ӧръяськиз ук мылкыды!

Удмурт Дунне
By Удмурт Дунне Октябрь 5, 2011 08:49

Аслэсьтым удмурт луэмме пичи дырысеным ик шӧдӥ. Анай-атае удмурт сямен гинэ вераськизы. Азьвыл Алнаш черкогурт кык колхозлы люкиськемын вал: удмуртьёслэн «Мотор», ӟучъёслэн «Безбожник». Ӝӧк улэ пыдын ветлыкум ай, анае курдатоз вал: «Эн бӧрд, тани ӟуч пыроз но пельдэ вандоз». Кышкаса бӧрдэмысь соку ик дугдылӥ. Школаын дышетскыкум, витетӥ классысен умой дышетскеме понна ӟуч классэ пуктӥзы вал, но  куинь нунал ортчыса, берен удмурт классам берытски.

Туж яратылӥ но яратӥсько удмурт кырӟанъёсыз, соин ик хоре ветлылӥ. Школаез йылпумъяме бере Ижысь пединститутлэн удмурт факультетаз дышетскыны пыри. Со дыре агае — Геннадий Красильников писатель — Москваын Литературной институтын дышетскиз ни, солэн самой пыд вылаз йыг-йыг султон вакытэз вал. Удмурт кылын нырысь гожтэм книгаоссэ со мыным кузьмаз. Бадӟым шумпотон пыӵатылӥз сюлэмам книгаосыныз, уго отысь мон адӟылӥ анаелэсь но атаелэсь, озьы ик алнаш калыклэсь образъёссэс. Пайми, быдэс Европа огшоры удмурт калык сярысь тодоз шуыса — агаелэсь произведениоссэ ӟуч, молдаван, украин, чех, киргиз, венгер но мукет кылъёсы берыктӥзы.

Алнашын кивалтэм улсаз данъяськымон удмурт хор вал, соин кивалтӥз Пётр Николаевич Кубашев, мон отын кырӟанъёсты мытылӥ. «Аннок» пьесаын валтӥсь ролез шудӥ.

Озьыен, Дэри ёросэ мон тып-тып удмурт адями луыса лыктӥ. Берло 20 арзэ трос тырши город котырысь районын удмуртлыкез азинтон понна. Таиз но капчи уж ӧй вал: ӟучомем калык но, кивалтӥсьёс но удмуртлыкез дунъяны ӧз валаллялэ.

Ёрос газетлэн редакторез но партилэн райкомезлэн секретарез луыса ужакум, тросгес ӟуч кылын вераськоно луылӥз. Но удмурт дояркаос яке механизаторъёс доры вуылыкум, одно ик удмурт сямен вераськыны тыршылӥ. Соос туж шумпото вал анай кылын вазиськемлы, кыӵе ке матысь эшенызы кадь монэн кенешылӥзы.

Партилэн райкомаз ужакум ик, валай: кыӵе умой луысал, удмурт кыл но, ӟуч сямен ик, государственной луысал ке. Но со сярысь соку кылпум но поттылыны ӧм дӥсьтылэ. Мон вылэ чагиськонъёс гожъяны  кутскизы,  райкомлэн секретарез, пе, ӟучъёсыз но бигеръёсыз уг гажа, удмуртъёсыз гинэ вылӥе ӝутыны выре. Со чагиськонъёсын валче ик райкомысь кошконо луиз. Лэзизы монэ нош ик редакцие ужаны. Соку выль удмурт «Ӟардон» газет   поттыны   кутским.

Ёросын кылдӥз удмурт лулчеберетъя «Чагыр дыдык» общество. Ну, ӧръяськиз ук мылкыды: кыӵе но удмурт ужрадъёс ӧм ортчытъялэ, кытчы но ӧм вуылэ! «Вуюись» ансамблен  потамы Увае, Дэбесэ, Башкортостанысь Татышлые  куное вуылӥм. Вашкала удмурт сямъёсыз бугыртӥм — «Сюан», «Армие келян», «Нуны сюан», «Корка пырон», «Удмурт ӵушкон» но мукетъёссэ. Элькунысь одӥг ужрадэз но ӧм кельтылэ.

Дас ар мон «Чагыр дыдык» дэменлыклэн кивалтӥсез вал, туж шуныт мылкыдын али но тодам вайисько со аръёсыз. Собере огазеяським «Удмурт кенешен», солэн липет улаз пырыса, улонмы мукетгес луиз. «Удмурт кенеш» уго политика бордын но ужаз.

Удмуртъёслэн кӧня съездзы, удмурт нылкышноослэн, культурая обществоослэн  кӧня конференциоссы ортчылӥзы — ваньмаз вуылӥм, делегацимы самой бадӟымез но чеберез луоз вал: котьку удмурт дӥсен, кильтырес чырты весьёсын ми отчы ветлылӥм.

Котькуд калыклэн улоназ самой кулэез — анай кыл. Кыл ке быре, калык но ыше. Тау Инмарлы, Удмурт шаерын кылъёс сярысь закон кутыны быгатӥм, но тросэз ужпумъёс озьы ик бумага вылэ гинэ кылизы. Юнме-а Фин-угор калыкъёслэн конгрессазы Финляндиысь тодосчи шуиз: удмурт кыл та дыре гур азь палан вераськон кыл гинэ луэ. Татын асьмеос янгышесь. Бигеръёс туж быгатыса утё асьсэлэсь кылзэс, нош асьмеос, удмуртъёс, соос вӧзын туж лябесь. Ёросамы чылкыт удмурт школаос ӧвӧл, тросэз удмурт гуртъёс ӟучомизы. Я, гуртъёслэсь нимъёссэс удмуртэ берыктӥмы, отын но кӧня ке янгышъёсыз вань.

Мон туж данъяськисько, удмурт шуыса, та югыт дуннеысь мон кошко быдэсак удмуртэн. Но тау карисько ӟуч кылэз но умой тодэмелы, со монэ дуннеысь лулчеберетэн тодматӥз. Кык кылэз тодӥсько, мон узыр адями.

Мария ИШМАТОВА,

Дэри ёрослэн дано муртэз.

Удмурт Дунне
By Удмурт Дунне Октябрь 5, 2011 08:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<