Нылпи садъёс йылозы

Удмурт Дунне
By Удмурт Дунне 7 октября, 2011 09:50

 

Средае Президент Александр Волков вуылӥз Яр но Юкаменск ёросъёсы. Татын вылӥ кивалтӥсь тодматскиз социальной удысысь объектъёсын. Кылсярысь, пыраз Ярысь больницае — татын тупатъян ужъёс мыно стационарлэн юртаз. Вуоно арлы чакламын выльдыны поликлиникаез — тазалыкез утён удысын кутскем модернизация чотын. Юкаменск ёросын Президентлы возьматӥзы школаосты — Ёжгуртын тупатъямез возьма школаысь спортзал, райцентрысь дышетон юртэз но сэзъяны кулэ ни.

Но яръёс ӝожтӥськыса гинэ уг уло. Ушъяськыны быгато ӟеч ужаменызы но. Кылсярысь, Яр каргуртын азинске тэль коранъя но пулэсь вуз дасянъя крестьян-фермер хозяйство, Палагай гуртысь «Куркан» огазеяськон йӧл кыскеменыз данъяське. Та предприятиосты ик возьматӥзы Александр Волковлы.

Бӧрысь районысь культурая юртын ортчиз калыкен пумиськон. Ёросын улӥсьёс трос пумо юанъёсын вазиськизы, районзылэсь экономиказэ но социальной удыссэ азинтонъя планэ воштонъёс пыртыны курыса.

— Нырысь ик лыдэ басьтомы нылпи садъёсты. Ярын но Биграгуртын, озьы ик Юкаменск черкогуртын коньдон висъялом нылпи садъёсын выль интыос усьтонлы, — вераз А. Волков.

Президент пусйиз, ӵапак таӵе пумиськонъёсын адямиос верало сюлэмшугъяськонъёссэс, соос асьсэлэсь ӵектонъёссэс пырто «Азьлань, Удмуртия!» калык программае. Соку валаны луэ, кыӵе выльдӥськонъёс пыртоно отчы. Котькуд пумиськонын сямен ӝутске нылпи садъёсын интыослы шугъяськон сярысь ужпум. Вуоно арын но сое быдэстонлы нимысьтыз саклык но коньдон висъялом, оскытӥз А. Волков.

Сергей Захаров.

Удмурт Дунне
By Удмурт Дунне 7 октября, 2011 09:50