Пуртлы пумит

Удмурт Дунне
By Удмурт Дунне 4 октября, 2011 07:48

1-тӥ сентябре Ижысь Ленин ёросысь следствиея отделэ вуиз Дамир Закиров. Егит мурт татын практиказэ ортчыны кенешиз — Дамир дышетске Казаньысь юридической институтлэн 5-тӥ курсаз. Вуоно следователь толэзь пумын кырмиз кышкыт йыруж лэсьтӥсез.

Азин ульчаысь огаз остановкаын Дамир адӟиз керетӥсьёсты. Кудӟем пиосмурт даллашиз кык нылъёсын. Югдур син куспын воштӥськиз. Воргоронлэн кияз чилектӥз пурт, огзэ нылмуртэ бышкалтӥз.

Вуоно полицейской туганэныз ӵош вал, но йыружез адӟыса, соку ик йыртэмасез кырмыны бызиз.

— Пиосмуртлэн киысьтыз пуртсэ пезьдытӥз, собере суйёссэ но позыртӥз, — вераз ӵош ужась эшезлэн сак луэмез сярысь Ленин ёросысь следствиея отделлэн кивалтӥсезлэсь ужзэ быдэсъясь Максим Суманеев. — Собере Дамир жингыртӥз полицие. Йыртэмасез вуттӥзы югдурез утисьёс доры, сӧсыртэм нылмуртэз нуизы больницае.

Полициын ужасьёс Уголовной кодексысь 111-тӥ статьяя уж ӝутӥзы — адямилэн тазалыкезлы бадӟым кышкытлык кылдытон. Следовательёслы тодмо луиз: кырмем йыртэмасьлы 23 арес. Со вакытлы пияш кыл кутытэмын ни вылэм условной амалэн — со кӧня ке пол кышкатъям, нылмуртэз виёз шуыса. Соин Ленин ёросысь суд мукет постановление дасяз: йыртэмасез келяно колоние-поселение. Но та уж быдэсмыса ӧз вуы. Со понна выль йыруж суралскиз.

23 аресъем пияш кемалась эшлаське наркотикъёсын но юонэн. Соин керетон-даллашонлы солэн матысь адямиосыз далай дышемын ни. Нырысь воргорон керетӥз дусыменыз — таиз солы сур басьтыны коньдон ӧз сёты. Собере тодаз вайиз: толон, пе, анаезлэн 1 сюрс манетэз ышиз. Та понна со янгыше уськытӥз дусымезлэсь ӵыжы-выжызэ — егит нылмуртэ, вуттӥз сое жугыса но. Воргоронлэсь урмон сямзэ тодыса, дусымез кык пиналъёсыныз но ӵыжы-выжыеныз ӵош ульчае потӥзы, юри кариськизы калыко интые. Нош наркоманлы нокыӵе ик ӧз пот — пурт кутыса, сьӧразы бызиз. Остановкае вуыса, адямиос азьын ик дусымезлэсь ӵыжы-выжызэ пуртэн бышкалтӥз.

Табере йыртэмась следствиея изоляторын, суд ортчытозь, пукоз. Вуоно следователь Дамир Закиров та ужъя адӟись луоз. Ленин ёросысь полициын ужасьёс туж оско: диплом басьтэмез бере Дамир одно ик доразы ужаны лыктоз. Уго югдурез утён удысын кулэ ӵапак Закиров кадь кышкасьтэм, сак, адямиослы котькыӵе учырын юрттыны дась луись полицейскойёс.

Елена Скворцова.

Удмурт Дунне
By Удмурт Дунне 4 октября, 2011 07:48