Мон малпалляй, Иж — удмурт город…

Удмурт Дунне
By Удмурт Дунне 25 октября, 2011 09:13

Мон малпалляй,  Иж — удмурт город…

Валентина Фадеева Ижысь медакадемилэн библиотекаяз научной отделлэн лыдӟиськон залаз ужа. Сабырлы, визьмо, йӧно нылкышно котьку но шоре пальпотыса учкоз, лыдӟисьёссэ шумпотон мылкыдын пумиталоз, шуо медакадемиысь преподавательёс но студентъёс, ӵош ужась эшъёсыз.

Валентина Ивановна пусъемын Удмурт Республикаысь культура удысысь дано ужась нимын но уно данъян грамотаосын.

 

— Валентина Ивановна, вордскем интыды Удмурт шаерысь ӧвӧл шуыса, тодӥсько.

— Пичи дыры туж шулдыр ортчиз. Татариысь Кукмор ёросысь сю коркаем Ошторма-Юмья гуртмы быдэсак садъёс пушкы выемын вал. Нылпиос маке мында будӥзы, ульча тыр шальтыр-шальтыр бызьылӥмы.

Гуртысьтымы шор ёзо школаез пырпотыса, городэ кошки. Эшеным Зоя Рамазановаен Казаньысь культурая институтэ йыгаським. Бигеръёс пӧлы шедим шуыса, чик ӧм кепыралэ. Зоялэн фамилиез бигер шуыса, лэся, сое асьсэ выжыысь кожаллязы.

Бигер музъем вылын вордскемъёсты, дас куать аресазы паспорт басьтыкузы, сельсоветын ужасьёслэн одно ик бигер шуыса гожтэмзы потылӥз. Монэн но сыӵе учыр луиз. Но мон чутрак пумит луи — Кукморысь паспортной столэ гожтэт келяй, монэ бигер эн гожтэ, шуи. Казане дышетскыны пыремме тодыса, отысь ужасьёс мыным гожтэт ыстӥллям: выжыдэс бигер шуиды ке, тӥледыз дышетскыны капчиен кутозы. Экзаменъёсмес умой сётъямы. Доре шумпотыса бертӥмы. Мынам пичи дырысеным потэ вал филолог луэме. Папамы Иван Елисеевич Караваев дышетӥсь вал бере, мыным меӵак шуиз: мамаедлэн сюрестӥз мынод. Мамамы Мария Архиповна школаысь библиотекаын ужаз. Ас вакытаз со Ижысь культпросветучилищеын библиотекаре дышетскем. Соин, библиотекарьлэсь ужзэ валаса, быдэ вуи. Туж трос книга-газетъёсты, чеберлыко литератураез лыдӟиськомы вал. Дорамы но библиотекамы бадӟым вал.

Папамы Алнаш ёросысь Ново-Троицк гуртын вордскемын. Елабугаысь пединститутэз йылпумъяса, егит пияшез ужаны келяллям Татариысь Кукмор ёросэ. Ужаны шедем Ошторма-Юмья гуртэ. Отын со физикалы дышетӥз. Мурт музъемысь яратонзэ шедьтыса, со палъёсы ик весяклы улыны кылем. Мамаеным соослэн 13 арес виссы вал. Бадӟым классъёсын дышетскыкуз, папамы сое но дышетыса вуттэм на али. Папамы ож лудэ но ветлэмын. Гурт калык гажа вал сое. Жаляса верано, 1998-тӥ арын улонысь кошкиз.

Папамылэн вордскем гуртаз маке мында ӵыжы-выжыосыз кылемын. Ми соосын ог-огмы доры кунояны ветлӥськом. Егит дыръяз со туж чебер, йӧно, шаплы вылэм. Тупалась лыктэм казакпилы (Удмуртиысь вуэмъёсты озьы шуо) гуртысьтымы вань егит нылъёс синмаськыса улӥллям. Вылаз ик, со туж визьмо но вал. Адямиос дораз котьма ласянь визь-нод юаны ветлылӥзы.

Дышетскон ласянь со монэ туж зол кутӥз. Нуналлы быдэ  урокъёсме юалляз. Тон, пе,  мукет пиналъёслэсь бере кыльыны кулэ ӧвӧл. Милемын мамаен папа дорын ӟуч кылын вераськылӥзы. Палэнэ дышетскыны кошкимы ке,  ӟуч кылэз, пе, умой мед тодомы. Ульчаын эшъёсынымы удмурт сямен лабыртылӥмы. Бигер кылэз но ӟеч тодыса, будӥмы. Пересь анаймы милемын бигер кылын гинэ вераськылӥз. Куинь сузэр-апайёс, пичиысен куинь кылэз тодыса, будӥмы.

Мон — бадӟымез. Шоретӥез — Таня сузэре — Свердловск улосысь Карпинск городын улэ, аптекаын ужа. Пичиез — Ритамы — мынэсьтым адӟем кариз, лэся, Казаньысь культурая институтэз йылпумъяз. Библиотекарь луиз. Ужаны Ижысь радиотехнической лицейлэн библиотекаяз шедиз. Нош монэ келязы вал Гайдар нимо нылпи библиотекае. Дас куать ар отын ужай. Тау карисько отысь  кивалтӥсьёслы но ӵош ужам эшъёсылы, соос монэ та удысэз эшшо но мургес гажаны но яратыны дышетӥзы.

— Удыстэс азьланьтӥды Ижысь медакадемилэн библиотекаяз. Таиз ужды, огшоры библиотекаын сярысь, пӧртэмгес вал, дыр, ук?

— Татын мон 1997-тӥ арысен ужасько ини. Секыт вал тодымтэ, музон уже кутскыны. Нырысь ик монэ книгаосты возён интые (хранилищее) пуктӥзы. Та уже туж мӧзмыт потылӥз. Озьы ке но, нылпи библиотекаын сямен ик, ялан общественной ужен вырылӥ. Куасэн бызьылонъя ӵошатсконъёсы али ке но пыриськылӥсько. Спортэз гажанэ пичи дырысеным лулам-вирам пыӵамын ни, луоз. Школаын дышетскыкум но, пӧртэм кроссъёсы но ӵошатсконъёсы пыриськылӥ. Нырысетӥ радэ потамъёсы понна уно гинэ данъян грамотаосы но синпель кузьымъёсы вань.

Бӧрысь монэ научной литературалэн абонементаз поттӥзы. Та отделын ини ми ужаськом преподавательёсын но аспирантъёсын.

— Та ӧр нимысьтыз тодэм-валамез кулэ каре, дыр, ук?

— Со понна трос лыдӟиськоно. Адями кыӵе-мар книга куре, ми сое тодыны кулэ. Методикаез, научно-популярной литератураез ӟеч валано. Кылсярысь, сое тодытэк, уд вала, кыӵе книга кулэ, сахарной диабетэн висисьёсты эмъяку яке вирзӥбетэн курадӟыку. Ми озьы ик ужаськомы книгаослэн номеръёссы бордын.

Отделамы монэн ӵош тырше Надежда Колесникова. Оглом библиотекаез ке басьтоно, 25 кузя ужаськомы. Удмуртъёсмы кык гинэ: мон но Ирина Михайлова. Студентъёс но, преподавательёс но удмурт кылын кыӵе ке ужрад дасяло ке, ми доры вазисько. Ирина Михайловна мыло-кыдо адями, тыпыр-тапыр гинэ уж борды басьтӥське. Быгатэммыя соослы котьку юрттыны тыршиськом. Пичи дырысен удмуртлыкез гажаса но яратыса будэменым, дыр, одӥг концертэз но, ужрадэз но ӧй кельтысал. Но ваньмон дыр туж ик уг шедьылы. Уж дорамы милемын чылк-чылк анай кылын верасько академиысь тодосчиос-преподавательёс: Апполинария Перевощикова, Вера Осотова, Иван Кузнецов… Вазенгес дорамы Григорий Шинский ветлэ вал. Со котьку но шуылӥз: кыӵе тӥляд тунсыко ужды, литератураез сяна, трос тодоно научной гожъямъёсты но.

— Соос вӧзын тӥледлы эмъяськон ласянь но капчигес, дыр?

— Озьы. Тодӥськод ни кинлы вазиськыны. Тани ректормы но Николай Стрелков — удмурт адями, мыло-кыдо пыриське «Удмурт кенеш» огазеяськонлэн ужъёсаз. Туж ӟеч кивалтӥсь, котькыӵе юанэн солы вазиськы: быдэстоз, лэсьтоз, малпалоз.

Библиотекаенымы быгатыса кивалтэ Ляля Волкова. Адямиез чик тоно-моно карыса уг люкы. Ляля Фаритовнаен ми Казаньын ӵош тодон-валан басьтӥмы вал.

— Нырысь учкыса, библиотекарьлэн ужез секыт ӧвӧл: ӝӧк сьӧрын лыдӟиськыса пуке,  книга сётъя.

— Тросэз озьы малпало. Но отын сомында тодоно. Пӧртэм кенешъёс, ужрадъёс, лыдӟиськон ӝытъёс радъялляськомы. Доре бер ӝыт сяна вуыны уг луы. Ужмы лачак. Лулысь-сюлмысь тыршемме адӟыса ик, дыр, культура удысысь дано ужась ним сётӥзы.

— Культура удыс тӥледлы мукет палыныз но матын. 

— Озьы, ми ваньмы пичи дыръямы ик сцена вылын кырӟаськомы вал ини. Дорын но ялан, концерт пуктыса, шудылӥмы. Мамаен папа милемыз артистъёс гинэ шуылӥзы. Школаын дышетскон вакытамы гуртын пукон дырез ик ӧм адӟылэ, ялан школа ужъёс, олокыӵе но ужрадъёслы концертъёс дасяллямы, слётъёсы, пионерлагерьёсы ветлылӥмы.

Казаньын дышетскыкум, концерт учкыны консерваторие юромо ветлылӥ. Сыӵе со мыным кельше вал.

— Парлы пар, шуо. Та ласянь удалтӥз-а улонады?

— Кузпалы мынам туж умой адями вал. Сямыз ӟег нянь но тӥни. Сыӵе пиез мыным вордӥллям Юкаменск ёросысь Бадӟым Вениж гуртын. Валера огшоры семьяын будӥз, анаез но, атаез но колхозын ужазы. Пумиськимы Иже вуэммы бере. Мыным, егит ужасьлы, «Нефтемашлэн» общежитияз инты висъязы. Валера дышетскем Ижысь гурт удысъя институтын. Соку со «Нефтемаш» заводын  инженер луыса ужа ни вал. Солэн общежитияз ик улӥз но.

Ог суббота ӝытэ Алла эшеным эктон залэ васькимы. Отын калыкез лачак, дискотека мынэ вылэм. Со вие егитъёс пӧлы кык пиос пыризы: ӝужытэсь, йӧноесь, ӝикытэсь. Музон пиос сямен шӧмаськемын ӧвӧл. Милям соку ик синъёсмы ӝуатскизы. Эшме донгыса кадь лэзи: мын, шуисько, ӧть созэ эктыны. Нош ачим мукетыз шоры учкисько. Ярам, со ачиз ик монэ эктыны ӧтиз. Йырсиез сьӧд-сьӧд, бабля. Мон сое нырысь бигер пи кожай вал. Удмурт вылэм. Соку со монэн  вальсэз туж умой бергаз. Пайми, Валера эктонъя кружоке ветлэ вылэм. Бӧрысь монэ но сьӧраз кыскиз. Ар пала ми соин эшъяським, собере, сюанмес шудыса, улыны кунокуае потӥмы. Востэм сямо удмурт пиез папаен мама воксё асьсэлэсь пизэс кадь яратӥзы. Укыр сабырлы вал угось: ӧз но юы, ӧз но кыскы. Киосыз зарни вал, котькыӵе ужез валаса но быгатыса лэсьтылӥз. Тупаса улӥмы. Оло, соин но милемлы ваньмыз вожъяськылӥзы: сыӵе кузпалъёсты утчаса но уд шедьты, шуылӥзы. Валера арлыдызъя мынэсьтым бадӟымгес вал бере, соин, лэся, ки йылаз нуллыны дась вал. Котьма ласянь монэ жалялляз. Андрей но Ваня посмес будэтӥмы.

Кыкнамылэн но гуртъёсмы кыдёкын шуыса, сад-бакча басьтӥмы. Туж мыло-кыдо, шумпотыса отчы ветлӥськомы вал. Валера мон сямен ик мунчое пырыны яратылӥз. Нылпиосмылэсь лушкем удмурт кылын лабыртылӥмы. Табере соос кыкназы но удмуртэз туж умой валало ини. Ӵошенназылэн ик угось пичи  дырзы мама дорын ортчиз. Городэ вуыса, нылпи садэ мыно но нош ӟучомо. Мон егит дыръям малпалляй, Иж — со быдэсак удмурт город, ваньмыз отын анай кылын верасько шуыса. Янгышаськем.

Жаляса верано, Валерае ӧвӧл ни. Сюлэмыз ляб вылэм. 2003-тӥ арын улонысь шӧдтэк шорысь кошкиз.

— Пиосты мар ужало?

— Соос кыкназы но ИжГТУ-ын вылӥ тодон-валан басьтӥзы. Атайзы кадь ик визьмоесь. Кыкназы но компьютер бордын ужало. Семья ӧз на кылдытэ.

— Улон азьлань мынэ. Яратоно адямидэс ыштыса, тӥ асьтэлы эш шедьтӥды, выльысь семья кылдытӥды на.  Сыӵе вамыш лэсьтыны кышкыт ӧй вал-а?

— Улон милемды, кема аръёс ортчыса, одӥг классын дышетскем пияшен пумиськытӥз. Со мыным запискаос гожъялля вал. Мон со кылъёслы нокыӵе ик ӧй кариськылы. Школаез йылпумъяса, Володя дышетскиз Казаньысь авиационной институтын. Одӥг пол но ми соин отын ӧм адӟиськылэ ни.  Доре бертылыку но, пумиськылыны ӧз кылдылы.

Кузпалы улонысь кошкем бере дас классэз йылпумъяммылэсь 30 ар тырмонзэ пусйизы. Ялан мӧзмыса пукод-а шуыса, мон но доре бертоно кариськи. Ваньмы сямен люкаськиськеммы. Володя но бертэм. Со милемыз туспуктэме пуктылӥз. Патретъёстэс, пе, почта пыр келяло. Ваньмылэсь адресъёсмес басьтӥз. Со ик луиз ваче гожъяськыны кутскеммы. Зэм, соку ӧй но малпа, милемды бӧрысь Инмар ӵош огазеялоз шуыса. Собере со мыным жингыртылыны ӧдъяз, отӥяз воксё но Иже вуиз. Городмы солы туж кельшиз. Соку ик удмурт концертъёсы но спектакльёсы ветлыны кутским. Пичи дыр эше огазеяськыны ӵектӥз. Пумит ӧй луы. Пиосы монэ соку ик валазы: шонер, пе, лэсьтӥськод, огнад эн кыльы. Озьы мон Фадеева луи.

Любовь Тихонова.

Удмурт Дунне
By Удмурт Дунне 25 октября, 2011 09:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<