«ИжАвто»: вуоноез луоз усто?

Удмурт Дунне
By Удмурт Дунне 11 ноября, 2011 09:39

«ИжАвто»: вуоноез луоз усто?

Кивалтӥсьёс сэртто автозаводлэсь сюлмаськонъёссэ.

Таиз ужан арня кутскиз шаерамы бадӟым куноослэн лыктэменызы. 7-тӥ ноябре Иже вуылӥзы «Ростехнологии» кун корпорацилэн но «АвтоВАЗ» огазеяськонлэн кивалтӥсьёссы. Асьме Президентэн ӵош соос ветлӥзы автозаводэ, кенешизы предприятилэн ӵуказе нуналыз сярысь. Сайкыт-а машина лэсьтӥсьёсмылэн азьпал сюрессы? Ма вите соосыз, ар-кык ортчыса? Вуоноез усто ке, кытысь соку калык пӧлын умойтэм вераськонъёс пото? 

 

Сылмись оскон

Вылӥ куноос югдурез огъя умоен лыдъязы. Кызьы шуиз «АвтоВАЗ» ОАО-лэн президентэз Игорь Комаров, али «ИжАвтоын» ӟеч коллектив кылдытэмын, ми тыршом сое утьыны, адямиослы юрттыны. Но та кылъёс сьӧрысь специалистъёс кивалтӥсьлэсь шугъяськемзэ но шӧдӥзы. Уго соку ик тодмо луиз: вуж машинаосты выльёсыныз воштонъя федерал программа йылпумъяськемен, «классика» радэ пырись автомобильёслы кулэяськон Россиын кулэсмыны ӧдъяз. 200 сюрс манетлэсь дуно сылӥсь асьме выль «питранъёс» шоры учкись туннэ туж ик ӧвӧл ни. Сомында коньдонэн вуж иномарка басьтод но кемагес ворттылод, пусъё руль сьӧрын пукыны яратӥсьёс.

Таӵе мылкыдъёсты, валамон ни, тодытэк уг уло асьме заводлэн выль кузёосыз но. Татчы ветлыкузы, соос ивортӥзы, матысь дыре Ижын «Жигули» машиналэсь ньылетӥ но сизьыметӥ модельёссэ поттонэз кулэстоно луоз шуыса. Нош туала дырлы тупась «Лада-Гранта» автоез поттыны кутскон понна трос лэсьтоно на. Уго азьлоез конвейер, кытын бичало вал, шуом, «Орбитаез», вужмемын. Отчы выль тӥрлык инъяно. Со понна кулэ дыр. Огъя вераса, нырысетӥ «Гранта» кайта куинетӥ кварталэ гинэ потоз ай.

Ма карозы со дырозь татысь уно сю ужасьёс? Та ужпум туж шугъяськытэ завод калыкез. Уго али гинэ предприятие вадьсысь пилемъёс пазяськизы кадь, али гинэ ӟечезлы оскон сюлэмъёсы пыӵаны кутскиз… Но шумпотыны вазьгес вылэм, лэся. Тольяттиысь кузёос рабочийёсты огдырлы общественной ужъёсы интыяны малпало кадь. (Валля арын кризис дыръя та амал Россиын паськыт вӧлмиз.) Нош Александр Волков дэмла предприятие пушкын ик огдырлы ужан интыос кылдытыны.

Матысь аръёсы Ижын поттыны кутскозы «Рено» но «Ниссан» маркаен автомобильёсты. Уго та тодмо фирмаос «АвтоВАЗ»-лэн кема дырлы партнёръёсыз луо. Но выль производство радъян нокинлы но капчиен уг сётӥськы. Со понна трос коньдон шедьтоно, ужасьёсты выль удыслы дышетоно. Завод кузёос оскыто, ваньмыз со чакламъя радъяськоз шуыса. Озьы мед луоз. Но гыбдась осконэз утьыны капчи ӧвӧл ук. Уго Ижысь авто лэсьтӥсьёс берло дас-кызь ар ӵоже оломае но адӟизы ни.

 

Удмурт кызьпулэсь сурсвузэ сюпсизы

Ог дас сизьым ар талэсь азьло Самараын кылдытэмын вал «СОК» компания. Нырысь шуылӥзы: солэн нимыз потэмын «Самарские оконные конструкции» огазеяськон бордысь. Бӧрысь лэчыт кыло адямиос меӵак вералляны кутскизы, та фирма Россиысь экономикаез сюпсьыны кылдытэмын шуыса. Озьыгес ик луиз. Шӧртчи ужбергатӥсьёс вакчи дыр куспын киултӥзы автомашина но солы ёзъёс поттонъя уно заводъёсты. Соослэн бурд улазы шедиз асьме «ИжАвто» но.

2008-тӥ-2009-тӥ аръёсы заводмес пыдйылчи каризы, шуыны луоз. Машина поттон дугдытэмын вал. Нырысь-валысь рабочийёс ужаны кутскизы арняяз 3 нунал ӵоже быдэн 6 час. Нош майысен соос копак ужтэк кылизы. Вить сюрс пала адями завод капка сьӧры поттэмын вал. «СОК» компанилэн кузёез Юрий Качмазов, солэн юрттӥсьёсыз Андрей Фролов но Юрий Омелин ог 6,7 миллиард манетлы огъя завод ваньбурез асьсэ фирмаосазы выжтӥзы. Валамон ни, ваньмыз со валаса, уно огкылъёс пӧраса, лэсьтэмын вал.

Югдурез утисьёс умойтэмзэ шӧдӥзы. Предприятиез юромо банкрот каремзы понна «СОК»-лэн топ-менеджеръёсызлэсь кылзэс юано кариськизы. Нош соосыз визьтэмесь ӧвӧл ук. Асьсэос но, кайпалтэм ваньбур но со дырлы кунгож сьӧрын вал ни. Законэз тӥясьёсты розыске ялӥзы. Тодмо луиз: Юрий Качмазов Огазеям Араб Эмиратъёсын улэ. Солэсь огпарзэ, Ульяновск улослэсь вице-губернаторзэ, Суздальын виизы. Мукет юлтошъёсыз кунгож сьӧры ик ватскизы.

Пусйыны кулэ, ӝутэм уголовной ужъя кыл кутытоно муртъёс пӧлы пыртэмын асьме автозаводлэн азьло директорез Михаил Добындо но. Но таиз кытчы ке палэнэ пегӟыны ӧз дӥсьты. Со следствиен огкыл шедьтӥз ни. Али эрикын, палэнэ кошконтэм сярысь подписка гожтӥз.

Ноябрьлэн кутсконаз ивор волмытӥсьёс ялӥзы: Москвалэн куремезъя Эмиратъёсын кырмемын калыккуспо розыске ялэм ӟуч ужбергатӥсь Андрей Фролов. Со улэ узыр странаын аслаз бадӟым коттеджаз. Табере солы амалтэк мадёно луоз Ижын но мукет интыосын огъя ваньбурез асэстонэ пыриськемез сярысь. Тӥни сыӵе капитализмын улӥськом асьмеос туала дыре: кин ке ужтэк кыле, кин ке миллиардъёсын узырме… Такие времена, шуэ тодмо журналист Владимир Познер.

 

Питран вылэ султон

Оло, туннэ автозаводмылэн цехъёсыз выль вуз карон интылы пӧрмысалзы ни (озьы луиз ук Ижысь подшипник поттон но мукет предприятиосын!), секыт югдурез тупатон борды Александр Волков ӧй басьтӥськысал ке. Трос гинэ бызьылоно луиз со кылем ваньбурез утён, ужасьёсты конвейер борды берыктон вылысь. Россилэн вылӥ кивалтӥсьёсыз дорозь но вуиз. Кылем арын сентябре Владимир Путин ачиз вуиз Ижысь куашкам предприятие.

Соку валан кылдӥз: куанермем «ИжАвто» ас кожаз пыд йылаз (шонергес вераса, питран вылаз) султыны уз быгаты. Сое огазеяно бадӟымгес но кужмогес автокорпорациен — «АвтоВАЗ»-эн. Мукет тупась сюрес ӧвӧл.

Кык толэзь ортчыса, декабре, Россиысь Правительстволэн Тӧроез асьме заводын кылдэм югдур пумысен нимысьтыз кенешон люказ. Сбербанклэн, «Ростехнологии» огазеяськонлэн, «АвтоВАЗ» концернлэн кивалтӥсьёсыз соку валче ужанъя кӧня ке арлы чаклам меморандум юнматӥзы.

— Ижысь заводлы юрттоно пыд йылаз ӝот-ӝот султыны, отын ваньбур поттонэз паськытатыны, — пусйиз Владимир Путин. — Экономикаын кризисэн сэрен но тужгес ик завод кузёослэн но удысэз радъясьёслэн кыл кутонэз шӧдытэк ужаменызы, асьсэ сярысь гинэ сюлмаськеменызы йырин та предприятие шуге-леке вуэмын.

Ар ӵоже 220 сюрс машина поттыны чаклам заводлэн со дырлы ог 13 миллиард манет пунэм тыронъёсыз люкаськизы. Со пӧлысь ӝынызэ азьло кузёос «ыштӥзы». Кенешемын вал «ИжАвтоез» Огазеям автомобильной группалэн (ОАГ) — Сбербанкен кылдытэм «нылызлэн» (огазеяськонлэн) — бурд улаз выжтыны. Чакламъя ик луиз. Нырысь ОАГ аукцион пыр 1,8 миллиард манетэн предприятилэсь ваньбурзэ басьтӥз. Собере сое «АвтоВАЗ»-лы вузаз. Озьы асьме предприятие бадӟым компанилэн ёзэз луиз.

Но, кызьы тодмо, асьме дорын «Жигули» поттон вазенгес ик радъямын ни вал. Туэ апрельысен октябрёзь татын 25 сюрс «семёрка» бичазы. Со понна завод ужасьёсты выльысь кутыны кутскиз. Али татын ог 5 сюрс адями тырше ни. Уж кык сменаен радъямын. Августэ заводын 10 сюрс авто лэсьтӥзы. Сентябре но сомында ик. Та дыре, кызьы поттылӥм ни, утилизация программаез пытсамен, машина лэсьтон кулэсме. Но отӥяз конвейерлэн ӝоглыкез нош ик будоз.

— «АвтоВАЗ» асьме завод понна тужгес оскымон прдприятие луэ, нош азьланьын «Рено» но «Ниссан» компаниосын валче ужан луонлык сётоз асьме дорын вань туала куронъёслы тупась автомобиль поттыны, заводлэсь быгатонлыкъёссэ ӟеч уже ӧръяны, — шуэ Удмуртилэн кивалтӥсез Александр Волков.

Соин соглаш «АвтоВАЗ»-лэн президентэз Игорь Комаров но.

«ИжАвто»-ын югдурез али паськыт возьмато Россиысь но быдэс дуннеысь ивор вӧлмытӥсь ёзъёс. Куд-ог экспертъёс паймо, малы Тольятти Ижысь уно пунэм тыронъёсын заводэз басьтыны малпаз. Мукетъёсыз валэкто: бен, долг бадӟым, но азьпала учконо ке, татын ӟеч производство радъяны луоно. Уго со пунэм тыронъёсысь 5,2 миллиардзэ кредиторъёслы Сбербанк берыктоз, 2,4 миллиардзэ кун ворсалоз (списать кароз), кылемзэ заводлэн та дырозь вузатэк кылем активъёсыз чотын пытсалозы.

Россиысь куке но 5 валтӥсь автозаводъёс пӧлы пырись предприятимы азьланьын ар ӵоже 250-300 сюрс машина поттыны быгатоз, коллективзэ ог 10 сюрс адямиозь паськытатоз. Котьма ке но, со, куд-ог мукет автозаводъёс сямен, уз быры. Тани Москваысь АЗЛК-лэн конвейерысьтыз берлоез машина васькиз ог 10 ар талэсь азьло. ЗИЛ завод миым сюрс но ӝынылэсь ичи автомашина лэсьтӥз.

«АвтоВАЗ» кужмо огазеяськонэн валче кариськыса, асьме заводчиос табере ужтэк но, уждунтэк но уз кыле ни. Бен, азьлане сюрес вольыт уз луы, вылды. Уго трос ыштонъёс адӟоно луиз берло дасо аръёсы асьме предприятие. Озьы ке но туж оскем потэ, «ИжАвтолэн» вуоноез усто луоз шуыса.

Сергей Захаров.

Туспуктӥз Николай Глухов.

Удмурт Дунне
By Удмурт Дунне 11 ноября, 2011 09:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<