Кышно вӧзын улон майбыр

Удмурт Дунне
By Удмурт Дунне 12 октября, 2011 11:39

Кышно вӧзын улон майбыр

Котькуд нуналлы, часлы, минутлы быдэ адямилэн мугорыз нюръяське — пӧртэм бактериослы, вирусъёслы, паразитъёслы тазалыкмес сӧрыны уг сёты. Но куддыр иммунитетмы но коска. Мар кароно сое ӝутон понна? Та пумысен тодон-валанзэ шарая Республикаысьтымы вакцинопрофилактикая центрысь аллерголог-иммунолог Денис КОРНИЛОВ.

Иммунитет кык пӧртэм луэ:

♦ нырысетӥез — врождённой — кыстӥське ог куать толэзь: вож нуны пушкын улэ анай йӧлын пыӵам иммунитет. Кыӵе мумизлэн тазалыкез вал, сыӵе ик луоз покчилэн но. Малы ке шуоно йӧл тодаз возе кузёезлэсь троссэ висёнъёссэ. Анай йӧлын вань кужымез ӝутӥсь 80-лэсь ятыр суретъёсыз: иммуноглобулин, интерферон, олигонуклеотид, олигосахарид — ваньмыз таос луонлык сёто нылпилы таза будыны. Та сяна, йӧлын вань на лактоферрин. Со тэшкылилэн вань лулпырыосаз тырмыт омыр, железо вуттэ, иммунитетсэ ӝутэ. Туала смесьёс, жаляса верано, та ласянь ушъяськыны уг быгато. Ӝыны ар ортчыса, пичильтоклэн мугораз воштӥськонъёс ортчо — нунылэн аслаз иммунитетэз ужаны ӧдъя;

♦ кыкетӥез — приобретённой — кылдэ нылпи пӧртэм висёнъёс пыр потэм бере. Иммунитет тунсыко маке: вирусъёсын, бактериосын котькуд пумиськемзэ тодаз возе. Озьы черъёс мугоре шедё ке, ӟеч лулпырыос уродъёссэ ӝогак быдто. Но куддыр таослы пумит нюръяськыны адямилэн кужымез уг тырмы — висьыны усе.

Кызьы иммунитетлэсь шальтрамзэ валано?

♦ ужын-дорын ӝог жадёно

♦ весь изем потэ, но со вакытэ ик умме усем уг луы

♦ быгытъёс, лыӟечыранъёс кӧс висьыса уло

♦ кынман висёнъёсын ӵем курадӟоно (бадӟымъёс ар ӵоже — 4-6 пол, нылпиос — 6-лэсь ятыр)

♦ ымдуре герпес ӵем бычыралля.

Адямилэсь нюръяськон кужымзэ быдто:

♦ кырсь омыр

♦ куазьлэн ӵем вошъяськемез

♦ секыт мылкыд (стресс)

♦ урод сямъёс (юон, кыскон, шузимытӥсь суретъёсын кушласькон)

♦ умойтэм сиськон

♦ пурысьтатӥсь губиос

♦ таос вӧзы ватсасал на вырӟисьтэм сяммес — бызьылыны-тэтчаны мылмы уг поты.

Кызьы иммунитетэз ӝутоно?

1. Витаминъёс сиёно. Соос туж умой антиоксидантъёс луо — мугорысь вань жобзэ потто. Нош пушмы чылкыт ке, озьыен, бордамы микробъёс но чуканы уз быгатэ.

2. Тазалыкмылы бадӟым пайда вае кезьыт вуэн гылъяськон. Но та борды басьтӥськоно чакласькыса. Тодын возёно куд-ог куронъёсты:

♦ кезьыт вуэн пыласьконо котькуд нунал

♦ чар-чар ву борды шуак кутсконо ӧвӧл. Шуныт вуэз (бадӟымъёслы 20 градус котыр, пичиослы — 18) каллен-каллен салкыматоно

♦ гылъяськыны ӟеч вакыт — ӵукна. Угось соку мугор шуныт на. Кезьыт вуэ пырыса, сэръёс шуак шымырско — аспӧртэмлыко гимнастика луэ. Куд-ог адямиос изьыны выдон азязы кезьыт вуэн гылтӥсько. Тае умоен уг лыдъяськы. Малы ке шуоно соку гань-гань кариськем лулсэр сайка — умме усьыны кема выроно

♦ нырысь коттоно пыдъёсты, собере — пульпумъёсты, быдэс мугорез. Гылъяськемлэн пайдаез бадӟымгес луоз, со бӧрсьы мугордэс ӵушконэн куаш-куаш кӧсатӥды ке

♦ таин вырыны уг яра, тазалыкты чутэ ке: нырды тыремын, температурады ӝутскемын, ньылонды гордэктэмын, кызӥськоды

♦ нылпилэсь быдэс мугорзэ коттоно ӧвӧл, тырмыт луоз, киоссэ-пыдъёссэ кезьыт вуын ӧжытак возьыса гинэ но

♦ пыласьконо сиськемлэсь азьвыл, нунал куспын котькӧня пол

♦ мугорез куасаллям бӧрсьы кезьыт вуэ шуак пыроно ӧвӧл

♦ кезьыт ву иммунитетэз гинэ уг ӝуты, куэз умоятэ — целлюлитэз быдтэ, мылкыдэз ӝутэ.

3.  Тросгес поръяно, бызьылоно. Но мугорез сокем зол катьтэммытоно ӧвӧл.  Бадӟым  спортысь батыръёс юн иммунитетэнызы ушъяськыны уг быгато — тренировкаослы, ӵошатсконъёслы мултэс трос кужымзэс сёто.

4. Вакчи-а, кузь-а кыстӥське стресс — ӟигарез огкадь быдтэ. Угось сыӵе вакытэ мугорын катехоламин сурет трос люкаське. Со ӟеч лулпырыосты сие. Соин ик таза луон понна уродзэ пушкын возёно ӧвӧл, керетонъёслэсь палэнсконо.

Казакпиослы ӵектысал ӝоггес кузпалъяськыны. Угось тодмо ини: кышно вӧзын улӥсь воргоронъёслэн иммунитетсы юнгес. Малы? Соос котыртӥ урод мылкыд шергес гожеръялля.

5. Бакчаосамы, тэльёсамы тазалыкмылы пайда вайись турын-куаръёс, емышъёс маке мында. Пӧлысьтызы уноез иммунитетэз ӝутыны юртто. Кылсярысь, горд палэзь, виноградлэн тысез, алоэ, каланхоэ, узыпуд, лыс, кужмоятӥсьтурын (девясил) но мукет. Таосты парыса, чай интые юыны яралоз.

Ольга Корепанова.

Удмурт Дунне
By Удмурт Дунне 12 октября, 2011 11:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<