Сцена вылэ потозы Костяос

Удмурт Дунне
By Удмурт Дунне 28 октября, 2011 11:17

Москваысь Щепкин нимо вылӥ театр училищеын дышетскись удмурт егитъёсмы выжизы 3-тӥ курсэ. Вуоно артистъёс пӧлысь куд-огзэ — Костя Никитинэз, Сергей Наговицынэз, Максим Князевез — асьме учкисьёс синйылтӥзы ни «Узы-боры» фильмын.

Шаплы егитъёсты театрлэн сцена вылысьтыз калык адӟоз ай, кык ар ортчыса. Со понна мон ушъяськыны быгатӥсько: вуоно артистъёсмылэн нырысетӥ вамышъёсынызы мон тодматски ни. Кӧня ке кузя удмуртъёс вуылӥмы училищеысь концертэ. Удмурт студентъёс сётӥзы 2-тӥ курс понна актёрлэн быгатонлыкезъя экзамен.

Паймымон: Удмуртилэсь сюрс иськемлы кошкыса, ми Удмурт театрын сямен учкимы анай кылынымы спектакль. Залын пукыса, удмурт артистъёсты кылзыса, дорын кадь потоно. Но укно сьӧрын Неглинная ульча, Большой но Малый театръёс. Осконтэм кадь…

Вуоно артистъёсмы 20 кузя: 12 пиос, 8 нылъёс. Ог кык час ӵоже соос шудӥзы пӧртэм пьесаосысь люкетъёсты — бадӟым люкетэз удмурт кылын. Залын даслэсь уногес учкисьёс, анай кылмес валасез — 6 мурт. Курсысь педагогъёс, профессор Глафира Никольская сяна (нылкышно та нуналэ училищее лыктымтэ),  удмурт кылэз уг тодо. Озьы ке но дышетӥсьёс сыӵе пальпотыса, паймыса пуко — ваньмыз удмуртэсь кожалод. Курслэн кивалтӥсез — Россиысь искусство удысысь дано ужась Дмитрий Кознов.

— Та мынам 11-тӥ национальной курсэ ини, — шуэ Дмитрий Георгиевич. — Удмурт театрысь берлоез студия но мон пыр потӥз. Соосын ӵошатыса, та егитъёс туж кылзӥськисесь, дышетскисесь. Со вакытэ ик дорзылэсь мӧзмисесь — ваньмон дырзы кылдэ ке, семьяоссы доры берто. Ми туж бадӟым саклык висъяськом соослэн удмурт кылын ужамзылы. Адӟоды ни, марлы дышизы кык ар «лусъеммы» бере.

Актёръёс шудӥзы кунгож сьӧрысь но ӟуч драматургъёслэсь пьесаосысьтызы люкетъёссэс. Кинлы ке комедиысь роль шедиз, мукетыз драмаез возьматоно луиз. Зэмос театрын сямен актёръёс грим лэсьтӥзы, костюмъёсын пӧрмытскизы.

Егитъёсын мон матысь тодмо ӧвӧл. Озьы ке но туж синмаськыса учкисько Костя Никитин шоры. Со вордскемын Пичи Пурга ёросысь Эгра гуртын. Пияшен ми одӥг школаын дышетскемын — соин, лэся,  Костя мыным ӵыжы-выжы кадь потэ. Уката тодӥсько солэсь агай-апайзэ, анай-атайзэ. Костя — трос нылпиё семьяысь. Мамаен папаезлы пизэс Москваын дышетон капчиен уг сётскы, дыр. Соин туж шумпотӥсько Костялэн быгатонлыксэ усьтэмезлы. Никитин — пальпотӥсь, пежъян кадь — интыяз пукыны быгатӥсьтэм пияш. Нош режиссёр солы оскем Т. Стоппардлэн «Входит свободный человек» пьесаысь Джорджлэсь рользэ. Огласянь, выль сямен адӟи мон Костяез, малпаськон, споръяськон пыр возьматӥз со ассэ. Пьеса жанрезъя комедия луэ. Но та люкетысь серем поттӥсьсэ мон ӧй адӟы. Соин Костялы та ролен удалтэм шуыса, мылкыд ӧз кылды.

Пумтэм синмаськи Сергей Наговицынлы. Балезино ёросын вордскем пияшез мон али ик Удмурт театрысь сцена вылэ поттысал. Кыӵе зол быдэстӥз со А. Грибоедовлэн «Горе от ума» комедиысьтыз Скалозублэсь рользэ. Куараез кужмо, выросъёсыз оскымонэсь.

Будэм но йӧно луэм Шаркан ёросысь Алексей Котков. Таиз пияш пичи дыръяз ик трос гожъяськылӥз удмурт газет-журналъёсы, котькыӵе ужрадъёсын кичӧлтӥсь вал. Соин сцена вылысь адӟыны сое туж тунсыко. Котков но туж паймытӥз. Уката Чацкийлэсь рользэ быдэстэменыз. Малпаськись, вакытэзлы пумитъяськись, со дыре ик яратонэн усыкмем.

Нылъёс пӧлысь малы ке уката тодэ кылиз Марина Самсонова. Ульчаын соин пумиським  но — туж мусо, векчи мугоро, лякыт куараё нылаш. Кӧня ке востэм но потӥз со мыным. Сцена вылын Марина тодмантэм воштӥськиз. Н. Лесковлэн «Леди Макбет Мценского уезда» драмаысьтыз люкетсэ сыӵе зол возьматӥз. Татын со дусымезлы яратонзэ но шарая, адӟемпотостэм картэзлэсь но кышка, туганэныз лычсузьымон чупаське, картсэ кекатэ. Сыӵе зол характерзэ возьматӥз — паймод но тӥни!

Экзамензылэн кыкетӥ люкетаз егит артистъёс возьматӥзы классикаез — К. Гольдонилэсь «Слуга двух господ» комедизэ. Таяз огӵош пыриськизы вань актёръёс. Эктӥзы, кырӟазы, тэтчазы, паймытӥзы, учкисьёсты серекъятӥзы. Кузьмазы туж капчи мылкыд. Таиз понна мон егитъёслы бадӟым «вить» пуктысал. Нош соос лӧптыны уг дырто. Пиос танӥськытэк шуо: туннэ шудэммы дунъяськоз «куиньлэсь» кӧня ке вылӥгес. Тросгес вераськыны ӧз кылды. Концерт бере курслэн кивалтӥсез Дмитрий Кознов соосты кельтӥз янгышъёс пумысен кенешыны.

Алёна Ионина.

Удмурт Дунне
By Удмурт Дунне 28 октября, 2011 11:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<