Циркысь — зоопарке

Удмурт Дунне
By Удмурт Дунне 4 октября, 2011 07:26

Циркысь — зоопарке

Шаерысьтымы пенсионеръёс, ужысь но ожысь ветеранъёс Арлыдоослэсь калыккуспо нуналзэс 3-тӥ октябре кун циркын пусйизы. 2003-тӥ арысен ини вань городъёсысь но ёросъёсысь арлыдоослы Президентлэн Александр Волковлэн нимыныз ӧтён билетъёс вуо. Ветеран огазеяськонъёс, калыкез улон-вылонын утён ёзъёс пыр та аръёс куспын циркысь усточиосын трос сюрс адямиос тодматскизы ни.

Котьку сямен ик, арлыдоослы тау карон кылъёсын вазиськиз Александр Волков. Тодматӥз, мар лэсьтэмын но мар чакламын азьланезлы пенсионеръёслэсь, ветеранъёслэсь улон-вылонзэс капчиятон понна.

Шаерамы 413 сюрс пала пенсионеръёс уло. Россилэн но республикалэн бюджетъёсысьтызы арысь аре тросгес коньдон висъяське арлыдоослэсь улонзэс капчиятон понна. Кылсярысь, кылем арен ӵошатыса, фронт мышкын ужамъёслы, ужысь ветеранъёслы социальной юрттэт висъямын 1 миллиард 578 миллион пала — 9,7 процентлы ятыргес. Улон инты но коммунальной услугаос понна кыкетӥ арзэ юрттэт коньдонэн висъяське. Озьы ик кельтэмын транспортын дунтэменгес ветлон дун.

Арлыдоослы бадӟым юрттэт висъяське калыклы юрттэт сётонъя центръёс пыр. Вуоно арысен ЦСО-ос ужзэс выль сямен радъяны кутскозы, уката но тросгес юрттэт висъяськоз. Палэнэ уз кыле инвалидъёс но. 2011-тӥ-2015-тӥ аръёслы нимысьтыз программа кылдытэмын соослэсь калыкен герӟетсэс паськытатон понна. Шаерысьтымы городъёсын кылдытэмын «Социальной такси» служба. Солэсь ужзэ радъян понна Ижын висъямын 400 сюрс манет, шаерысьтымы мукет городъёсын — быдэн 100 сюрс.

Вунэмын уз луэ кема дыр ӵоже ӵош улэм кузпалъёс. 2012-тӥ арысен зарни аръёссы пусъемын луозы 3 сюрс манет коньдонэн, туэ февральысен 2 сюрс манет коньдон висъяське.

Арлыдоослы тау карыса но ӟеч тазалык сӥзьыса, Александр Волков озьы ик пусйиз, та арня вискын вань пенсионеръёс дунтэк вуылыны быгатозы Удмуртиысь зоопарке.

Лия Малых.

Удмурт Дунне
By Удмурт Дунне 4 октября, 2011 07:26