Тодӥсь мурт киын улон берга

Удмурт Дунне
By Удмурт Дунне 4 октября, 2011 07:24

Тодӥсь мурт киын улон берга

Пичи Пурга гимназиысь дышетӥсь О. Зернова.

Ольга Афанасьевна Зернова пичиысен ик малпалляз дышетӥсь луон сярысь. Озьы  со 27 арзэ сӥзиз ни нылпиосты визьноданлы. Пичи Пургалась гимназия усьтӥськем дырысен отын ужа. Директорлэн воспитательной ужъя воштӥсез луэ, биологияя но экологияя урокъёсты нуэ.

— Дышетӥсь нырысь ик пиналэз мед шӧдоз, мар солы кулэ, мед тодоз, — вера Ольга Афанасьевна. — Соку гинэ со шуыны быгатоз: мон — интыям, вань быгатонлыкъёсме, тодон-валанъёсме, сюлэмме сётӥсько кивоштӥсьёсты будэтонлы.

О. А. Зерновалэн дышетэм пиналъёсыз арысь аре шумпотто вормонъёсын. Пӧлазы вань Россиын ортчись олимпиадаосын вормисе потэмъёс. Кылем арын куинетӥ инты басьтӥзы Белоруссиын радъяськем калыккуспо ӵошатсконъёсын. Удмурт кун университетысь преподавательёс пӧлын но вань Ольга Афанасьевналэн киосыз пыр потэмъёс.

— Вазен верало вал: тодӥсь мурт киын улон берга, — ватса дышетӥсь. — Али вормон со киын, кин ӝоггес берга, быгатэ кулэ иворъёс люканы, выль амалъёсын ужаны. Соин ик компьютеръёс улонэ пыӵаны кутскем бере ик выль технологиосты дышетон борды басьтӥськи. Котькуд урокам выль ужан амалъёсты кутыны тыршисько.

Дышетӥсьлэсь тыршемзэ адӟытэк уг кельто. Со — Россиысь огъя тодон-валан сётон удысысь дано ужась, Удмурт Республикаысь дышетон удысысь дано ужась луэ. «Дышетон» нацпроект улонэ пыӵаны кутскон аре ик, 2006-тӥын, устоосыз дышетӥсьёс пӧлын конкурсын вормиз но 100 сюрс манет басьтӥз. Ольга Афанасьевна туэ нош ик та ӵошатсконын кужымзэ эскероно кариськиз. Уд но малпалэ: нош ик вормисьёс пӧлы шедиз! Дышетӥсьёслэн нуналзы азьын республикаысьтымы 100  устоосыз визьнодасьёс пӧлын со 50 сюрс манет басьтоз.

Элина Кумачёва.

Туспуктӥз Владимир Беломорских.

Удмурт Дунне
By Удмурт Дунне 4 октября, 2011 07:24