Удмурт чечылы — удмурт пус

Удмурт Дунне
By Удмурт Дунне Октябрь 18, 2011 09:37

Ижысь адӟытонъёсъя «Удмуртия» центрын ортчиз ярмарка. Туэ со куатетӥез луиз ни. Адӟытон-вузаськонэ пыриськиз Россиысь но Украинаысь 145 предприятие.

Правительстволэн Тӧроезлэн воштӥсьёсыз Владимир Перешеин но Александр Коробейников, ярмаркаез усьтыкузы, пусйизы солэсь рынокын аслэсьтыз интызэ шедьтэмзэ, сиён-юонъёслэсь но мукет вузъёслэсь ӟечгес луэмзэс, вуз каронлэсь улосъёс куспын ӧръяськемзэ.

Асьме республикаысь бадӟым предприятиос пӧлысь сиён-юонъёссэс дэмлазы Дэриысь тепличной комбинат, Воткаысь, Уваысь, Дэбесысь сӥль комбинатъёс, «Играмолоко», «Овен», «Дулесов» предприятиос, Воткаысь сур завод но мукетъёсыз. Дӥськут поттӥллям «Сактон» но «Зангари» предприятиос.

Мукет интыосысь вуэмъёс пӧлысь асьме басьяськисьёс ӟеч тодо ни Йошкар-Олаысь сӥль комбинатэз, Пензаысь сур но юзмыт ву поттӥсь «Очаково» заводэз, Костромаысь «Льняные узоры» компаниез но мукетъёссэ.

Но вань чылкак выль вузъёс но. Тани Башкириысь «Актирман» эштос дэмла тысез удатыса дасям сиёнъёс, нош Свердловск улосысь «Пеллайн» предприятие — зарезь турынъёслэсь косметика.

Паймытӥзы нимаз адямиослэн ужъёссы. Казаньысь Олеся Мустаева ческыт зыно майтал пӧзьтэ. Нош Уралысь кибашлыос селенитлэсь но мукет изъёслэсь чеберъяськон арбериос лэсьто.

Озьы ке но таяз ярмаркаын, азьвыл аръёсы сямен ик, нырысетӥ интыын вал чечы, солэсь вузъёс. Пӧртэм интыосысь муш вордӥсь 22 хозяйство вуз кариз. Тужгес но трос мушкасьёс вуэмын вал Алтайысь, Сибирьысь, Башкириысь, Киров улосысь но Удмуртиысь.

Сьӧлта ёросысь фермерлэн Сергей Эшмаковлэн туж бадӟым сюлмаськонэз удмурт чечылы пус малпан пумысен.

— Мон пичи дырысеным мушъёс котырын бергасько. Пересь атай бордысен кутскыса, милям выжымы ялан муш вордэ, — шуэ со. — Пӧртэм эскеронъёс возьмато: асьме чечы номырин уг висъяськы мукет интыосын бичамлэсь, нош ӵем дыръя умойгес но луэ. Но калык тросгес люкаське Башкириысь, Алтайысь ваем чечы котыре. Ӝутоно асьме чечылэсь данзэ.

Иван Аркашев.

Удмурт Дунне
By Удмурт Дунне Октябрь 18, 2011 09:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<