Уж дурын пӧсялод, калык пӧлын данъяськод

Удмурт Дунне
By Удмурт Дунне 7 октября, 2011 09:43

Уж дурын пӧсялод, калык пӧлын данъяськод

Президент Александр Волков Сьӧлта ёросысь фермерлэсь Сергей Эшмаковлэсь чечызэ шӧмъя.

Толон Операя но балетъя кун театрын ортчиз сиён-юон поттон удысын ужасьёслэсь нуналзэс пусъён.

Театре тросаз калык люкаськиз. Вань ёросъёсысь потребобществоослэн, хозяйствоослэн, предприятиослэн ӝӧкъёссы сиён-юонэн тырмытэмын. Маиз гинэ ӧвӧл. Но ваньмаз удмурт шӧм пыӵамын: пельнянь, перепеч, шаньги, кокрок но мукет пыжиськемъёс. Можгаос но кезъёс дэмлало сыр, сюмсиос — губи, каракулиноос — чорыг. Котькуд ёрос дорын шулдыръясько гуртысь вуэм ансамбльёс.

Удмуртилэн Президентэз Александр Волков но мукет вылӥ кивалтӥсьёс котькуд ӝӧк доры дугдылӥзы, ӟечкылазы праздникен, ушъязы ужамзэс но пӧрамзэс, сӥзизы шудбур но тазалык.

Гурт удысъя но сиён-юонъя министр Алексей Стрелков тодматӥз сиён-юон поттон удысысь югдурен. Собере кутскиз азьветлӥсьёсты ӟечкылан.

— Шуг-секытъёс эшшо но юнмато но кыдато музъем бордын ужасез, — пусйиз Президент Александр Волков. — Тӥляд ӟеч тыршеменыды, туэ трос пудо сиён дасямын но бусьтыр ю тысь бичамын.

Со сюлмысьтыз тау каремзэ вераз сиён-юон будэтон но поттон бордын ужасьёслы. Республикаысь агропромышленность удысысь ветеранъёс сӥлы каремын дано нимъёсын, грамотаосын.

Нош туэ пӧртэм удысъёсын вормисе потэмъёс: ёросъёс, гурт предприятиос, крестьян-фермер хозяйствоос но нимаз ужасьёс — пусъемын дипломъёсын но коньдон премиосын. Дан тыныд, нянь будэтӥсь!

Вормисьёслэсь нимъёссэс тододы 3-тӥ бамысь.

Иван Аркашев.

Туспуктӥз Владимир Беломорских.

Удмурт Дунне
By Удмурт Дунне 7 октября, 2011 09:43