Амалы ке луысал, Лӧпшо Педунез шудысал

Удмурт Дунне
By Удмурт Дунне 30 ноября, 2011 09:57

Амалы ке луысал,  Лӧпшо Педунез шудысал

Удмурт театрысь артистъёслэн ваньзылэн сямен ик одӥг автобиографизы: вордскемын гуртын. Тросэз соос пичи дыръязы театр сярысь ӧз но малпаллялэ. Артистъёсты адӟылӥзы, соос гуртысь клубъёсын шудыку гинэ. Отысен ик кутске артистлэн ужезлы синмаськон, со кадь луон мылкыд. Театре вуон сюресэз пӧртэм ӧй вал Удмуртиысь дано артисткалэн Екатерина Яковлевалэн но.

Пичи Пурга ёросысь Улӥнь Юри гуртэ Удмурт театрысь артистъёслэсь лыктэмзэс тодыса, Катя Яковлева бызьыса клубе мынылӥз. Соослэсь лыктэмзэс чидатэк витьылӥз. Пичи ныллэн со дырысен йыраз-визьмаз кылемын Валентина Загуляева, Нина Бакишева, Полина Ухова, Борис Безумов, Василий Перевощиков. Али ке но син азяз «Ой, тӥ, чебер нылъёс», «Пиштэ ке но, уг шунты», «Жингрес сӥзьыл» спектакльёс. Сюлэмыз эшшо но путымон жугиськылӥз, спектакль бырем бере артистъёс автобуссы доры потыку. Валамон ини, учкисьёслэн соосты лэземзы ӧз потылы. Юаллясько, улэм-вылэмзы сярысь тодэмзы потэ.

Артистъёслэн ымныразы пальпотон шудэ. Кыӵе шудоесь соос! Катя келяськыса сылӥсь калык пӧлы шедьылӥз. Зэмос артистъёслэсь тусбуйёссэс адӟыса, шоканэз пытсаськылӥз. Ас понназ малпалляз: кудзы ке но монэ мед синйылтозы вылэм, матэгес, вӧзам мед султозы. Но малпанэз ӧз быдэсмылы. Ачиз но пичи мурт доразы матэктыны ӧз дӥсьтылы. Артистъёс кошкем бере Катя кема ас дунееяз йыромыса выллем ветлылӥз. Нокызьы йырысьтыз-сюлмысьтыз уг кошко ни соос. Ӧвӧл, артистъёс гуртысь агай-апайёс кадь чик но ӧвӧл, Катялэсь но соос пӧртэмесь — чылкак музон адямиос.

Сцена вылын шудон понна кытын но кызьы дышетсконо, со сярысь нылаш ӧз ик тодылы. Шаплы Катя урокъёс бере мыло-кыдо ветлӥз эктонъя, драмая но гимнастикая кружокъёсы. Нылпиослэн сцена вылын быгатыса шудэмзы пумысен быдэс гуртын гур! гинэ вераськылӥзы. Катялы секыт ке но вал эшъёсыз сьӧры уйиськыны, одӥг нуналлы но соослэсь бере ӧз кыльылы. Репетициосы шумпотыса ветлылӥз.

Сизьым нылпи пӧлысь со кыкетӥез ныл вал. Сузэр-вынъёссэ пыд йылазы ӝутон понна нэнэезлы трос гинэ юрттӥськоно луылӥз. Яковлевъёслэн атайзы, фронтысь сӧсырмыса бертэм мурт, улонысь вазь кошкиз. Нэнэзы векчи нылпиосын кылиз. Но капчи мылкыдо Катя котькыӵе уж борды ӝабыр-ӝабыр  басьтӥськылӥз. Со умоезлы оскыса улӥз. Нокызьы вунэтыны уз быгаты ни Улӥнь Юри гуртысь эшъёсыныз «Тулыс театр-75» фестивале пыриськемзэ. Отысь вормисьёс луыса бертӥзы. Та фестиваль бере жюриын одӥгез пукем мурт Катяез дораз ӧтиз. Тӥляд, пе, сцена вылын шудыны быгатонлыкты инкуазен сётэмын. Удмурт театре ветлыса, оскалтэ ай, отын усточи нылпиослэсь сцена вылын шудэмзэс эскеро.

Гуртысь лыктэм ныллэн шудэз вылэм. Сое кутӥзы: массовкаосын, пе, шудод. Табере со яратоно артистъёсыныз ӵош ачиз сцена вылын шудэ! Солэсь но бадӟым кыӵе меда шудэз адӟод на? Ӵок, рольёс сётъямтэзы понна Екатерина пичи но  ӧз кайгыры. Шумпотонэз одӥг вал: учкись азьын сцена вылтӥ ветлэ. Дышетске вӧзысь артистъёслэсь кылзыны, адӟыны, валаны, сцена вылын ассэ возьыны. Котькуд артист понна со тужгес но кулэез но адӟем карымонэз луэ.

Массовкаосын шудыкуз но, Екатерина ассэ возьматыны быгатылӥз. Лулысь-сюлмысь шудыны тыршемзэ но быгатонлыксэ шӧдыса, солы юрттӥськыны басьтӥськизы режиссёръёс Г. Веретенников, А. Блинов, В. Перевощиков. «Гондыр куш» спектакльысь Фёдоровналэсь пичигес рользэ шудыны Василий Перевощиков Екатерина Яковлеваез ӵектӥз. Фёдоровна — сад-бакчаын возьмаськись Егорычлэн кузпалыз. Нош возьмаськисез шудӥз ачиз режиссёр. Спектакльын Фёдоровна кузпалзэ, Егорычез, тышкаськыны кулэ.

— Мон нокызьы Василий Яковлевич шоры кеськыны уг быгатӥськы, возьыт, кылы уг берытскы, быгыльске, — тодаз вае Екатерина Ивановна. — Нош режиссёр валэктэ: мон туннэ Василий Яковлевич ӧвӧл, мон Фёдоровналэн, тынад, кузпалыд. Шуген пыри со роле. Режиссёр котьку но капчи, лякыт ужаз, быгатӥз валэктыны но дышетыны.

1977-тӥ арын ялӥзы: Удмурт театр егитъёсты артистэ дышетскыны келя Уфаысь искусствоосъя институтэ. Катя, конкурс пыр потыса, студент луиз. Ачиз кадь егит нылъёсын но пиосын Уфае кошкиз. Ньыль ар ӵоже дышетскытозяз, со трос тодӥз театр сярысь, дышетӥз солэсь историзэ, артистлэсь мастерствозэ. Сцена вылэ зэмос артист луыса потон понна трос лыдӟиськиз, пьесаосын шудӥз. Весяклы тодаз кылизы удмурт нылпиосты дышетӥсьёс Ф. Касимова но А. Карякин. Катя валаз: искусство — со уж.

Студентъёс, дышетсконзэс быдтыса, сьӧразы вайизы кык диплом ужзэс: И. Друцэлэсь «Касса Маре» («Шуд сэрег») но М. Каримлэсь «В ночь лунного затмения» («Толэзь пиштон уе») спектакльёссэс. Катя валтӥсь ролез ӧз ке но шуды, яркыт но вунонтэм образъёс кылдытӥз. Солэн героиняосыз висъяськизы небыт сямынызы но капчи мылкыдынызы. Сыӵе муртъёсты шудыны быгатонлыкез музон спектакльёсын но усьтӥськиз: кылсярысь, А. Григорьевлэн «Лысву сямен уг тӧлӟы синкыли» драмаяз Нинаез шудэ, А. Григорьевлэн ик «Парсьпи но эмеспи» комедияз чылкак мукет ролез быдэстэ — Антонлэсь кузпалзэ. Нылкышно вала но тодэ картэзлэсь умойтэм ужамзэ — бускельёссылэсь парсьпизэс лушкамзэ — но со шарае уг потты кырсь ужез, алдаськонэз пыдло ватыны турттэ.

М. Ладолэн «Огшоры учыр» спектакляз Екатерина Ивановна Парсьлэсь рользэ ӟеч но мур возьматыны быгатӥз. А. Дударевлэн «Чибориё пиштэ шунды» пьесаяз Ганнаез со туж усто шудӥз. Кык пӧртэмесь рольёс, кыкез но соос яркытэсь но кужмоесь, сюлэмез бугыртӥсесь.

«Улӥськом-вылӥськом, шу…» (Н. Сидоровлэн пьесаезъя) спектакльын Екатерина Ивановна Марусялэсь образзэ сокем быгатыса шудэ, сое учкись озьы гинэ вунэтыны уз быгаты ни. Вань сюлэм шунытсэ поныса, аслэсьтыз улонзэ возьматэм кадь, учкись доры вуттэ.

Егит дырысеныз со ӧз кышка «пересьёслэн улоназы» пырыны. Уно выжыкылъёсын Екатерина Ивановналы Баба Ягалэсь рользэ шудыны кылдӥз. Кызьы тодӥськом: Баба Яга лек, кескич но урод сямо. Нош Екатерина Ивановна сое котькуд спектакльын пӧртэм ласянь возьматыны быгатэ. Сокем усто шудэ, нылпиос зэмос Баба Яга доразы лыктэм кожало.

Екатерина Ивановналэсь И. Гавриловлэн «Пужъятэм дэрем» пьесаяз (режиссёрез В. Байков) но шудэмзэ пусйытэк кельтыны уг яра. Отын со режиссёрлэсь пуктэм куронъёссэ быдэстӥз: ӟег нянь кадь сюлэмо пересь кышномуртэ шудӥз.

Мынам малпамея, ма, актрисалэн верамезъя но, солэн кужмо, пужалскымон яке туж яркыт но тумошо рольёсты шудэмез потэ на. Мон вань быгатонлыкме ӧй усьты, ӧй шарая на, шуэ Екатерина Яковлева.

Вите, чидатэк вите Удмуртиысь дано артистка сыӵе пьесаез, кытын со сюлэмызлы кельшымон но учкисьлы синмаськымон ролез шудоз. Улоназ выллем отчы пыроз. Солэн, ву пальккаськем кадь, кыре поттэмез потэ вань быгатонлыксэ.

55 ар тырмонэныз ӟечкыласа, сӥзиськом Екатерина Ивановналы: вань малпанъёсыз мед быдэсмозы!

Анна Евсеева.

Удмурт Дунне
By Удмурт Дунне 30 ноября, 2011 09:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<