Секытъёсты чидано

Удмурт Дунне
By Удмурт Дунне 28 октября, 2011 11:29

Секытъёсты чидано

Михаил Леконцев — Пичи Пурга ёрослэн йырыз. Михаил Тимофеевич Пичи Пурга ёросысь Депутатъёслэн кенешазы 4 созывын депутат вал.

Со сярысь вераны луоз: сабырлы, адямиен вераськыны быгатӥсь, юрттӥсь-кыны дась но котькыӵе ужрадэ пыриськись мурт.

Пичи дырысеныз спортэн эшъяське. Комсомоллэн Пичи Пурга райкомаз ужакуз но, спорт удысэн кивалтӥз. Ёрослэн йырыз луыса но, арлы быдэ Гурт шудонъёсы пыриськылэ.

— Михаил Тимофеевич, Пичи Пурга ёросысь Кечол палъёсын улӥсьёс тятядэс но мамадэс ӟеч кылъёсын гинэ верало. Кинъёс вал соос?

— Тятяе Тимофей Михайлович Леконцев Шаркан ёросысь туж шулдыр Тӥро гуртын вордскемын. Тятялэн гольык пыд бызьылэм интыосаз вуылӥськом. Но жаляса верано, со гурт быдэсак быремын ни.

Тятямы ас вакытаз агрономе дышетскем. Партилэн косэмезъя 1948-тӥ арын сое Кечол МТС-э директоре келяллям.

Нош мамамы, Анна Андреевна, Якшур-Бӧдья ёросысь Чекер гуртын вордскемын. Пенсие потытозяз, Шор Кечол школаын покчи классъёсты дышетӥз. Ми анай-атайлэн куинь пиоссы: бадӟымез Лёня, шоретӥез Юра, самой пичиез — мон.

Мамае но тятяе вӧзын.

— Пичизэ нуныятыса будэтӥзы, луоз?

— Агайёсы мынэсьтым трослы бадӟымесь вал. Соос городэ вазь кошкизы, дышетскыны пыризы. Ми мамаен но солэн Тамара сузэреныз кылимы. Тятя 1953-тӥ арын, секыт висьыса, улонысь кошкиз. Мама ялан ужын вал бере, Тамара апаймы песянай интыын улӥз ини. Со ик юртъер котырез но чакласа возиз. Мамамы улонысь кошкиз ни. 95 аресозь улӥз. Сое ватон вакытамы мыным ӵапак 60 арес тырмиз. Бадӟым кайгуэн валче юбилейме калык радъя пусйыны ӧз кылды.

Али ке но Тамара апаймы доры бертылӥськом. Толалтэзэ дорамы улыны вайиськом. Но со ми дорын кемалы уг ӝега, огназ дышемын улыны. Солы туэ 86 арес тырмиз ини.

Атайтэк будӥсь пиналлы нуныяськыны дыр ӧй вал. Ярам, агайёсы юрттӥзы. Тятя вӧзын будӥсь нылпиослы котьку но вожъяськылӥ.

Таӵе ик тодӥсько на: мон, пичи маке, доре огнам кыльыса,  тятяелэсь медальёссэ но орденъёссэ гадям бырттылыса, шудӥсько. Жаляса верано, тросэз ышизы, тӥяськизы. Табере мыным соос туж жаль пото. Михаил Петров писатель тятялэн Быдӟым оже ветлэмез но МТС-эн кивалтэмез сярысь «Быдӟым кужым» очерк гожтӥз вал. Сое 6-тӥ томаз пыртэм. Со книга мыным туж дуно, синпелет интыын возисько.

Нырысетӥ классэ ветлыкум, одӥг нуналэ коркамес тылпу гомак басьтӥз. Секыт операция бере мама соку гинэ больницаысь бертӥз вал. Тылпу пушкысь номырмес но поттыны ӧм быгатэ ни. Монэ укноетӥ куштӥзы. Пальма нимо пичи пуные вал. Оломалы со ӝытэ мон сое караз ик ворсай. Мискине интыяз ик ӝуаса быриз, дыр, шуыса, жалезлы чиданэ быриське вал. Милямез но бускельмылэн коркаосмы син азьын ик ӝуаса быризы. Капкамы гинэ кылиз на. Со но гоманы кутскиз. Со вискын олокытысь-мар ӝуась комок тэтчыса потӥз ук. Кучапиме адӟыса, сюлэмы ик оломар луиз: улэп! улэп! кесяськисько. Тылпу кысӥсьёс но ӧз быгатэ ни сое сутыны, сыӵе зол пегӟиз, кытчы ке ышиз. Со кӧшкемыт суред улытозьлы син азе кылиз. Бадӟым будыса но, тылпу потэмез адӟисько ке, куалекъяны кутскисько.

Семьяеным.

— Кытчы улыны интыяськиды?

— Ӵуказеяз колхозысь вал сётӥзы. Скалмес, парсьмес тылысь поттыны быгатӥллям ик на. Милемлы Кечол посёлокысь кошконо луиз. Шор Кечолэ улон инты висъязы. Мынӥськом ини сьӧрлось гуртэ. Уробоын пукиськом. Учкисько но, сьӧрамы кучапие бызьыса лыктэ. Солэсь но бадӟым шумпотон вал на меда соку мон понна! Озьы ми сьӧр гуртэ улыны интыяськимы. Валесъёсмы гинэ но ӧй вал. Вазен калык огкылысь улӥз, кӧлан котыр но, мар но вуттӥзы. Али ке но гурт калыклы тау шуисько. Соос милемыз ӧз куштэ: сиён-юонэн но, дӥськутэн но юрттӥзы.

Шор Кечолысь 8 классъем школаез йылпумъяса, 9-тӥ но 10-тӥ классъёсы Яган-Докьяе ветлӥм ни. Улыны интернатын инты сёто вал, но ми, шальк-шальк  ньыль кузя пиос, сизьым иськемез пыдын я велосипедэн бертылӥмы. Толалтэзэ — куасэн.

Мон пичиысен, футболэн шудыса, будэмын. 7-тӥ классын дышетскыкум, физрукмы ӧй вал. Озьы ке но «Пионерская правда» газетын футболлы сӥзем «Кожаный мяч» нимо турниръёсы пыриськылӥмы. Ой, кыӵе шумпотыса отын ми шудылӥмы! Эшъёсы пӧлын кушем нимы ик Тренер вал. Ёзъёсы али ке но монэ озьы шуо.

Спортэн вырем сяна, мон пичи дырысен суредаськыны яратылӥ. Эктыны но, кырӟаны но мылкыды вал. Техника борды но сюлэм бинялскылӥз. Озьы ке но… Мон кутӥ но Казане кошки. Архитектурно-строительной институтэ документъёсме сётӥ. Тодмотэм городын сыӵе мӧзмыт потӥз. Ульчаын но, кытын но ваньмыз бигер кылын верасько, радио пыр гинэ но ӟуч кыл туж ӧжыт кылӥське. Институтэ пырисьёсын вераськисько: огез шуэ, мон, пе, кыкетӥзэ туэ татчы вуи ини. Мукетыз — куинетӥзэ. Соослэсь чебересь суредъёссэс адӟыса, воксё дэйми, ма, мар ай мон таослэн пыд улазы люкетыса ветлӥсько. Кин малпа татчы пырыны, со ик мед дышетскоз шуыса, документъёсме  басьтӥ но берен Иж пала шонтӥ. Городэ вуи но аслам азбарам пырем мурт кадь луи. Трамвае пукси, чемоданме сэргы куштӥ. Пайми: ноку но уд малпа, ява: трамвае бӧрсьысь бӧрсе Кечолысь эшъёсы пыро. Тон бон, Миша, кытысь тазьы шуыса, юало. Сельхозэ мынӥсько, шуисько. Шонер, пе, лэсьтӥськод, Миша, тон куке-соку колхозлэн председателез луод ай. Гурт удысъя институтын приёмной комиссизы уг ужа ни вылэм. Экзаменъёс, пе, кутскемын ни. Ми огеныз эшеным туж-туж куриським, тӥ дорын дышетскеммы потэ, шуиськомы. Мырдэм но кызьы кутӥзы.

Мон котьку спортсменъёсын ӵош.

— Институтэз йылпумъяса, вордскем палъёсады ик ярады?

— Озьы луыса потэ. Азьвыл дышетӥсе, Иван Кузьмич Екимов, комсомоллэн Пичи Пурга райкомезлэн нырысетӥ секретарез луыса ужаз. Со монэ пумитаз но, ойдо райкоме, шуэ.

«Мир» колхозэнымы соку Алексей Алексеевич Алексеев кивалтӥз. Армиысь бертэме бере ик со монэ синйылтэм. Атайдэ, пе, тодӥсько, туж умой адями вал, кыль ми доры колхозэ. Мастерскоен но, пе, быгатод кивалтыны. Доре бертыса, кытчы-мар интыяськоно шуыса, мамаен кенешисько. Со вакытэ мынэсьтым азьло гинэ гуртамы шальтрак кечол пиос, сельхозинститутэз йылпумъяса, вуизы вал. Кызьы мон соослэсь сюрессэс ӵогом? Мама но меӵак шуиз: гурт калык асьмелы сокем трос юрттӥз, кызьы соослэсь сюрессэс ваментод. Озьы мон Кечолэ кыльыны соглаш ӧй луы.

Пичи Пурга пала шонтӥ, райкоме интыяськи. Мыным спортъя но культурая ужез нуыны оскизы. Нуналлы быдэ сямен гуртъёсысь егитъёс доры поталляй. Котькыӵе ужез одӥг кылысь лэсьтылӥмы. Комсомол мыным туж трос сётӥз. Улыны дышетӥз, кыдатӥз. Азьвыл кивалтӥсьёс бадӟымъяськисесь ӧй вал. Ваньмыныз тупаса но ог-огмылэсь кылзӥськыса ужамы. Райкомын кык ар тырши. Монэ кыкетӥ секретаре пуктӥзы ни вал. Но мынам дышетскемея ик ужаме потӥз. РОС-э инженере интыяськи. Кӧня ке ПМК-ын но тырши. Отын мон прораб вал: бульдозеръёсын, кранъёсын но экскаваторъёсын ужасьёсын кивалтӥ. Татын ик монэ партие кутӥзы.

— Партие пыремды ик вылӥе ӝутскыны юрттӥз, луоз?

— Пичи Пурга нефтеперекачкаын тросэз эшъёсы ужало вал. Лыкты ми доры шуыса, лӧпкытъяса возизы. Отын ини мон кемалы ӝегай. 27 ар ӵоже ужатозям, механик но, кивалтӥсьлэн юрттӥсез но вал. 15 ар ӵоже коллективен но кивалтӥ. Со дыр куспын «Северо-западные магистральные нефтепроводы» акционерной обществолэн данъян книгаяз пыртэмын, 2000-тӥ арын — Удмурт Республикалэн Данъян пулаз.

Татын но милям футболэн шудонъя командамы вал. Ӵемысь шахматэн но шашкиен шудонъя ёрос ӵошатсконъёс ортчытъямы. Котьку вормисьёс радэ поталлямы.

Нефтеперекачкаысь кошкыкум, одӥгез ужасьмы шуиз: станцилэсь шулдырзэ сьӧрад нуиськод, Михаил Тимофеевич. Тон котьку но калыкез ӝутыны быгатӥськод вал. Та кылъёс мон понна грамотаослэсь но дуноесь.

Азьмынӥсь калыкез данъяськом.

— Михаил Тимофеевич, улэмъяды тубатъёсты вылӥе но вылӥе ӝутӥсько. Со понна кинлы ке но тау кариськоды, дыр, ук?

— Мон улытозям Ольга Николаевнаелы тау шуисько. Солэн капчи мылкыдыныз но визьмыныз тубатъёс кузя тубисько. Шумпотӥсько, кузпалын мыным удалтӥз. Со понна тау кивалтӥселы.

Одӥг пол Набережные Челныысь командировкаысь бертӥськом. Кивалтӥсе «Юськи» санаториёзь келяны куриз. Со отын улэ вал. Келяй. ӧз лэзьы ни, дораз ик кӧлыны кельтӥз. Весь шуылӥз: кышнояно тонэ, Миша, арлыдыд вань ини. Мыным соку куамынлэсь ортчемын ни вал. Ачиз со улыно-вылыно коркалэн вылӥ этажаз улӥз. Нош улӥяз — дышетӥсьёс. Вуттӥз кык нылъёсты. Гожняысьсэ тодмасько. Талэсь азьвыл Оля гуртысьтызы школаын  комсомол организациен кивалтӥз. Райкомын ужакум, милям соин телефон пыр но олокӧня пол вераськеммы вал. Милемыз ӵошеннамес кельтӥзы. Я, пукиськом ини ӵыжектыса. «Кызьы тӥ со шоры учкиськоды?» — юа мынэсьтым Оля. «Умой», — шуисько. Со малпам, эшсэ кураны лыктӥ шуыса.

Но милям Оляен кылмы тупаз. Сокугес ик Гожня гуртаз куное мынӥмы. Со нуналэ семьяосыз парсь вандо вылэм. Монэ адӟыса, ужзэс ик вунэтӥзы. Вуоно эмеспизы шоры гинэ учко на. Со ик мынам куать ныло-пиё семьяе пыреме луиз. Кечолын ӟуч кылынгес вераськиськом вал, Гожняын мон чылкак удмурт пи луи. Со дырысен удмуртлыкез яратыны но гажаны кутски.

— Кызьы шуо калыкын: воргорон, пе, улытозяз пи будэтыны, писпу мерттыны но корка пуктыны кулэ.

— Со веранзы быдэсмиз кадь потэ мыным. Ныл но пи будэтӥм. Юля нылмы Пичи Пурга гимназиез зарни медален йылпумъяз. ИжГТУ-ын дышетскыса, программист луиз. Семья кылдытӥз. Гужемзэ соос ми дорын уло. Муспотон Валерия нуныкаймы будэ. Но мон нокызьы асме песятаен уг шӧдӥськы на. Асьмелы асьмеос ялан егит потӥськомы, лэся. Саша пимы УдГУ-ын экономикая факультетын 4-тӥ курсын дышетске. Семья сярысь малпанэз ик ӧвӧл на.

Кышнояськемелэсь азьло ик мынам квартирае вал ини. Сад-бакча басьтыны мылкыды вал на. Али ке но тау карисько исполкомысь плановой отделысь ужасьлы Галина Дмитриевна Тубыловалы. Музъем басьтыны мынӥ но, со шуэ: Миша, йыг-йыг корка пукты, мар со сад-бакчаен гинэ карод. Озьы корка пуктыны малпай. Нюлэс басьтыса, асьмеос ик сое корамы.

Коркае бордын вить ар выри. Кык арзэ суредаськыса потӥ. Ольга Николаевнаелэн вожез ик пӧсьтылӥз: мар, пе, тон уйёсы ялан суредаськыса пукиськод. Нош мон коркаме калыклэсь пӧртэмгес адӟылӥ. Юнме архитекторе мыныны уг малпаськы вал ук. Соку дась проектъёсын книгаос ӧй вал. Бусёнъёсы но Ольга Николаевналэн агай-вынъёсыз, вемеын ужакузы, мар калыклэсь пӧртэм тазьы дауртӥськод, шуылӥзы. Вылтусын коркамы огшоры, ваньмызлэн кадь ик, нош пушкыз  аспӧртэм. Асьмелы кельше.

— Котыр калыкез гинэ ӧвӧл, озьы ик тӥ семьядэс но оломаин но паймытъяськоды, луоз? Уката ик 8-тӥ Март котырын?

— Мамаелэсь верамзэ ноку уг вунэты. 8-тӥ Мартэ, пе, тятямы вазь ӵукна ик султэ но, тӧдьы дэрем дӥсяса, ӝӧк сьӧры пуксе. Мар кема изиськоды, султэ ни, туннэ нылкышноослэн праздниксы, ческыт сиён сюдоды, дыр. Мон но озьыгес ик. Олокыӵе ик паймытъяса уг улӥськы. Вань воргоронъёс сямен ик, сяська кузьмасько, ачим вазь ӵукна ик ческыт пӧрамзэс возьмасько.

Озьы ик мон понна бадӟым праздник луэ 1-тӥ сентябрь. Соку ваньмызлы сяська кузьматэк уг луы. Мамае сяна, выныз но солэн кышноез, Лёня пиез но кенэз — ваньзы  дышетӥсьёс. Одӥг коркан вить кузя визь-нод сётӥсьёс улӥзы. Мон пичиысен педсоветын кадь будӥ. Кызьы алама дышетскыны дӥсьтод но. Кузпал но дышетӥсь ик шедиз.

— Кык ар талэсь азьвыл Пичи Пурга ёросысь 30 депутатъёс тӥледлы оскизы ёрос йырлэсь пуконзэ. Та ивор тӥ понна шуак ӧй вал-а?

— Пичи Пурга ёросысь Депутатъёслэн кенешазы 4 пол бырйиськылӥ. Ёрослэсь йырзэ Людмила Чунаеваез вылӥе басьтэменызы, 2009-тӥ арын май толэзе монэ лушкем быръёнъёсын огкылысь ёрос кивалтӥсе пуктӥзы. Мон сяна но кандидатураос вал. Оскизы бере, ужано, малпай.

— Трос аръёс ӵоже кивалтэм мурт ӟеч вала, дыр, кыӵе луыны кулэ кивалтӥсь?

— Солэн улонэз капчи ӧвӧл. Уката ик ужез дышетскемезъя ӧвӧл ке. Кивалтӥсь адямилэн синмаз пыр-пыр учкыны мед быгатоз. Юнме шорысь вӧсь медаз кары. Ужасьёсты кесяськыса, пачкатыса, зӥбыса возись кивалтӥсьёсты мон уг валаськы. Калык тыныд мед оскоз. Пӧртэм юанэн лыктэ ук со тон доры. Соин ик ваньмыныз валче, тупаса ужано.

— Мытэм ужады ма тужгес но секыт йӧтӥз?

— Ужаны кутски гинэ, котыр ласянь шуг-секытъёс пачкатӥзы. Соку ик кризис шуккиз. Ёрми, ёросысь коммунальной хозяйство банкрот луиз. Кык арзэ, бӧрсьысь бӧрсе, зоръёс ӧй вал. Пудо сиёнэз палэнысь ворттӥм. Ӝокыт куазен нюлэсъёс ӝуаны кутскизы. Ярам, ми соосты дыраз, асьме кужымен, кысыны быгатӥмы. (Со понна Михаил Тимофеевичез Удмуртиысь МЧС медален пусйиз — Л.Т.) Туэ ми дорын ортчизы Гурт шудонъёс. Солы но дасяськоно луиз. Пугачёво каргуртын пуштылонъёс кемдӥзы. Военбазаын калык котьку ас понназ улӥз. Со быдэсак Обороная министерство ки улын вал. Ёрос соос борды ӧз ик йӧтылы. Нош татын… Со зурканэз ваньмызлы чидано луиз. Милемлы мама котьку шуылоз вал: секытъёсты чидано. Калыкын но озьы верало ук. Тӥни озьы, кык ар куспын сомында адӟонэз адӟиськиз.

— Зуркыт адӟонэн пумиськыса но, Гурт шудонъёс туэ гужем тӥ дорын ик ортчизы. Куашкам, пуксем мылкыдын ӧд улэ, спортсменъёсты котыр ласянь асьсэды ӟеч возьматӥзы, вормисе потӥзы.

— Гурт шудонъёсты ортчытон пумысен но сюлмаськонъёс трос вал. Пуштылонъёс бере калыклэн мылкыдыз умой ик ӧй вал. Тупатъян-лэсьтӥськон ужъёс но тырмемын. Спортсменъёслы дӥсь но быръёно, мылкыдзэс но ӝутоно. Вормон озьы гинэ уг лыкты ук. Со понна трос ужано но пӧсяно луиз. Тау кареме потэ ёросысь вань калыклы. Солэн кужмыныз ми вань секытъёсты вормимы. Спортсменъёсмы милям котькугес ик азьпал радъёсын ветло. Нош туэ нырысетӥ интые потӥзы. Соослы нимысьтыз тау.

— Тӥ доры калык пӧртэм юанъёсын вазиське. Луо-а сыӵе учыръёс: адямилы нокызьы юрттыны уг луы.

— Сыӵе учыръёс маке мында. Калыклы котьмар ласянь юрттэм потэ, но мынам сыӵе луонлыке котьку ик уг луы. Тани пуштылонъёс сярысь ик верано ке… Кин малпаз, Пичи Пурга ёрос собыдӟа адӟонэз чидалоз шуыса.

— Озьы ке но адямилы улоно, шуг-секытъёслы сётсконо ӧвӧл. Пичиослы будоно, мӧйыослы ужано, нылэз-пиез пыд йылаз ӝутоно.

— Шумпотыса вераны быгатӥсько, таӵе секыт аръёсы но ёросысь колхозъёс возисько. Пӧртэм удысъя мытэм ужъёс азьланьтӥсько. Ёросмы арысь аре кужмоя. Кылем арын зоръёс ӧвӧлэн пудо сиёнлы шугомимы вал. Туэ сое тырмыт дасямы. Толэз ӟеч потомы шуыса, малпаськом. Озьы ик туэ ӟеч нянь басьтӥмы. Оглом вераса, гектарысьтыз 21,1 центнер ю тысь бичамы. Куд-ог хозяйствоосын 36-ёзь но вуиз. Ар пумозь скаллы быдэ 5 сюрс литр йӧл кыскыны луонлыкмы вань. «Уромское» эштосысь комбайнёр Михаил Петров республикаын вормисе потӥз. Со 2 сюрс 200 центнер ю тысь кутсаз.

Удмуртлыкез но утьыны выриськомы. Туэ Тыло гуртын Самсонов писатель вынъёслы Ижысь Пичи Пурга землячествоен ӵош музей усьтыны быгатӥмы. Ми понна со чылкак выль уж вал. Нырысь-валысь со борды кызьы кутскыны ик ӧм валалэ. Самсонов писатель вынъёслэсь атай юртсэс тупатъян-лэсьтон борды басьтӥськимы. Выльдыны выльдод кадь, сое тупатъяны кема ӧвӧл. Но юртлэсь азьвыл вылтуссэ кельтыны кулэ ук. Со рос-прос музей ик мед луоз ини. Быгатэммыя тыршим, вырим. Табере отчы адямиос ветло ини. Алигес финъёс вуылӥзы.

Ужмы вырӟиз Самсонов нимо премия сётъян ласянь но. Ёросын таӵе уж нырысьсэ лэсьтӥське.

— Пичи Пурга ёрос республикаямы пудо вордонын, нянь будэтонын азьпал радъёсын ветлэ, культура удысэн данъяське, удмурт сям-йылолъёсты уте. Быдэс дуннелы тодмо ини Брангуртысь песянайёс. Сӥзем потэ: ёростылэн данэз ноку  медаз усьы. Шуг-секытъёс палэнэ мед кылёзы. Лапасъёсты тыраз юэн, гидъёсты таза пудоен мед шумпоттозы.

 Любовь Тихонова.

Удмурт Дунне
By Удмурт Дунне 28 октября, 2011 11:29
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<