Трокай — асьме полын!

Удмурт Дунне
By Удмурт Дунне 5 октября, 2011 08:28
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Трокай —  асьме полын!

Алнашын Т. Борисовлэн синпелетэз доры сяськаос тыро кивалтӥсьёс но, огшоры калык но.

Кылем арня вискын Алнаш ёрос центрын сӥё-дано усьтӥськиз «Трокай» фестиваль. Со сӥземын вал калыкмылэн тужгес дано азьветлӥсезлы, югдытӥсьлы, политиклы, эмъясьлы но удмуртъёс понна вань сюлэмзэ сётыса ужам адямилы — Трофим Борисовлы — 120 ар тырмонлы. Та бадӟым ужрадэ нырысьсэ ӧтемын вал быдэс республикаысь фольклор коллективъёс.

Куазь укыр жобаськиз, кезьыт зореныз жугиз ке но, фестивале 15 ёросысь мыло-кыдоос кӧня ке автобусэн лыктӥзы. Оглом 19 коллектив вал. Ужрадэз ортчытон ласянь сюлмаськизы «Удмурт кенеш» огазеяськон, Нациосын ужан политикая министерство, Алнаш ёрос администрация.

Маин паймытӥз фестиваль?

 

Зор кисьтиз, калык лыктиз

Алнаш музъем вылын «Трокай» фестиваль ортчиз ни 17-тӥзэ. Арлы быдэ, Т. Борисовлы сӥзьыса, со радъяськиз Асан гуртын. Но туэ нырысьсэ та фестивальлы республикалэн статусэз сётэмын вал.

«Трокай» фестивале туэ лыктэмъёслэсь кылзэс ачиз куазь юаз: чидалозы-а зор-котлы, мылкыдзы тырмоз-а югдытӥсьсэс буре вайыны? Но тунаса улӥсез ӧй вал — ӵукна дас час котырын Алнашысь культура юрт азьын калык тымиськиз. Ваньзы соос вамыштӥзы Т. Борисовлэн синпелетэз доры. Татын азьветлӥсез буре вайизы. Ваньзы сямен ик пусйизы: удмурт калык аслэсьтыз йӧно пизэ ноку медаз вунэты! Угось Т. Борисовлэн сюлмаськеменыз кылдӥз Удмурт Элькун, уно удмуртъёс дышетскыны, адямие потыны быгатӥзы. Ас вакытаз Т. Борисов выллем адямимы ӧй ке луысал, тазьы огазеяськысал меда удмурт калыкмы?

Нош куазь кисьтӥз но кисьтӥз… Адямиос, зонтъёс улэ кариськыса, сак кылзӥзы, кин ке зор кыдырамез ӧз ик шӧды, йыртэмпол сылӥз, Трокайлэн из мугорыз шоры учкиз. Тани Глаз ёросысь Коротай гуртысь «Гербер» коллективе ветлӥсьёс Алнаше вуон понна куинь часын уйин ик султӥллям, ньыль часын сюрес вылэ потӥллям. Т. Борисов сярысь, пе, азьвыл аръёсы номыр ӧм кылылэ. Иосиф Наговицин улосчимы РСФСР-ысь Наркомнацын удмуртъёслэн ужъёссыя комиссар вал шуыса гинэ, пе,  тодылӥм, но табере Т. Борисов пумысен но синъёсмы усьтӥськизы. Сыӵе визьмо азьветлӥсьёсыныз удмурт калык данъяськыны кулэ.

Трокайлэн синпелетэз доры кивалтӥсьёс сяськаос понӥзы. Митинг бӧрсьы культура юрт азьысь азбарын задор кырӟанъёс шуккиськизы — озьы усьтӥськиз кибашлыослэн адӟытонзы. Татын котькудӥз басьтыны быгатӥз шаерысьтымы пӧртэм ёросъёсысь усточиослэсь ужъёссэс.

Ижын сылоз синпелет

Т. Борисовлы сӥзем адӟытон.

Но тани ваньзы кыстӥськизы культура юртэ. Фойеын радъямын Т. Борисовлы сӥзем адӟытон. Удмурт калыклэн дано пиез вордӥськиз 1891-тӥ арын Алнаш ёросысь Кизекгуртын. Дышетскиз Алнашысь, Алабгоысь, Казаньысь училищеосын, Петербургысь университетлэн историяя но филологияя факультетаз, Казаньысь университетлэн медициная факультетаз.

1918-тӥ арын сое быръё рабочийёслэн, крестьянъёслэн но солдатъёслэн кенешенызы кивалтӥсе, «Гудыри» газетлы редакторе. 1919-тӥ арын со пыриське вань удмуртъёслэсь нырысетӥ ӧтчамзэс радъянэ. Отын ик быръё удмуртъёслэн ужъёссыя комиссаре, бӧрысь — облонолэн кивалтӥсез луэ. Трокай Вотской областьысь тазалыкез утёнъя отделэн но кивалтӥз, Вотской автономной областьлэн Тӧроез но, Калмыкилэн нырысетӥ секретарез но вал . Удмурт калыкез ӝутон, утён, азинтон понна туж трос лэсьтӥз, нош ассэ утьыны ӧз быгаты, Сталинлэн лагерьёсаз быриз.

— Та залын ик, кылем арын декабрь толэзе, 2011-тӥ арез Т. Борисовлы сӥзёнъя кичӧлтон сётӥм, — фестивалез сцена вылысен усьтыса, люкаськемъёслы тодазы вайытӥз Алнаш ёрослэн йырыз Сергей Токарев. — Трофим Борисов — удмуртъёслэн зэмос калык геройзы. Солы синпелет пуктон сярысь малпанэн ми кӧня ке ар талэсь азьло ӝуалским. Милемыз валазы но юрттӥзы Президент Александр Волков, Кун Кенешысь но Алнаш ёрос кенешысь депутатъёс. 2005-тӥ арын памятниклы инъет лэсьтэмын ни вал. Нош ар ортчыса — ачиз синпелет пуктэмын. Солэн авторез — тодмо скульптор Геннадий Кутлыбаев.

Сергей Токарев пусйиз, алнашъёс туж оско: Удмуртилэн шоркараз но сылоз Трокайлы синпелет. Калыклы берыктоно солэсь азьветлӥсьёссэ.

Вавожысь «Гуждор» коллектив.

Та малпанэз азинтыса, «Удмурт кенеш» огазеяськонлэн кивалтӥсез Николай Мусалимов мадиз, мар лэсьтӥське Трокайлэсь ӟеч нимзэ калыклы берыктон вылысь. Борисовлы сӥзьыса, туэ бадӟым конференция ортчиз ни. «Удмуртия» издательствоын ӝоген потоз Трокайлэн улэм-вылэмезъя, ужъёсызъя туж тунсыко книга. Нош «Удмуртия» ГТРК дася нимысьтыз фильм.

Нош кызьы мынэ Трокайлы синпелетэз Иже пуктон?

— Гипслэсь куинь метръем макет сылэ Геннадий Кутлыбаевлэн мастерскояз, — ивортӥз Николай Мусалимов. — Зэм, памятник туэ дась луыны кулэ ни вал, но Пугачёвоын шимес пуштылонъёсын сэрен уж ӝегаз. Кӧня ке нунал талэсь азьло гинэ пумиськылӥ Удмуртилэн Президентэныз. Александр Волков кылзэ сётӥз: вуоно арын синпелетэз одно ик пуктозы. Памятниклы оглом 3 миллион манет пала кулэ  луоз.

 

«Крезь но вылын си вера…»

Трокайлэсь ӟеч нимзэ калыклы берыктон ужын пыд пуктӥсьёс шедё. Сыӵе учырез шараятэк ӧз чида нациосын ужан политикая министр Владимир Завалин. Республикамылэн кивалтӥсьёсызлы Алнашысь одӥг адямилэсь гожтэт вуэм: Трокаез, пе, ӝутоно ӧвӧл. Паймоно кадь, калыкмы пӧлын татчыозь вань на Борисовез сьӧдманы тыршисьёс.

Фестивале пыриськиз мӧйыез но, пиналэз но…

— Трофим Борисов — со Алнаш музъемлэн гинэ ӧвӧл, вань удмурт калыклэн героез! Удмурт Элькунмес кылдытӥсь. Сыӵе визьмо, сюлмо азьветлӥсьмы сярысь мед тодозы бигеръёс но, поръёс но, шаерамы вань улӥсьёс, — ӝот-ӝот пусйиз Владимир Николаевич. — 1928-тӥ  арын  адямиез токма янгыше уськытыны, сьӧдманы кема ӧй вал. Туннэ синмын учкыса, тае валано но зэмос азьветлӥсьёсмес дунъяны быгатоно.

«Трокай» фестивале лыктэм коллективъёс сцена вылэ огзы бӧрсьы огзы пото. Уноезлэсь сюлэмзэс позыртэ Шаркан ёросысь сузэръёслэн Лейла но Милана Захваткинаослэн кырӟамзы. Соосты вошто Глазовысь кырӟасьёс: «…Ми ум вераське, кыл вера, крезь но вылын си вера…» Таос бӧрсьы потӥзы асьсэос крезьчиос — Вавож ёросысь «Гуждор» коллективе ветлӥсь нылкышноос крезен шудо, лэймыт кырӟало. Вавожъёсты вошто Кизнер ёросысь нылкышноос. Таосыз сцена вылын куно но пумитало, кырӟаса-вераса киужен но выро, киосазы чингыли кутыса экто.

Фестивальлэсь тугокозэ пунӥзы на Алнашысь «Вуюись», Вотка карысь «Купанча», Пичи Пурга ёросысь «Вубуртчин», Шарканысь «Инвожо», Можгалась «Капчи мылкыд», Дэриысь «Вуюись», Балезиноысь «Родные напевы», Селтаысь «Забавушка», Уваысь «Азвесь», Киясаысь «Ашальчи», Можгалась «Бутьмар» ансамбльёс.

Та нуналэ ик ӝыт фестиваль азинскиз Асан гуртын. Татысь культура юртэ вуизы Грак, Сюмси, Як.-Бӧдья, Сарапул ёросъёсысь коллективъёс. Т. Борисов сярысь вакчияк мадиз солэн ӵыжы-выжыез Раиса Корепанова. Нош ансамбльёс быгатэмзэс возьматӥзы, ог-огенызы матэгес тодматскизы.

Йылпумъянъёс лэсьтыса, вань коллективъёс пусъемын «Трокай» фестивальлэн нимысьтыз дипломъёсыныз. «Удмурт кенеш» огазеяськонлэн кивалтӥсез Николай Мусалимов пусйиз, таӵе ужрад ортчылоз азьланяз но. Трокай Борисов сярысь тросгес адями мед тодоз, солэсь мытэм ужзэ дунъяны но данъяны мед быгатомы.

Елена Миннигараева. 

Туспуктӥз Виталий Кондратьев.

Удмурт Дунне
By Удмурт Дунне 5 октября, 2011 08:28