Буйгатӥсь лыдпусъёс но гожтэтъёс

Удмурт Дунне
By Удмурт Дунне 29 ноября, 2011 10:02

Журналистъёсын пумиськылӥз Кун Кенешлэн Тӧроезлэн нырысетӥ воштӥсез Виктор Кушко. Мылкыдыз каньыл: республикамылэн улонэныз герӟаськем куд-ог лыдпусъёс но гижысь-пиньысь быдэстэм ужпумъёс шумпотто.

Шаерысьтымы промышленной предприятиос берло 10 толэзь ӵоже 229,4 миллиард манет тыр вузъёс поттӥзы, кылем арын та вакытэн ӵошатыса, со 128,7 процент луэ. Лыдпусъёс уката ӟеч луизы машина но соослы воштос ёзъёс поттон, ку дӥсь но пыдкутчан вурон, резиналэсь, пластмассалэсь, пулэсь вузъёс дасян но мукет удысъёсын.

— Ижавто, кылсярысь, ужазинлыксэ 558 процентлы будэтӥз, — пусйиз Виктор Михайлович. — Отын али толэзяз ог 10 сюрс машина потто — таӵеез берло 20 ар ӵоже ӧй вал ни.

Юнма лэсьтӥськон удыс: 357,4 сюрс квадрат метр улон интыос ӝутэмын, со 15,8 процентлы тросгес. Ог 60 процентэз коркаос нимаз адямиослэн луо. Мыло-кыдо пуктӥсько гуртоос но.

Нялтас вераса, городъёслэсь гуртоос номырин бере уг кылё. Туэ 10 толэзь ӵоже соос 39,8 миллиард манет тыр вуз поттӥзы ни, кылем арынлэсь 117 процентлы ятыргес. Поттэмын 110,7 тонна сӥль — 8 процентлы тросгес, 591,8 тонна йӧл — кылем арынлэсь 0,6 процентлы ичигес. Но та лыдпус герӟаськемын миым пӧсь куазен. Пудо сиён тырмымтэен, скалъёслэн лыдзы 4,4 процентлы кулэстэмын вал. Но таин ӵош ӝыны процентлы ке но йылэтэмын ыжъёслэн но кечъёслэн лыдзы.

Алигес сыӵе вакытъёс вал ай: республикаысьтымы вузъёс пӧлысь ог 25 процентсэ гинэ асьме заводъёс, предприятиос поттӥзы. Туэ та лыдпус 51,2 процентозь будэмын. Калленэн ке но йылэ шоро-куспо уждун — али со 15 сюрс 136 манет, кылем арынэн ӵошатыса, 111 процентлы тросгес.

* * *

Кун Кенешысь депутатъёс туннэ эскеро Удмуртилэсь 2012-тӥ арлы бюджетэзлэсь проектсэ. Азьло аръёсын ӵошатыса, туэ со пӧртэмгес кутӥське. Казнаысь коньдонэз люкылонэ республикаямы улӥсьёс но пырисько, шуыны луоз.

Июль толэзьысен ик ортчизы депутат кылзонъёс, калык кылзонъёс. Адямиос веразы мылкыдзэс, кыӵе удыcъёслы республикаямы нимысьтыз саклык висъяны кулэ.

— Президент доры калыклэсь 122 ӵектон вуиз, — пусйиз Виктор Кушко.  — Со пӧлысь 78 ужпум пыртэмын ни бюджетлэн проектаз, кылемъёсыз эскерисько на.

Кыӵе валтӥсь дэмланъёсыз калыклэн? Анай-атайёсты сюлмаськыто нылпи садъёсын интыослэн тырмымтэзы. Егит специалистъёс куро улон интыос. Ӧжыт ӧвӧл мӧйыослэсь улон-вылонзэс умоятыны косӥсьёс, спортлэн азинсконэз сярысь малпаськисьёс.

— Троссэ сюлмаськытэ: нош ик-а будозы тыллы, вулы, чагыр эстӥськонлы дунъёс? — ватсаз Виктор Михайлович. — Таӵеослы али ик вераны луоз ни: январь толэзе кӧнялы ке дунояны быгатоз газ. Тыллы но шунытлы дунъёс будэтэмын луозы 2012-тӥ арлэн кыкетӥ палараз, но троссэ — 6-7 процентлы гинэ.

Нялтас вераса, республикаямы ужпум пуктэмын ни: матысь 2-3 ар куспын нылпи садъёсы черодъёс бырыны кулэ. Нош улон интыос табере, оло, дунтэк но висъяськыны кутскозы — социальной найм чотын. Озьы 2012-тӥ арын Ижын пуктыны кутскозы бюджет чотын ужасьёслы нимысьтыз юрт. Таӵеез ог кызё ар ӧй вал ни.

* * *

«Огъя Россилэн» общественной приёмнояз туэ ар куспын 1 сюрс 300-лэсь трос адями пӧртэм юанъёсын вазиськылӥз. Со пӧлысь ог 30 процентэз соку ик сэрттэмын-пертчемын.

Удмуртиысь 9 муртлэн вазиськонэзлы туэ гожтэт ыстӥз Россилэн Правительствоезлэн Тӧроез Владимир Путин. Ваньмаз ик — юрттэт сӥзён. Озьы берлозэ Москваысь шумпотон вуиз Ижысь Юрий Бычинлэн семьяяз. Чернобыльын пуштылон бервылъёсты утялтонэ пыриськем мурт кема аръёс ӵоже возьмаса улӥз кунлэсь улон инты висъямзэ. Кык нылъёсыз будӥзы, нунокъёсыз но вань ини. Берло  аръёссэ кык комнатаен квартираын сизьым кузя улӥзы.

— Атаймылэн чидамез шоры учкыса, сузэреным будӥм, — вера Бычинлэн Ольга нылыз. — Быдэ вуэммы бере асьмеос квартира басьтонлэсь йылзэ-пумзэ утчано кариським, Владимир Владимировичлы но гожтэт пӧрам. Сюлэм шумпотэ: со туж ӝог вазиськиз. Озьы осконмес юнматӥз: кун уг кушты калыксэ.

Бычинъёс табере корка пырон но лэсьтӥзы ни: кык комнатаен квартиразы борды эшшо одӥг комнатаензэ басьтыны быгатӥзы. Нош В. Путинлэсь гожтэтсэ соос тужгес дуно документъёссы, синпель кузьымъёссы пӧлын возёзы.

Элина Кумачёва.

Удмурт Дунне
By Удмурт Дунне 29 ноября, 2011 10:02