Луоз ай курка сӥль но

Удмурт Дунне
By Удмурт Дунне 26 октября, 2011 08:10

Удмуртиын эскериське курка будэтон гид лэсьтонъя ужпум. Солы кутӥськозы кунгож сьӧрысь инвестициос.

Та пумысен кенешизы Правительстволэн Тӧроез Юрий Питкевич но Литваысь «АРВИ» компанилэн валтӥсь директорез Видмантасом Кучинскасом.

Фермалы инты висъяны чакламын Сарапул ёросысь Уральский каргурт дорын. Проектэз дасясьёслы со кельшиз. Угось отын вань коммуникациос: тыл, ву гумыос, газ, чугун но асфальт сюресъёс. Гуртын 2,5 сюрс улӥсез, нош ужаны нокытын. Соин ик ужась киос но сюрозы. Проектэз улонэ пыӵатыса, араз 6 сюрс тонна курка сӥль поттыны луоз. Со сяна, асьмелэнъёс но Литваысь компания эскеризы на та ферма борды ик комбикорм поттон предприятие но кылем-мылемъёсын ужанъя цех усьтон проектъёсты.

«АРВИ» компания бордаз огазея Литваысь, Румыниысь, Украинаысь, Россиысь, Латвиысь но Хорватиысь 22 предприятиез. Али Башкириын ӝутӥське курка сӥль поттонъя комплексэз.

Иван Аркашев.

Удмурт Дунне
By Удмурт Дунне 26 октября, 2011 08:10