«Ижкар» шедьтӥз кынар

Удмурт Дунне
By Удмурт Дунне 22 ноября, 2011 15:23

«Ижкар» шедьтӥз кынар

Сьӧлта ёросысь песяйёс паймизы барабанлы.

Шаерысьтымы «Ижкар» огазеяськон егит на. Со кылдӥз 2009-тӥ арын. Татчы пыро Удмуртиысь тодмо суредасьёс, искусствоведъёс, кылбурчиос, писательёс, вакчияк вераса, творчествоен герӟаськем муртъёс.

«Ижкар» огазеяськонлэн кивалтӥсез, Удмуртиысь Кун премилэн лауреатэз, тодмо суредась Юрий Лобанов верамъя, вакчи дыр куспын трос лэсьтыса вуттэмын. Кылсярысь, «ижкаръёс» радъязы  туала искусстволы сӥзем арлы быдэ ортчись «Иж Арсенал» фестивалез. Отчы пырисько Россиысь но кунгож сьӧрысь суредасьёс Владимир Дубоссарский, Дмитрий Гутов, Алексей Политов но мукетъёс. «Ижкар» шаерысьтымы ПЕН-клубен ӵош арлы быдэ ортчытэ егит кылбурчиос пӧлын конкурс но вормисьёслы Дмитрий Пригов нимо премия сётэ. Кылем арын вал «Чылкыт ву», «Кынар кабон» симпозиумъёс. Усточиос поттӥзы ини «Вячеслав Михайлов», «Кучыран Юри» но «Валентин Белых» бадӟым каталогъёс, дасяське Расиф Батыршинлэн ужъёсыныз бичет. Ёросысь ёросэ ветлӥз «БелМихайБат» адӟытон.

Но та дырозь «Ижкарысь» художникъёслэн огазеям выставказы ӧй вал на. Та нуналъёсы со усьтӥськиз Ижысь Национальной музейын. Отчы пырисько Валентин Белых, Сергей Орлов (Кузи Серги), Энвиль Касимов, Вячеслав Михайлов (Гиргорей Слави), Юрий Лобанов (Кучыран Юри), Анфим Ханыков, Расиф Батыршин (Батыр) но мукетъёс. Валамон ини, таӵе адямиос огшоры адӟытон ӧз дасялэ. Татын соос возьматӥзы зэмос перформанс но «Кынар кабон» хеппенингзэс. Соос зэмзэ но асьсэлэсь кынарзэс (кужымзэс) кабизы ини, табере пӧлазы кыско но этнофутуризм искусствоен тодмато-эшъяськыто мукетъёссэ.

Мар со сыӵе хеппининг, перформанс? Одӥг кылын гинэ уд вера. Татын ваньмыз огазьын луыны кулэ: дыр, инты, художник, учкись, мылкыд. Ньыль искусство полэстӥськыса кошке: крезьгур, пластика, графика но живопись. Валтӥсь мугез — малы ке дышетыны, пуш дуннедэ усьтыны но воштӥськыны. Валантэм кадь кылӥське, сое гожтыны но секыт, аслыд адӟыны-дунъяны кулэ. Нош дунъясьёс трос гинэ. Удмуртиысь культурая, печатья но иворъёсъя министр Дмитрий Иванов та адӟытонэз художникъёслэн туж бадӟым вормонэнызы но шаерысьтымы искусствоын выль ӧрен лыдъяз.

Пересьёслы но таӵе ужрадъёс кельшо, шӧдске. Выставкае вуылӥзы Сьӧлта ёросысь Гопгуртысь кенакъёс. Татьяна Махнёва, Раиса Келарева но Валентина Медведева быдэстӥзы «Сӥзьыл пӧртмаськон» гуръёсты. Та песяйёслы синмаськем Юрий Лобанов, Сьӧлта ёросын «Кынар кабон» фестиваль ортчыку. Соин ик адӟытонэз учкыны но шулдыртыны  кенакъёсты ӧтем.

— Суредъёссы милемлы кельшо, куд-огъёссэ умгес ке но валаське. — шуэ Раиса Васильевна Келарева. — Мудрон выро, но ми кырӟаны яратӥськом бере, кытчы ӧтё, мынӥськом. 2009-тӥ арын вуылӥм вал Санкт-Петербурге, отысь калык паймиз вашкала кырӟанъёсмылы. Татын но соосты ик быдэстом, та гуръёсты ми пичи дыръямы дышетӥм ай.

 Галина Семёнова.

Туспуктӥз Владимир Беломорских.

Удмурт Дунне
By Удмурт Дунне 22 ноября, 2011 15:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<