Выль борддоръёс ӝутскозы

Удмурт Дунне
By Удмурт Дунне 23 ноября, 2011 10:36

Выль борддоръёс ӝутскозы

Туэ 10 толэзь куспын лэсьтӥськон удысын ог 15 миллиард манетлы огкылъёс гожтэмын. Кылем арысь та вакытэн ик ӵошатоно ке, пуктӥськонлы вуись уксё 37 процентлы йылӥз. Озьыен, кышкатэк вераны луэ: юрт ӝутон удыс улӟиз. Таӵе ӟеч мылкыдын журналистъёсын пумиськонзэ кутскиз Удмуртиысь лэсьтӥськонъя, архитектурая но улон инты политикая министр Сергей Шикалов.

Газ вуоз

Туэ газ пыртонлы оглом висъяськоз 680 миллион манет. Та лыдпус кылемын 2010-тӥ арын мында ик. Озьы чагыр эстӥськон кошкоз 400 иськем кузя гумыостӥ. Но Россиысь «Газпромлэн» валтӥсь куронэз вань: газ пыртыны соглаш мед кариськозы гурт поселениысь 80 процентэз улӥсьёс. Бадӟым огазеяськон огъя магистраль гумыос тыре ке, республикамы сюлмаське ни котельнойёс пуктон, гуртэтӥ газопровод кыскон пумысен. Вуоно арлы чагыр эстӥськон кысконлы оглом чаклало 900 миллион манет висъяны.

 

Бюджет удысын тыршисьёсты шумпоттозы

Куинетӥ арзэ азинске «Егит семьяослы — улон инты» программа. 5 сюрслэсь уно  кузпалъёс соя квартира басьтыны быгатозы. Пӧлысьтызы 2 сюрслэсь уно семья пусйиз ни корка пыронзэ. Та программа азьланяз но уз быры. Но отчы пыриськон понна семьяослы луоно ни трос нылпиё — 3 но солэсь тросгес пинал будэтӥсь. Соку республика висъялоз 5 процентъем кредит. Программалэн выль инъетэз али дасяське ни.

Али нимысьтыз саклык луоз бюджет удысын ужасьёслы. Кин квартира басьтыны уг пӧрмыты — солы социальной патер сётозы. Вуоно арын Ижын вуттозы огзэ юртэз. Со интыяськоз Воткинской шоссе ульчаысь выль «Столичный» микрорайонэ. Татысь 10 этажъем юртысь вань квартираосты чаклалозы дышетӥсьёслы, эмъясьёслы, культураын тыршисьёслы. Та бӧрсьы вуттозы кыкетӥзэ коркаез. Кинлы сётозы квартира, кудбыдӟа луоз со, кӧня тыроно луоз улон инты понна — таиз али тодмо ӧвӧл на.

 

1 миллиард манет люкылэмын

Туннэ Пугачёвоын усьтӥськоз выльдэм нылпи сад. Июне 102 номеро арсеналын пуштылонъёс дыръя со куашкан калэ вуиз вал. Табере отын пушкыз но висъетъёсыз воштэмын, выль тӥрлык но мебель басьтэмын.

Пугачёвоын пуштылонъёс дыръя 3 сюрс 540 зуркам юртъёс пӧлысь вуттэмын 3 сюрс 362-ез. 180 пала коркаосын тупатъян ужъёс уг на мыно. Министр Шикалов чӧлске Пичи Пурга ёрослэн кивалтӥсьёсыз вылэ. Соос шуо, та коркаос тупатъямын ӧвӧл ке но, отын улыны луэ. Районын али ужало 400 лэсьтӥськисьёс.

Зуркам коркаослэн лыдзы берло толэзьзэ эшшо 74 юртлы йылӥз на. Уго кышкыт учыре шедем гуртъёс пӧлы табере пыртыны луэ мукетъёссэ но. Та выль тулкымен валче калык выльысь заявлениосын вазиськыны кутскиз. Министр пусъе: Россилэн бюджетысьтыз висъям 1 миллиард манет быдтэмын ни. Министерствоын ужасьёс матысь дыре Россиысь Улосъёсты азинтонъя министерствоын отчёт лэсьтозы. Со ортчиз ке, Удмуртие эшшо 1 миллиард манет лыктоз на. Но Сергей Шикалов малпамъя, та коньдон ваньмызлы, оло, уз тырмы. Уго пуштылонъёслэн куаразы вуоно тулыс но шуккиськоз на. Но 2 миллиард манетлэсь трос коньдон нокин уз ни сёты. Соин кин али ӧз вутты коньдон басьтыны, солы уксё утчано луоз ни суд пыр — Обороная министерстволы пумит иск сётыса.

Елена Скворцова.

Удмурт Дунне
By Удмурт Дунне 23 ноября, 2011 10:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<