Мукет улонэз со уг тоды…

Удмурт Дунне
By Удмурт Дунне 26 октября, 2011 12:33

Республикаысь Следствиея управление пыр-поч ужа адями виён учыръёсты сэрттон бордын. Соос пӧлысь бадӟым люкетэз кылемын азьло аръёсысь. Удмуртиын таӵе йыружъёсты лыдъяло 1962-тӥ арысен. Адями быдтон 400 учыр туннэ йылаз-пумаз вуттымтэ на. Туэ тодмо луизы 10 сыӵе йыруж понна янгыш муртъёс. Озьыен, вужере ышем кӧшкемыт учыр куке-соку одно ик шарае потэ.

Эгра районын вордскем Таня Псарёвалэн улонэз шӧдтэк шорысь чигиськиз 2004-тӥ арын. 21 аресъем нылаш соку выжиз Иже, ужаз кафеын официант луыса. Ужан интыезлэсь кыдёкын ӧз улы — уго кафе уйшор котыр гинэ ворсаське. Соин Таня квартира шедьтӥз Буммаш районысь Дзержинский ульчаын. Но огаз ӝытэ нылмурт дораз кӧлыны ӧз вуы.

Со понна Дзержинский урамысь 29-тӥ юртэ вазь ӵукна ик ӧтизы милициез. 20-тӥ январе ужаны мынӥсь нылкышно мырӟиськиз адями шӧй вылэ. Котыраз — вир. Ӝог вуизы полициын но прокуратураын ужасьёс. Син куспын валамон луиз: нылмурт виемын. Югдурез утисьёс юалляськизы татын улӥсьёслэсь, криминалистъёс утчазы тамак пумъёсты, чиньы пытьыосты.

Адӟисьёс веразы: бер уйин татын сылӥзы нылмурт но пияш. Огез кышномурт, подъездын тыл ӵемысь уг ӝуалля шуыса, сюрессэ фонарикен югдытыса, корка пыриз. Егитъёсты со кыкетӥ но куинетӥ этажъёс вискысь адӟиз — соос укно дорын, батарея бордын шунтӥськыса, сылӥзы. Но кышномурт, туссэс сӥсъяса, ӧз улы — толалтэ подъездазы егитъёс тазьы ӵемысь сыло.

Криминалистъёс ӟеч иворен ӧз шумпоттэ следовательёсты. Зэм, шедьтӥзы батарея бордысь чиньы пытьыосты. Эскеризы соосты — но кузёзэ ӧз шараялэ.

Экспертъёс лыдъязы: нылмуртлэн мугораз 40-лэсь трос пуртэн вандэм бервылъёс. Уката сӧсыртэмын гадьлысьӧмыз — 12 пол бышкемын паллян палыз. Зол йӧтэм кӧтаз но. Ымнырыз — лыз-вож, ангесыз, киосыз пуртэн шырӟылэмын. Криминалистъёс чаклазы: нылмурт ассэ утьыны вырем, киосыныз ватӥськыса. Соин сомында вандылӥськемез. Озьы ке но ӵукнаозь улыны солы ӧз кылды. Вирзэ ыштыса, Таня кулӥз. Рос-просгес эскерыса, эшшо паймизы экспертъёс. Кулэмезлэсь азьвыл нылмурт кинэ ке «яратэм». Но эриктэманлы со уг тупа, угось сыӵе дыръя вӧсь, кужмысь каремлэн бервылыз кыле. Иське, мар луиз?

Псарёвалэн бордаз нокыӵе сумкаез ӧй вал ке но, шӧй моргын кема ӧз кылльы. Уго Дзержинский ульчаын улӥсьёс сое тодмазы, озьы нылзылэн быремез сярысь ивор вуиз ӵыжы-выжыосызлы.

Прокуратураын ужасьёс уголовной уж ӝутӥзы ке но, сое азьланьтыны, адями виисез шедьтыны ӧз быгатэ. Озьы Танялэн мугорыз кыллиз музъемын, убирлэн сьӧлыкез — тузонӟем папкаын.

* * *

Туэ арлэн кутсконаз Следствиея управленилэн Ижысь Индустриальной ёзысьтыз ужасьёс та материалэз ӝутӥзы. Уголовной ужысь шараямтэ чиньы пытьыосты нош ик сётӥзы экспертъёслы. Таосыз паймымон ивор вуттӥзы: йыр вандӥсь луэ Д. А. Сабуров. Кыре потӥз: Дмитрий визьмаське республикаысьтымы огаз колониын. Воргоронэз кыл кутытӥллям 2003-тӥ арын декабре лэсьтэм йыружез понна.

Сабуров быдэ вуымтэ дырысеныз тодмо милициын ужасьёслы. Законэз тӥямез понна 2000-тӥ арын пытсэт сьӧры шедьылэм ни. Соку пияш мурт ваньбурез капыртэм, вылаз ик, мурт машинаез лушкам на. Соин валлин Дмитрий 2 ар ӵоже колониын визьмаськиз. Эрике сое лэзизы, амнистия вуэмен — со аре потӥз быдэ вуымтэосты но нылкышноосты вазьгес мозмытон сярысь постановление. Но кыл кутытон система Сабуровлэсь сямзэ ӧз вошты. Уже интыяськон, дышетскон сярысь солэн тодаз ӧз лыкты.

Югдурез утисьёслы Дмитрий  сярысь выль ивор вуиз 2003-тӥ арлэн пумаз. Декабре Сабуров эриктэмаз нылмуртэ. Йыружезлэсь пытьыоссэ согыса, нылашез тышказ, пуртэн бышкалтӥз. Малпаз, ужзэ быдэстӥз шуыса. Но нылмурт улэп кылиз. Озьы милициын ӝутӥзы уголовной уж — со дыре ик Сабуровез утчаны кутскизы. Тае шӧдыса, йыр быдтӥсь дораз ӧз берталля, уйёссэ ортчытъяз тодмоосыз дорын. Нокытчы пырыны быгатымтэ дыръяз кӧлалляз подъездъёсын.

Ог ӝытэ пияш котыръяськиз Дзержинский ульчаын. Вакыт уйшорез ортчиз. Одӥг час уй котырын Сабуров синйылтӥз нылашез, вазиз — озьы тодматскизы. Бӧрысь Дмитрий солы сур юыны ӵектӥз, Таня соглаш луиз. Нырысь подъездын ик ӟенелик бекыръязы. Собере ӟыгыръяськон-чупаськон пуромиз. Подъездын ик ог-огзэс «яратӥзы» но.  Но синмаськон мылкыдзы, кӧня ке улыса, тэшказ. Выль тодмоезлэсь мугор суредъёссэ (татуировказэ) адӟыса, Таня серекъяз. Тазьы горемез ӧз кельшы воргоронлы — со бордысь кенжиз керетон.

Сабуров нырысь мыжгиз Танялэн ымныраз, нылмурт бамзэ но йырзэ киосыныз ватыны выриз, воргоронлы мышкин кариськиз. Нош жугиськись муртлэн кияз чилектӥз пурт — сое Танялэн тыбыраз мертчытӥз. Нылмурт, вӧсь луэмзэ валатэк, шулӟектэм синъёсын берытскиз Сабуров пала. Нош урмем воргорон визьтэммыса эшшо но эшшо бышкиз нылмуртлэсь мугорзэ пуртэн. Собере, Танялэсь сумказэ кутыса, подъездысь гылӟиз.

Пеймыт тол уй ватӥз Сабуровлэсь йыружзэ. «Пӧсь пытьыосызъя» сое нокин ӧз шедьты — жаляса верано, криминалистъёслэн ӧз тырмы саклыксы. Озьы ке но Сабуровез 2004-тӥ арын ик кырмизы — сое кыл кутытӥзы мукет нылашез эриктэмамез но сӧсыртэмез понна. Нош Таня Псарёва воргоронлы уйвӧтаз но ӧз лыктылы.

Колоние вуэм следовательёс Сабуровлы шузи улсы аналскыны ӧз сётэ. Воргорон быдэстэм йыружзэ мадиз. Пыр-поч вераз нылмуртлэсь маин дӥсяськемзэ но,  подъездын мар каремзэс но. Тодаз вайиз: тубатъёс вылын сур юыса пукыкузы, подъездэ нылкышно пыриз, сюрессэ фонарикен югдытӥз. Озьыен, та йыружезлэсь векчи учыръёссэ но воргорон йыраз возе, 7 ар талэсь азьло ортчем уез маде толло нуналэз сямен.

Суд Сабуровлы выль приговор пуктӥз. Матысь 10 арзэ воргорон ортчытоз колониын. Визьмалоз-а сое кыл кутытон система — оскон туж ичи. Уго эрике Сабуров потоз ог 40 аресаз — мукет улонэз со уг тоды, 18 аресысен гумырез ортче пытсэт сьӧрын.

Материалэз дасяны юрттӥз Следствиея управленилэн Ижысь Индустриальной ёросысь кивалтӥсезлэн воштӥсез И. Залазаев.

Алёна Ионина.

Удмурт Дунне
By Удмурт Дунне 26 октября, 2011 12:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<