Палэзян мылкыд ӵыжы-выжыосмылы мед паласькоз

Удмурт Дунне
By Удмурт Дунне 21 октября, 2011 13:43

Палэзян мылкыд ӵыжы-выжыосмылы мед паласькоз

«Квилт» студиысь егитъёс.

Таяз арняе быдэс дуннеын пусъё фин-угор калыкъёслэсь нуналъёссэс. Удмуртиын со тупаз «Палэзян» фестивалез ортчытонэн. Соин та арняе фин-угор мылкыд  ӧръяське Ижын но, ёросъёсын но.

Валлян Удмурт театрын ортчиз фестивальлэн гала-концертэз. Бадӟым ужрадэ пыриськизы асьме шаерысь, мукет улосъёсысь  но кунгож сьӧрысь вуэм коллективъёс но кырӟасьёс.

Залын одӥг буш пукон но ӧз кыльы. Кошкыны ӧз ик малпалэ интытэк кылем учкисьёс — соос тубатъёс вылэ пуксизы. Тани, ужрадэз усьтыса, сцена вылэ дауртонъёсыныз потӥз Кучыран Юри, кыӵе ке бадӟым гумыен бозгетӥз Кузи Серги. Таӵе йӧспӧртэм перформансэз воштӥз удмурт сюлэме кемалась лякиськем «Чипчирган» ансамбль.

Залэ люкаськемъёсты пумитаса, куноослы вазиськизы Кун Кенешлэн Тӧроез Александр Соловьёв, нациосын ужан политикая министр Владимир Завалин, «Удмурт кенеш» ассоциацилэн вице-президентэз Татьяна Ишматова, Финляндиысь калевала кышноослэн огазеяськонзылэн вице-президентэз Аннамари Мауконен. Та вераськемъёс пӧлысь уката синмаськымон потӥз фин кылысь берыктӥсь Наталья Дмитриева. Аннамарилэсь вераськемзэ Наталья туж ӝог нырысь удмурт кылын вералляз, бӧрысь — ӟуч сямен.

Егитъёслы сӥзем «Палэзян» фестиваль Удмуртиын ортче нырысьсэ. Со понна Финляндиысь Иматра городын со 10 ар мынэ ни. Удмурт калыклэсь творчествозэ возьматыны отчы вуылӥз «Эктон корка» студия. Табере фин куноос асьсэлэсь быгатонлыксэс шараязы. Крезьгуръёсын шуныт сузьет кузьмаз «RUMДKKД» фолк-группа, фин кадрилен паймытӥзы  «KEIKU» коллективысь эктӥсьёс.

Учкисьёс зол кичабонъёсын келязы мордваослэсь «Морденс» ансамбльзэс. Та — егитъёслэн группазы. Соос быдэсто вашкала кырӟанъёсты, но туала крезьгур шудэмъя. Гитара, скрипка, барабан вуж кырӟанлы выль улон сёто.

Но таосын ӵошатскыны быгатозы удмурт егитъёсмы но. Кылсярысь, Шаркан ёросысь Быги гуртысь «Даур герӟет» ансамбль. Уката паймытӥз «Гаруда» фолк-метал группа. Таосыз егитъёс — Дэри ёросысь ӵӧжгуртын уло. Макем зол быдэстӥзы кырӟанзэс. Жаль, та группаослы фестивальын быдэн номер гинэ возьматыны дыр висъяллям.

Фестивале люкаськемъёсты шулдыртӥз вашкала амалэн крезьгуръёсты быдэстӥсь Маша Корепанова. Таиз усточи берло арзэ быдэс Россилы тодмо луиз ни. Соин егит кырӟасез зол кичабонъёсын пумитазы но келязы.

Удмуртие пор артистъёсты ваён понна Марий Эл Республикалы сюлмаськоно ӧз луы. Синмаськымон усточиос уло вылэм Сарапулын. «Чолман йяк» фольклор ансамбльысь пиос эх! сётӥзы ук! Тае фин-угор лезгинка шуысал мон. Эктӥсьёслэн задор мылкыдзы выжиз учкисьёслы но. Таосыз кичабонъёссэс ӧз жалялэ, пор усточиос сцена вылын эшшо тапыртӥзы на.

Кырӟан-эктонъёсын сяна, фестиваль паймытӥз туала удмурт модаен но. «Неофолк», «Квилт», «10 сезон» студиосысь егит нылъёс но пиос турлы дӥсьёсын сцена вылтӥ котыръяськизы.

Удмурт театрлэн сценаез вылын жингыртӥзы удмурт крезь но фин кантеле — соослэсь сиоссэс бичазы удмурт Татьяна Фёдорова но фин Минна Раскинен. Фин нылкышно пыриськиз на мукет дуэтэ — таяз радэ кантеле сиос шудэм улсын кырӟаз Надежда Уткина.

«Палэзян» фестиваль сцена вылэ вуттӥз трос коллективъёсты. Соос тодӥзы ог-огзэс. Адӟизы, паймизы, вожвылъяськизы. Ужрадлэн берло нуналъёсыз азинскизы на Кияса но Пичи Пурга ёросъёсын, Лудорвай музей-заповедникын. Туннэ Эшъяськон юртын калык ӝытбыт тапыртоз «Эктон корка» студиен ӵош.

Озьыен, малпам уж быдэсмиз. Фестивальлэн яркыт палэзьёсыз пазьгиськыса кошкозы мукет ӵыжы-выжыосмы доры. Табере та ужрадлэн азинлыкез мед луоз, вуоно аре нош ик мед воректоз.

Алёна Ионина.

Туспуктӥз Владимир Беломорских.

Удмурт Дунне
By Удмурт Дунне 21 октября, 2011 13:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<