Туалаез сьӧры уйиськон

Удмурт Дунне
By Удмурт Дунне 28 октября, 2011 08:07

Туалаез сьӧры уйиськон

Вуоно арысен Россиын улӥсьёслэн кисызы узырмоз эшшо одӥг документэн — универсальной электрон карталы (вакчияк вераса, УЭК). Вылтусын со кельшоз банкъёслэн пластик картаоссылы, но со борды юнматэм чип вылын гожтэмын луозы адямилэн кытын вордскемез но улэмез, кыӵе интыын тыршемез яке дышетскемез, кытын но кыӵе солэн ваньбурез но мукет. Зэмзэ вераса, таӵе картаосты кемалась уже куто ни Европаысь азьмынӥсь кунъёс, Америка. Озьы ке но юанъёс кылдо ик: малы выль карта кылдытонэз, паспортмы но мукет документъёсмы киямы вань ке?

Электрон картаосты улонын эскерон борды кӧня ке ар талэсь азьло басьтӥськизы Россиысь 22 улосъёс. Кылсярысь, Татарстанын улӥсьёс солы дышыса вуттӥзы ни. Табере вуоно арысен Россиысь котькуд адямилэн луонлыкез кылдоз таӵе картаез басьтыны. Мар бордын солэн кулэлыкез?

Андрей Прокошев, информатизацияя но связья министрлэн воштӥсез:

— Калык ялан ӝожтӥське, пӧртэм справкаос утчаса, отчы-татчы вазиськоно луэ шуыса. Вань документъёсты шедьтыны, валамон, дыр но кужым кулэ. Ӵапак кун услугаосты сётонэз капчиятонэн ик герӟаськемын электрон картаослэн кулэлыксы. Шуом, студентлы деканатъёстӥ бызьылоно уз луы, со студент шуыса справка басьтон понна — та ивор луоз солэн пластик картаяз. Яке мукетыз учыр: Интернет пыр кыӵе ке огкыл гожтоно — со понна кулэ тӥляд кинюртэмды. Татын но юрттоз картады, угось отчы пуктэм кинюртэмез басьтыны луоз электрон амалэн.

УЭК воштоз эмъяськон полисэз — отын ивортэмын луоз адямилэн тазалыкез сярысь но. Озьыен, одӥгысьтыз мукетаз эмъяськонние, справка бичаса, ветлонэз уз луы. Электрон карта пыр ик адямилы сётӥськоз эмъяськонние направление. Со сяна, УЭК пыр вырыны луоз коньдон ужпумъёсын. Отчы вуоз студентлэн стипендиез, пенсионерлэн — пенсиез, ужась муртлэн — уждунэз, пособие басьтӥсьлэн — пособиез но мукет. Со картаен  пӧртэм вуз басьтыны, транспортын ветлэм понна уксё тырыны луоз. Карта пыр уксё яке, кыӵе ке юрттэт басьтон понна шаерамы пуктылэмын луозы нимысьтыз автоматъёс — инфоматъёс.

Пусйыны кулэ: электрон картаосты кужмысь басьтыны косӥсь уз луы. Сое лэсьтон мытэмын луоз адями куриськон гожтэм бере гинэ. Дась луоз, кӧня ке нунал ортчыса.

Никита Уржумов, Информатизацияя но связья министерствоысь ивор технологиосты азинтонъя управленилэн кивалтӥсез:

— Адямиос кышкало, картае пыртэм ивор палэнэ кошкыны, пӧяськисьёс кие шедьыны быгатоз шуыса. Ӵапак та муген ик пумитъяськон мылкыдзы кылдэ. Пусйыны кулэ: туж бадӟым саклык висъямын вал картаосты «сьӧд киослэсь» утёнлы. Картадэс ыштӥды ке, сое соку ик блокировать карыны луоз, озьы тӥляд даннойёсты мурт кие уз сюре.

Юан кылдэ: кызьы та картаез кутоз мӧйы калык, пластик картаосты одӥг пол но киязы кутылымтэ пенсионеръёс? Соос понна радъямын луозы визь-нод сётонъя пунктъёс. Отын картаез кутонъя пыр-поч ивор басьтыны быгатозы. Арлыдоос медаз кышкалэ та карталэсь, угось ӵапак соослэн улонзы капчиялоз — эмъяськонние гинэ но со пыр гожтӥськыны быгатозы, кузь черодын сылытэк.

Рустам Идрисов, Удмурт Республикая валтӥсь федерал инспектор:

— Арлыдоос кышкало, картаез кутыны уз валалэ шуыса, егит калык курда чип вылысь иворлэсь мурт кие шедемлэсь. Но чаклалэ ай асьтэос: Интернетын нуналлы быдэ паськытгес но паськытгес вӧлмо социальной сетьёс, даннойёсын пӧртэм базаос. Отысь капчиен шедьтыны луэ адямилэсь кытын улэмзэ, телефон номерзэ но мукет. Нош асьмеос кышкаськомы законъя дасям-лэсьтэм электрон картаослэсь! Вылаз ик, отчы пыртэм ивор палэнэ уз кошкы, со пыр вань ужъёс лэсьтӥськозы адямилэн мылкыд каремезъя. Мон малпамъя, туала улонлэсь, технологиослэсь бере кылёно ӧвӧл. Соос калыклэсь улонзэ капчиятыны кылдытэмын.

 * * *

Кытысь басьтыны луоз таӵе электрон картаосты — Информатизацияя но связья министерствоысь специалистъёс вераны уг тодо на. Электрон картаос сярысь законлэсь проектсэ туэ ар пумозь эскерыны кулэ Кун Кенешысь депутатъёс. Соос ик решение кутозы та картаосты сётъян сярысь. Вуоно арын программа улонэ пыӵалоз. Таӵе курон улосъёс азе пуктӥз федерал центр.

Елена Никитина. 

Удмурт Дунне
By Удмурт Дунне 28 октября, 2011 08:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<