы валамон

Удмурт Дунне
By Удмурт Дунне 1 ноября, 2011 08:53

Герд лыдӟонъёс  ваньмызлы валамон

Герд лыдӟонъёсы мыло-кыдо пырисько егитъёс но.

Герд лыдӟонъёс ваньмызлы валамон

 Калык огазеяськон кужмо луыны но туала улонэн ӵош вамышъяны малпа ке, нырысь ик котькуд нуналзэ сӥзьыны кулэ азинсконлы. Огазеяськон ас азяз ужпум пуктэ — мае быдэстоно, кызьы та ужез радъяно. Сотэк ӟеч малпан улонэ уз пыӵа.

Ортчо аръёс, мытэм уж быдэсъяське, выль амалъёсын тырме, паськыта. Куддыръя быдэстэм  проект сыӵе усто пӧрме — соку лыдъяськод, со озьы ик кулэ, дыр, шуыса. «Удмурт кенешлэн» кичӧлтэм уноез ужъёсыз ӵапак сыӵе мылкыдын пыӵало калык пӧлы.

К. Гердлэн 90 ар тырмонэныз валче удмурт тодосчиослэн нырысетӥез конференцизы люкаськиз 1988-тӥ арын. Та ужпумъя вераськон-кенешон соку бергаз учёнойёс пӧлын гинэ. Конференциез радъянын бадӟым юрттэт сётӥзы данъяськымон удмурт воргоронъёсмы Кузьма Куликов, Фома Ермаков, Василий Ванюшев. Озьы ке но Герд сярысь огшоры удмурт калык туж ӧжыт тодӥз. Кенешонъёс но арысь аре паськыт ӧз луылэ.

— «Удмурт кенеш» пыд йылаз рос-прос султэм бере конференциосты радъянлы саклык но будӥз, — шуэ педагогикая наукаосъя кандидат, УдГУ-ысь Дышетонэз азинтонъя институтысь наукая ужась Валентина Ившина. — Нош Кузебай Гердлэн 100 ар тырмонэзлы сӥзьыса, 1998-тӥ арын, Правительствоын юнматэмын вал нимысьтыз программа. Со аре ик ортчиз бадӟым конференция. Та бордын соку ӵош ужазы  УдНИИ но «Удмурт кенеш».

Пумен пыӵаны ӧдъяз мукетыз малпан. Герд сярысь вераськонъёсты шарагес кароно, учёнойёс сяна, докладъёсын потыны мед быгатозы мукет адямиос но. Асьме учёнойёс Гердэз пӧртэм ласянь эскерыны быгато: кин ке кылтӥрлыксэ, кин ке дышетон ужпумъёсты ӝутэмзэ. Бӧрысь темаос но паськытазы, калыклы тунсыко но валамон луизы.

Дас витё ар талэсь азьло макем паймымон вераськылӥзы Гердлэн ӵыжы-выжыосыз: Роза Кувшинова, Юрий Чайников. Йырку пежырскымон кӧшкемыт учыръёсты шараялляз Кузьма Куликов. Трос утчаськиз но паймытъяз историк Николай Кузнецов. Но, жаляса верано, со ӟырдыт вераськонъёсты туннэ мукетъёслы мадьыны ум быгатӥське, со вакытэ тодэ но ӧз лыкты, материалъёсты люканы луэ шуыса.

Табере конференцие пыриськисьёс азе юн куронъёс пуктэмын: вераськисьёс рос-прос дасяськемын медло, бӧрысь соослэсь ужъёссэс нимаз сборникъёсын поттоно. Уката пусйымонэз — таӵе бичетъёс дасямын удмурт кылын. Та дырозь удмурт литературной кылын сыӵе йӧн-йӧн наукая ужъёс кылдытъямын ӧй на вал. Соин анай кылэз азинтонын та туж пусйымон но бадӟым вормон.

Удмурт литературалы сӥзем статьяез ӟуч кылын ог кык час куспын гожтыны быгатысал, нош удмурт источникъёсты утчаса, кыл бырйыса, та ужлы дыр но, мылкыд но кулэ вылэм, шуиз профессор Анна Измайлова-Зуева но.

Конференцилэн вань арысь аре радъяськон интыез — Кузебай Герд нимо гимназия. Лыдӟонъёс табере ортчо арлы быдэ. Вошъяське соослэн темазы. Мӧйы, нимо-дано адямиослы сяна, Герд тунсыко егит учёнойёслы но. Яркыт докладъёсын конференцие потазы Людмила Бусыгина, Алевтина Камитова, Татьяна Волкова, Татьяна Иванова, Виктор Шибанов.

Балатон мӧзме удмуртъёслэсь

Удмурт усточиос - Балатон ты дурын.

Котькуд выжы калыклэн валтӥсь малпанэз — нылпиосмылы анай кылэз гажан мылкыд пыӵатон. Тазэ ужпумез «Удмурт кенеш» быдэсъя пӧртэм сямен. Но уката пусйымон огез — удмурт нылпиос арлы быдэ вуыло Венгрие. 2004-тӥ арысен пиналъёсмы шутэтско Балатон ты дурысь гужем лагерьын. Венгриысь «Нациослэн юртсы» татчы люка пӧртэм выжыысь нылпиосты. Пӧлазы шедё фин-угоръёс но. Нялтас вераса, удмуртъёсын ӵош Балатон ты дуре вуылӥзы поръёс но комиос. Но — одӥг пол гинэ. Нош удмуртъёс та ӟеч сямез арысь аре выжыятӥзы.

— Валентин Тубылов сюлмаськемен, нырысьсэ потӥмы Венгрие, — вера «Удмурт кенешлэн» секретарез Елена Александрова. — Йырмес соку зол тӥямы: кинэ Балатон дуре нуоно. Бырйимы Ижысь «Чебеляй»  ансамблез но Пичи Пурга ёросысь Эдэйгуртысь «Покчи арганчиосты». Фестивальын нылпиосмы сыӵе паймытӥзы учкисьёсты — вуоно араз но Удмуртие ӧтён вуиз. Венгеръёслэн куронзы одӥг гинэ вал — арганчиостэс, пе, вайыны тыршелэ.

Аръёс ӵоже кылдӥз рос-прос ужась команда. Елена Александрова та проектлэн координаторез луэ.  К. Герд нимо гимназилэн директорезлэн воштӥсез Галина Чушьялова — лагерьлэн кивалтӥсез, Россиысь культура удысысь дано ужась Екатерина Антонова — чеберлыкъя кивалтӥсь.

Лагере мыно творчество удысэ кыстӥськись пиналъёс, «кенешчиос» бырйыны туртто гуртъёсысь таш-таш удмурт нылпиосты. Озьы Балатон ты дурын пиналъёс  кырӟало-экто, шутэтско, венгер кылэз дышето. Фольклор номинациын усточиосмы котьку нырысетӥ инты басьто. Нош фестивале вуэмъёсты котьку но шулдырто удмурт арганчиос.

Та аръёс ӵоже венгер шаерез паймытыса кельтӥзы Вавожысь «Крезьчи», Вотка педколледжысь «Сайкан», Алнаш ёросысь Кузёбайысь «Пичи берекет», Кизнер ёросысь Кармыж гуртысь «Бызара уӵыпиос» коллективъёс, «Пурга кизилиос» центрысь усточиос, Пичи Пурга районысь Брангуртысь театрын шудӥсьёс, Можга ёросысь Кибъя гуртысь «Уӵыпи», Кияса ёросысь Уддядиысь «Сарали», Дэбесысь «Дарали» ансамбльёс.

Балатон дуре вуылыса, пиналъёс берто лобась мылкыдын. Ӟучомемгес нылпиос удмуртлыксэс шарае поттыны ӧдъяло, асьсэды мукетгес шӧдо. Нош 2007-тӥ арысен К. Герд нимо гимназиын арлы быдэ люкасько Венгрие фестивале ветлэм удмурт нылпиос — огазьын соос тодазы ваё шулдыр но пайдаё ортчытэм дырзэс.

Дунъяно муртъёс — огезлэсь яркыт мукетыз

1992-тӥ арысен удмуртлыкез ӝутӥсь но азинтӥсь муртъёсты  пусъё К. Герд нимо премиен. Таӵе данъян нунал тупалляз ни 18 пол. Премиен дунъямын 40 мурт.

Нырысь чакламын вал пусйыны кык-куинь муртэ гинэ. Но нырысетӥ полаз — 1992-тӥ арын — таӵе куронъёсты быдэстыны ӧз луы, уго премиен дунъяно адямиос огезлэсь яркыт мукетыз вал. Соин лауреат  луиз 5 мурт: профессор  Маргарита Гришкина, профессор Фома Ермаков, Дэри ёросысь Якшур школаысь дышетӥсь Григорий Перевозчиков, кылбурчи Юлия Байсарова, кылбурчи но тодосчи Даниил Яшин (пусъемын улонысь кошкемез бере).

Дано удмурт премия сётэмын мукет ӵыжы-выжы эшъёсмылы но — чуваш писательлы Мишши Юхмалы но венгер тодосчилы Петер Домокошлы. Нимаз адямиосты сяна, дунъямын коллектив — Ижысь «Инвожо» ансамбль.

Берло Герд премиен пусъё арлы быдэ кык муртэ.

Удмурт нылкышноос пӧлын туж сиё-дано лыдъяло А. Оки нимо премиен дунъям муртъёсты. 1994-тӥ арын нырысьсэ солэн лауреатэз луиз кылбурчи Людмила Кутянова. Вуоно араз ик премиен пусйизы мукетсэ кылбурчиез — Алла Кузнецоваез. Жаляса верано, та поэтессаосмы улонысь кошкизы ни.

Премиез сётъян сярысь положениея данъяны луэ культураын, наукаын, тазалыкез утёнын, дышетонын азинлыко тыршись удмурт нылкышноосты. 17 ар ӵоже пусъемын 30 мурт. Пӧлазы тросгес культураын ужасьёс но дышетӥсьёс, тужгес ичи — эмъясьёс.

Туэ нырысьсэ висъямын саклык удмурт кылын гожъяськисьёслы но. Уго журналистъёс пӧлын радъяськись конкурсъёсы пыриськон понна удмурт кылын гожъяськисьёс ужъёссэс ӟуч кылэ берыктоно луо. Соин валче анай кылын малпаськись журналистъёслы кык полэс секыт. Со сяна, удмурт кылын гожъяськон мылкыд пыӵатыны кулэ егитъёслы но. Табере арлы быдэ устооссэ пусъёзы Эрик Батуев нимо премиен. Туэ та премиез басьтӥз 4 мурт: Елена Фёдорова, Георгий Грязев, Анастасия Гребина но Вероника Ваулина.

Оскон доры — анай кылын

Удмуртлык туннэ утиське верам кыл пыр но. 15 фин-угор кылэ берыктэмын Библилэн Выль сӥзёнэз. Протодиакон Михаил Атаманов трос лэсьтӥз та удысын удмурт кылмы понна.

Соин удмурт калык ӵем вазиськылӥз «Удмурт кенеше», анай кылын службаос радъяны курыса. Та пумысен нимысьтыз вераськон вал Ижысь но Удмуртиысь Николай митрополитэн.

2007-тӥ арысен мыно удмурт службаос. Нырысь-валысь вошъяськылӥзы черкъёс, баӵкоос. Но ваньмыз ӧраз пыриз. Табере котькуд арнянуналэ Дун-чылкыт Михаиллэн черказ 8 часын ӵукна удмурт кылын вӧсяськон ортче.

Кылем арын радъяськиз мукетыз бадӟым уж. Со кутскиз Вералэсь, Надеждалэсь, Любовьлэсь но София анайзылэсь нуналзэс пусъён бордысен. Удмурт нылкышно кенешлэн правленияз малпазы та ним нуллӥсь удмурт нылкышноосты ӟечкыланы, черкын ортчытӥзы нимысьтыз пумиськон. Дасямын вал удмурт кылын пичи обросъёс, соосты сётӥзы вӧсяськыны лыктэмъёслы. Табере Дун-чылкыт Михаиллэн черказ  Вералы, Надеждалы, Любовьлы но София анайзылы сӥзем приделаз ортчо трос ужрадъёс. Озьы черк пыр но анай кылын визьманы, удмуртлык доры сюрес усьтыны луэ.

Удмурт Дунне
By Удмурт Дунне 1 ноября, 2011 08:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<