Вормымон ужпумъёс

Удмурт Дунне
By Удмурт Дунне 30 ноября, 2011 09:42

Александр Волков сак чакласа возе Ижысь автозаводысь югдурез. Толэзьлы огпол ке но пумиськылэ отын ужасьёсын, соослэн сюлмаськытӥсь юанъёссылы валэктонъёс сётъя. Алигес Александр Волков нош ик вуылӥз «ИжАвто» заводэ.

Президентэз заводын пумитаз огазеяськонлэн директорез Алексей Алексеев. Со вакчияк ивортӥз предприятилэн туннэ нуналлы ужамез сярысь.

— Та вакытэ заводын модернизация ортче: 90 номеро корпус дасямын луоз «Лада-Гранта» машинаосты бичаны. Йылпумъянъёс лэсьтыны луоз ни туэ ар ӵоже ужаммылы. Заводэ выжтэмын вал «АвтоВАЗ» концернын бичаськись ВАЗ-2107 машинаез поттон. Со сяна, Ижысь автозавод толэзяз 10 сюрс авто бичаны пӧрмытӥз ни. Та ӧвӧл-а вормон! — шуиз со.

Заводын тыршисьёслы шуныт кылъёс вераз Президент Александр Волков но:

— Малпасько, «ИжАвто» таин гинэ уз буйга, производствозэ ӝутыны тыршоз. Бен, та вакытэ тӥ азе шуг-секытъёс султӥзы. Угось йылпумъяськиз вуж машинаосты выльёсыныз воштонъя программа, озьы ик толалтэ автомобиль ичи басьто. Но та ужпумъёс тӥледлы вормымон.

Александр Волков заводлэн туэ ужамезлы вылӥ дунъет сётӥз. Тужгес но бадӟым вормонэн лыдъяз со заводлэсь коллективзэ утёнэз но дэмен ужась команда кылдытонэз.

Елена Никитина.

Удмурт Дунне
By Удмурт Дунне 30 ноября, 2011 09:42