Тятяе визьбурлы дышетӥз

Удмурт Дунне
By Удмурт Дунне 4 октября, 2011 07:44

Тятяе визьбурлы дышетӥз

Быдӟым ож вакытысь нылпиос - О. Смагиналэн (шорысез) нырысьсэ дышетэм пиналъёсыз. 1948-тӥ ар.

Ольга Николаевна… Кыдёкысь пинал дырысь шуккиськись куара. Нырысетӥ дышетӥсе. 50 ар талэсь азьло ми сое нырысьсэ тодӥм. Пӧртэм гуртъёсысь чыры-пыры пиналъёс, оло, 40 кузя люкаським классэ. Нодъясьмы — сьӧдкысъем чебер кышномурт: сьӧд дэремен, тӧдьы воротникен.

Дышетӥз со тодманы,

Мар со мел, тетрадь, ручка…

Пӧсяса ик тыршимы —

Ки лэсьтэ, нош син кышка.

Можга ёросысь Пазял школаын 40 арлэсь кема ужатозяз, О. Н. Смагиналэн покчи классъёсын дышетэм нылпиосыз 400-озь но вуизы, дыр. Туэ толсуре дышетӥселы 83 арес тырмоз. Ас улоназ со котьмае тырмыт омыръяз: пӧсьсэ но, кезьытсэ но, шӧгзэ но, кузьытсэ но.

— Азьлон, нылпиоссы удалтымтэен, тылобурдоослэсь нимъёссэс тыро вылэм. Мынам тятяе, Николай Вагинов, озьы Быркыт луэм, сузэрез — Дыдык. Тятяе 82 аресозь улӥз, мамае — 76-ёзь. Ньыль пиналъёссы вал. Мон первоез, начар вордскиськем. Куло кожаса, Ӟумьялась ныл вайиллям. Анна мынэсьтым кык ареслы бадӟым. Вавож ёросысь Тыловыл-Пельга школаын ужаз, отын ик бызиз. Бӧрысь Эгралан Нина нылыз дорын улӥз. Алигес гинэ, 85 аресаз, кулӥз. Ми, нылпиос, ӵошен гинэ вал ай, семьямес кулаке поттӥзы.

— Марды сокем вал, кулаке поттымон?

— Ваньмыз — асьме кужымен шедьтэм маке. Кык коркамы — пичиез но бадӟымез, маслобойкамы, валъёс, скалъёс, ыжъёс, парсьёс… Ваньзэ нуизы, дӥськутэз но. Пызез но ӵужыса поттӥзы. Номыртэк кельтӥзы. Бадӟым коркамес школалы пӧрмытӥзы, ми пичияз кылим. Тятямес Москвае келязы, отын ог куинь ар сюрес лэсьтонын ужаз. Бертэмез бере колхозэ пыроно луиз: активистъёс ветлыса, кужмысь каризы. Со церковно-приходской школаын дышетскемын вал, похвальной грамотаен йылпумъям. Сельсоветын ужаз. Войнае но сюриз, соку ик басьтӥзы. Отысь 1944-тӥ арын контузия бере вуиз ни. Колхозын конюхын но вал. Пумен ужаса-ужаса, ваньбурмы нош люкаськиз. Тятямы милемыз ужаны зол дышетӥз.

— Эмеспиды Олег Четкарёв «Нуналэз воштэ нунал» веросъёсын повестяз визьмо Быркыт песятаез суредаз. Тусбуез но, сямыз но син азе умой пуксе.

— Улонын визь-нодлы дышетӥсь вал со. Бертӥськод — шудыны маза уг сёты. Пу вандӥськод: ӵыж-ӵаж, ӵыж-ӵаж… Пуклёк вылэ копейкаос тыре: таиз вылэ сомында поныса, кӧня луоз, пе… Нош люкид ке, унояд ке… Внукъёссэ но мыло-кыдо будэтӥз, визьбур борды кариз. Бадӟымез, Таня нылы, соослэн корказы быдэсмиз.

— Семьяысьтыды йӧно адямиос пӧрмизы. Николай братты — данъяськымон: соку гуртамы вылӥ дышетскем юристъёс но ӧй вал ай.

— О-о, Коля выны юрист, прокуратураын ужаз. Нырысь ветеринаре дышетскиз вал. Бадӟым Учалан вить аръёс улӥзы, кышноез гинеколог вал. Собере весь Пермьын улӥзы. 1990-тӥ арын Николай братэ кулӥз, кышноез Зоя Григорьевна табере Эстониын Оля нылыз дорын улэ, таиз но врачын ужа.

Юля сузэре но, Ю. Н. Борисова, туж мыло-кыдо, йырвизё адями, «Россия» колхозын бухгалтерын, собере страхованиея агентын ужаз. Тимофей картэныз куинь визьмоесь пиналъёс будэтӥзы. Владимир пизы юрист, Коля агаезлэсь сюрессэ быръем. Со али Вавожын судья луыса ужа.Оля географияя дышетӥсь, Можга карысь 6-тӥ школаын завуч вал. Николай тужгес секыт аръёсы «Родина» СПК-ен кивалтӥз.

— Лыдъян-чотан борды кыстӥсь-кемды ик педучилищее вуттӥз-а?

— Со йырез тӥян воксё но мыным уг кельшы вал. Луӵӵе лыдӟиськысал. 6-тӥ классысен умой дышетскеме понна «Поднятая целина» книга кузьмазы, оброс канаын но сое вози. Кузьымме басьтыны ӧтьыкузы, нокызьы уг потӥськы — сыӵе керпотӥсь мон вал.

Нырысь ай ми Нене Валя эшеным медучилищее мынӥм. Учким но — ойдо, шуэ, кошком, тӥни нылъёс кыӵе чебер дӥсяськемын, лёго туфлиосын. Кызьы тубат улын сылӥм, озьы ик кошким. Бертӥ но — мамае тышкаське: ми сямен колхозын курадӟыса улэмед потэ-о, мар-о… Вагинова Оля эшеным (кыкмы но огкадь нимтуло) педучилищее мынӥм. Со 1944-тӥ арын вал, тятяе ӵапак войнаысь бертэмын, со ик дышетӥсь луыны ӝутказ. Пединститутэ кылчие дышетскыны пыреме потэ на вал, тятяе ӝотрак шуиз: кин та сузэр-братъёстэ будэтыны юрттоз? Сюлэмы ик чигиськиз.

— Бадӟымезлы семьяын котьку тросгес секытэз усе. Кӧня арескын ужаны кутскиды?

— Дас арес ӧй вал ай. Син азям пуксе: мон арасько, арасько… Нош Юля сузэре (со тямыс ареслы пичи) суслон вӧзын пуке. Уриськон, етӥнан, шеп бичан… Валэн усыянэз но адӟиськиз, тракторъёс ӧй вал ук. Со гинэ мар ай. Война дыръя, валъёс ӧвӧлэн, скалмес кыткиськом, соин пу нуллӥськом, куро вайиськом. Педучилищеын но пу вандыто вал, вить кубометр — норма. Анна сузэре но, Мирон Семён дедэ но юрттылӥзы, таиз 85 аресозь улӥз.

— Кузебай Гердлэн секыт ужысь адӟемез уг поты вылэм дышетӥсьёсыз, йырвизьзэс будэтыны дырзы трос мед луоз шуыса сюлмаськем…

— Озьы гинэ луысал ке… 1948-тӥ арын педучилищеез быдтӥ но, куашкам колхозъёсы лэзьязы, пиньёс ваче йыгасько вал кынмыса. Кот дӥськутэн лымы вылтӥ  етӥн ишкиськод, юэз араськод. Каникулэ бертыса но, оград кыдёкысь тэле, Вавож ёросысь Какможе, ыстӥзы.

— Пинал, чебер ныл, кызьы тӥ мукет гуртэ ӧд кугӟалэ?

— Николо-Сюга детдоме лэзизы вал. Одӥг уй кӧлӥ но кошки. Толэзь-кык улыса, Пазял школаямы ик интыяськи. Но выль директор вуиз но, кышноезлы инты кулэ луиз. Монэ ёросысь пӧртэм школаосы лэзьяны кутскизы. Озьы 1950-тӥ арозь.

Нырысь ик Пазял школаямы ужась дышетӥсез яратӥ вал, но соин люкиськоно луи. Мукетыз мыным синмаськемын вылэм, Михаил Смагин. Можгалан ветеринаре кык ар дышетскытозяз, 25 иськемез весь ӵош, пыдын ветлӥськом вал — эшъёс сямен. Котомка секыт, весь сиён нуллӥськиз. Карточкая 500 грамм нянь сёто ке, черодын сылэм бере ик быдтӥськод. Сэре котьмае си… Собере Миша армие ветлӥз. Со счетоводэ но дышетскемын, паськыт профилен тракторист но вал. Мон солы бызьыку, комбайнэн ужаз. 1955-тӥ арысен ӵош улыны кутским.

— Тодэмея, тӥ асьтэос но весь колхозын ужалляды?

— Ма, зэм, школаын сяна, весь колхозын но ужай. Гужем 56 нунал отпуск сёто ке, куинь нуналзэ гинэ коркан пукисько, кылемзэ колхозэ потасько вал. Миша вӧзын пастухе но, стороже но кариськылӥ. Озьы ик ӵош турнаны ветлылӥм. Колхозэ потаськод ке, садике нылпиез нуыны луэ, уд ке — уг луы вал.

— Одӥгез кузпал колхозын ужаса вылысь, сыӵе чурыт курон?

— Озьы вал. Тани син азям пуксе. Мон ныпъетэн нуллӥсько Нинаез. Возь вылысен зыбкае понӥсько, ваментӥз керттӥсько, думисько. Яке валесэз маке ӝужда карисько но, отын пуке бертытозям. Куинь но, ньыль но кузя коркан замокаса кыльылӥзы: Валя, Коля, Надя, Нина. Гурын ӝу но кельтэмын, кызьы соин ӧз шудэ. Чакланы бертылыны дыр ӧй вал.

— Нош утисьёс-песянайёс ӧй вал шат?

— Картэлэн анаез, нонтыны шуыса, Валяез школае нуллэ вал. Тазэ нылме со утялтӥз ик. Собере ми яна потӥм, нош солэн дораз воземез потэ вал — трос ӧз ветлы ни. Нылпиосме утьыны шуыса мамае лыктэ — сое лобатэ, ачиз но кошке… Кык нянькаед вань вылысь озьы курадӟиськод шуыса, весь жаля вал Варвара Давыдовна Иванова дышетӥсьмы.

— Иське, 1960-тӥ аръёслэн кутсконазы, милям классэнымы ужакуды, ёрмон-курадӟон вакытты вылэм. Ымнырады гожтэмын ӧй вал, ми, пичиос, мае валалом.

— 1964-тӥ арын Миша пие вордскиз. Пыд йылазы султэмъёссэ гинэ яслие басьто. Мишук сьӧрам школае но ветлӥз, партаос ултӥ, пыд ултӥзы но бызьылэ вал. Бадӟымъёсызгес нылпиос пичиоссэ утялтӥзы ини. Озьы ке но сизьыметӥ пиналме, Вовикме, утеме ӧз луы, со укмыс толэзьем, диван дуртӥ ветлэ вал ини. Ужаны кошки, висись мае ке кельтыса… Тыоссэ кынтэм…

— Азьвыл классъёс но бадӟымесь вал ук ай, 30 муртлэсь ортчылӥз. Сомында нылпиен ас пиналъёстэс учкыны дыр кытын тырмоз на.

— Ма, ӵукна 8 часлы ик кошкиськод, ӵемысь — дежурной. Школаын — 3-4 часозь, акшан дырозь, бере кылись пиналъёсын пукиськод. Нош визь ӧвӧл ке, котькӧня дышеты. Мон ӧй кесяськылы, но дисциплинае юн вал. Одӥг ар гинэ ёрми, пиос трос вал классам. 1962-тӥ арын вордскемъёс. Перемена дыръя борддорез ик пасяло, собере асьсэос ик тупатъяло. Урокын бон кылзӥсько вал соос. Классэлы оскытэк, оград роноысь инспектор переменаосын но пукиз, пение урокез но ӧз кельты. Собере педсоветын верам: мон, пе, ӧй малпа вал, Ольга Николаевна урокъёссэ сыӵе ӟеч ортчытоз шуыса.

— Милям классамы но парта вылтӥ бызьылӥсьёс вал, огзэ пияшез Пиурод гинэ шуылӥм.

— Эрказгес вал уго, но дышетсконын бере ӧз кыльылы. Таӵеез но вал. Классэ пырыны уг лэзё — ӵогаськиллям. Огез «атаман» пи лябъёссэ шымыръя, полевой сумкаен шонаське. Мон шоры но: тонэ но шукко, ӧкӧ. Соку ачим но куалекъяй… Одӥг классын кык-куинь ар пукись пияшен курадӟеме тодам лыктэ на. Завучмылэн кышноез (солы инты кулэ вал) замок пасетӥ учкыса, мар ужаммес чакла но чагиське вылэм.

— 1948-тӥ арын педучилище бере ужаны кутскиды но, ӵапак 1940-тӥ-1941-тӥ аръёсы вордскемъёс классады сюриллям.

— Аслым но 16 арес гинэ вал соку. Ой, кыӵе кышкай… Уроклэсь мынэмзэ котькуд кылзэ ас поннам гожъяй. Со первой дышетэмъёсы Соловьёв Аркаш, Чернов Петя, Лукоянов Семи но мукетъёс вал. Начар улон, ёрмон шоры учкытэк, таос шулдыресь-капчиесь вал, арган но, кырӟан но отын ик. Дышетскисьёс пӧлысь кинэ ке висъяса ӧй улы, озьы ик шуылӥзы: тынад «любимчикъёсыд», пе, ӧвӧл. Но син азям тросэз уло, кин но соос ӧз луэ…

— Али вераны быгатӥсько: мыным удалтӥз. Ми школае мынытозь, 1961-тӥ арозь, покчи классъёсын весь экзамен вылэм, нош ми дыръя ӧй вал ни. Удалтӥз мыным дышетӥсен но: лад-лад, чебер, зэмлыкез гажась. Ӵемысь монэ «5»-ёсын шумпоттылӥды. Одӥг пол гинэ «кол» басьтыса бӧрдэмме  тодӥсько. Улонэ укно усьтэмды понна тау тӥледлы, Ольга Николаевна.

 

* * *

Мон тужгес кыжмем адями ини, шуиз Ольга Николаевна, люкаськем аръёссэ малпаса. Озьы ке но… Сыӵе «кыжмемлэн» но аслаз пиштэтъёсыз вань. Со медальёс:  Быдӟым ож вакытэ тыршемез, собере ветеран луэмез возьматӥсь. Со сяна, О.    Смагиналэн вань II но III степенё Анайлык медальёсыз. Нылпиоссэ ушъяны луоно. Татьяна Четкарёва «Удмуртия» книгапоттонниын редакторын ужаз, Россиысь огъя тодон-валан сётон удысысь дано ужась. Николай Смагин — Удмурт Республикаысь дано юрист. Валентина Санникова Пазялысь нылпи садэн кивалтэ. Надежда Кузнецова — татысь ик библиотекаен. Нина Ермакова Вавож ёросысь «Удмуртия» хозяйствоын пудо вордонын тырше. Михаил Смагин пинал дырысен ас вордскем дораз техника борды бурмемын, али КамАЗ-эн ужа. Нунокъёсыз Ольга Николаевналэн 15 люкаськизы, таослэн пичи нуныкайёссы 9 кузя ини. Быркыт Миколайлэн туала пушъетэз паськыта: будӥсьёсыз пӧлын 4 юристсы, вань эмъясь, суредась, историк, инженер, эколог…

Татьяна Чернова.

Удмурт Дунне
By Удмурт Дунне 4 октября, 2011 07:44