Одӥг кисыысь люконо, кинэ кызьы дунъяно?

Удмурт Дунне
By Удмурт Дунне 26 октября, 2011 12:21

Кун Кенешлэн 29-тӥ сессиез толон чаляк ортчиз. Кык час куспын депутатъёс пӧртэм юанъёсты эскеризы но кутӥзы. Озьы ик сессилэн повесткаяз выль ужпум ӵектӥз Правительстволэн Тӧроез Юрий Питкевич. Со дэмлаз туэлы но 2012-тӥ но 2013-тӥ  аръёслы бюджетъёсы воштонъёс пыртыны. Озьы оглом люкаськиз 12 юан.

Удмурт парламентлэн ужаз пыриськизы Правительстволэн Тӧроез Ю. Питкевич, Удмуртиысь валтӥсь федерал инспектор Р. Идрисов, Россиысь Федерация Кенешысь ёзчиос А. Чекалин но В. Щербаков, Кун Думаысь депутатъёс Н. Мусалимов но Н. Сапожников, Правительстволэн муртъёсыз.

Депутатъёслы ӵектэм ужпумъёс пӧлын нырысетӥез вал республикаямы миръясь судьяосты юнматон. Соосын тодматыса, Вылӥ судлэн тӧроез Ю. Суханов пусйиз:  куинез но кандидатъёс ӟеч ортчизы квалификация экзаменэз, ваньзы миръясь судьялэсь ужзэ быдэсъямын ни, удыссэс тыро-пыдо тодо. Ӵектоно муртъёс ваньзы нылкышноос: Ижысь Наталья Глухова но Людмила Дударева, Дэбесысь Лариса Ильина. Котькудзылэн быдэн 12-14 ар ужам стажзы. Депутатъёс огкылысь куаразэс сётӥзы судьяосты юнматон понна. Озьы матысь 5 ар ӵоже быръем муртъёс асьсэ участокъёсазы тыршозы.

 

* * *

Бадӟым саклык висъямын кыкетӥ юанэз эскеронлы — «Óäìóðò Ðåñïóáëèêàûñü áþäæåòúÿ кусыпъёсты ðàäúÿí ñÿðûñü» çàêîíëэн ïðîåêòэзлы. Шаермылэн огъя кисыезлэн 30 процентэз люкемын луэ пӧртэм бюджетъёс куспын. Кызьы коньдонэз висъяно, муниципал кылдытэтъёсты бадӟым обиде кельтытэк? Удмуртиысь коньдон ужпумъёсъя министр Валерий Богатырёв шуэ, чаклано трос удысъёсты. Кылсярысь, кӧня адями улэ гурт поселениын, кудмында выт вуэ улӥсьёслэсь,  кыӵе татын сюресъёс, учреждениос  но трос мукетсэ. Со понна Коньдон ужпумъёсъя министерствоын кылдытэмын дотациез лыдъянъя нимысьтыз методика. Но вань депутатъёслы со валамон ӧз поты.

Кылсярысь, Кез округъя  быръем депутат Юрий Кайгородов методикаез рос-прос «кушаны» куре. Тани адями улэ пичи гуртын, нош ужа Кез посёлокын. Соку ваньбурлы но музъемлы тырем вытэз лыктэ гурт поселенилэн бюджетаз. Нош огъя доходэзлы налогез (НДФЛ) кыле посёлоклэн бюджетаз. Кыӵе методикая висъяно тазэ? Гурт поселение выт ӧжыт вуэ бере, отчы дотация но ичигес мыноз-а? Та выллем юанъёс уката трос кылдо городъёслы матэ интыяськем ёросъёсын. Кылсярысь, Дэри, Пичи Пурга, Сарапул ёросъёсын. Соин ик одӥг методикаен гинэ али ваньзэ радъяны ум быгатэ, шуэ Валерий Богатырёв. Министр ӵектӥз та амалэз матысь ар-кык ӵоже ужын эскерыны, бӧрысь, пе, воштонъёс но пыртыны луоз.

 

* * *

Кыкетӥ лыдӟонэз пырпотӥз адямиослы дунтэк музъем сётон сярысь законлэн проектэз. Отын нырысь ик вераськон мынэ трос нылпиё семьяослы му кесэг висъян пумысен. Сессиын нырысьсэ эскерем бере та проектэ уно воштонъёс но ӵектонъёс люкаськизы. Соосты дэмлазы Кун Кенешысь ялан ужась комиссиос но, республикаысь Прокуратура но. Вань ӵектонъёс пӧлысь палэнтэмын кыкез, кутэмын дасэз. Озьыен, мар сётоз та закон?

Трос нылпиё семьяосы ваньмаз ик шумпотон уз вуы. Уго музъем висъямлэсь азьло учкозы, тырме-а семьяын улон инты. Уг окмы — соку, юрттэт курыса, черодэ но султыны луоз.

Нялтас вераса, сессие люкаськись депутатъёс адӟизы Кун Кенеш доры люкаськем нылкышноосты. Соос татчы вуизы нылпи коляскаосын, пиналъёсын ӵош. Куронзы огъя: музъем висъяно ваньмызлы трос нылпиё семьяослы, калыкез висъяно ӧвӧл.

— Кӧня ке ӝож луэ, нылкышноос таӵе куронъёсын лыктӥллям шуыса, — вера Кун Кенешлэн Тӧроез Александр Соловьёв. — Музъем висъян сярысь закон бордын трос ужамын. Му кесэг сётӥськоз дунтэк. Но сое басьтон понна, зэмзэ но, улон интылы ёрмыны кулэ. Музъем чотын узырмыны, вузаны малпасьёс медаз луэ.

Матысь дыре та закон печатласькоз газетын. Собере со кужыме пыроз.

* * *

Ар пумын воштонъёсты кулэ каре республикалэн туэлы бюджетэз. Со выжоз 2012-тӥ но 2013-тӥ аръёсы но. Тае валэктыса, вераськиз калыклы улон-вылонын юрттэт сётонъя министр Ольга Корепанова. Россиысь Пенсиосъя фонд Удмуртилы сётыны дась 11 миллион манет. Но юрттэт вуоз, шаермы сомында ик коньдон  висъяны быгатӥз ке.

Та понна бюджетысь нимысьтыз уксё утчано ӧвӧл, сое ведомстволэн куд-ог программаосысьтыз кыскыны луоз. Та коньдон чотын калыклы юрттонъя 7 учреждениын тупатъян ужъёс радъялозы. Озьы ик 30 машина басьтыны пӧрмоз — котькуд муниципал кылдытэтысь социальной удысъёслы быдэн автомобиль. Депутатъёс, та ужпумъя но соглаш луыса, куаразэс сётӥзы.

Кун Кенешын матысь дыре но омыр уз сӥя. Тани 1-тӥ ноябре ик ортчозы депутат кылзонъёс. Соос сӥземын луозы матысь 2 арлы чаклам бюджетэз эскеронлы. Нош шуркынмон толэзь пумын радъяськоз вылез сессия.

Елена Скворцова.

Удмурт Дунне
By Удмурт Дунне 26 октября, 2011 12:21