Кытын улэ шуд?

Удмурт Дунне
By Удмурт Дунне 25 октября, 2011 09:20

Кытын улэ шуд?

Наталья Хачирова Сарапулысь нылпи юртысь Таняен. Нылаш туэ аслэсьтыз семьязэ шедьтӥз.

«Мынам Удмуртие» телеканалын котькуд арняе мынэ «Право на счастье» передача. Со сӥземын анай-атайтэк кылем пиналъёслы, мурт нылпиез вордыны басьтэм но трос нылпиё семьяослы. Передачаез дасян бордын ужа тележурналист Наталья Хачирова.

— Мон кема аръёс ӵоже ужай иворъёсты дасян бордын, мукет программаос но лэсьтылӥ. Анай-атайтэк кылем нылпиос сярысь нимаз предачаос ӧвӧлысь малпан кылдӥз проект гожтыны. Уката ик берло дыре Россиысь телевидениын но юрттэттэк кылем пиналъёслы бадӟым саклык висъяны ӧдъязы. Аслам но кык нылъёсы будо — 14 но 11 аресъем, соин ик палэнэ кылем ӧз поты та сюлэмшугъяськытӥсь ужпумлэсь.

Озьы кык аръёс талэсь азьло кылдӥз «Право на счастье» проект. Пӧртэм министерствоосы, ведомствоосы возьматэммы бере сое синйылтӥз Удмурт Правительствоысь Семья ужпумъёсъя но демография политикая комитет. Телевиденилэсь проектсэ ӟечен лыдъяз, пыртӥз Удмуртиысь демографияя вить аръем программае.

Передача азьын сылӥсь валтӥсь ужпум — интернатъёсысь, нылпи юртъёсысь тросгес пиналъёсты семьяосы интыян. Кыкетӥез ужпум — возьматоно семья улонлэсь дунлыксэ. Кин ке мурт нылпиосты патронат, опека амалэн будэтэ яке приёмной семья луэ. Вань трос пинал вордӥсьёс. Самой соос ик мынам геройёсы. Кудӥз ке, оло, калыкын тодмо ни, кин ке мукетъёсызлэсь номырин уг висъяськы. Но соосты ваньзэс герӟа нылпиосты яратон.

Кусып возиськом Дышетонъя но наукая министерствоен, городъёсысь но ёрос администрациосысь опекая но попечительствоя ёзъёсын, школа-интернатъёсын но нылпи юртъёсын. Соос пыр ик шедьтӥськомы геройёсмес.

— Наталья, шуге-леке усем семьялы проектъя кыӵе ке но юрттэт висъяны чакламын-а?

— Проект борды басьтӥськыкумы, ми ас азямы ужпум ӧм пуктэ кинлы ке но юрттэт сётыны. Но программа пыр кыӵе ке ужпумъёсты вырӟытыны луиз ке, со туж умой ни. Тани одӥг нылкышнолэн учырезъя чиновникъёс котырес ӝӧк сьӧры пуксёно луизы. Огъя кылэ вуыса, семьялы юрттэт сётэмын вал.

Проектмы улонэ пыӵам дырысен ӝоген быдэс ар тырмоз ни. Та дыр куспын ньыльдон пала программа дасямын, семьятэк кылем кызь нылпи возьматэмын. Шумпотымон, нылпи юртъёсысь вить пиналэз семьяе басьтӥзы ни.

— Программаосты дасян понна трос семьяосын, специалистъёсын пумиськылӥды ни. Огъя луись кыӵе шуг-секытъёс возьмало мурт пиналэз доразы басьтэм анай-атайёсты?

— Нырысь ик, анай-атайлы но, пиналлы но психология ласянь ог-огзылы секыт дышыны. Уката ик нылпилэн арлыдыз бадӟымгес ни ке, нош сое вордыны басьтэмъёс нырысьсэ таӵе вамыш лэсьтӥзы. Куд-огез малпало, пиналэз нылпи юртысь басьтом но шудо каром сое. Нош улонын озьы гинэ уг луы.

Семьяе басьтыса, пиналлэн висёнъёсыз нокытчы уг пыро, сьӧраз лыкто. Сямъёсыз, улон шоры учконэз но нылашлэн яке пияшлэк кылдэмын ни — вож дыръяз ӧвӧл ке басьтэмын. Вань на мукетыз: мурт нылпиез вордон шоры асьсэлэн анай-атайёслэн учконзы трослы воштӥське, трос кужымез но дырез сётоно угось пиналлэсь сюлэмзэ шунтон понна. Ваньзэ тае капчиенгес пырпотыны юрттэ мурт нылпиез вордӥсь анай-атайёслэн школазы. Татын соосын ужало пӧртэм специалистъёс. Иж город администрациен усьтэмын «Берег» нимо школа. Шоркарын ик ужа шаерын улӥсьёслы кылдытэм школа. Но гуртоос шугъясько мынон-ветлон ласянь, озьы ик коньдон ужпумъёс люкето пӧртэм специалистъёс доры вуыны.

Анай-атайёс ласянь  мон нырысь ик таӵе янгышъёсты пусйысал. Пиналэз доразы вайыса, куд-огез соку ик сое шудо карыны турттэ. Шуом, вань куронъёссэ быдэстыса, котыраз бергало, созэ-тазэ басьто. Нош азяз кыӵе ке куронъёс пуктоно луэ ке, кутско ини шуг-секытъёс. Нылпи соосты кылэмысь дугдэ, ассэ гинэ адӟе. Соку ини анаен атай малпаськыны ӧдъяло: шонер-а лэсьтӥм, та пиналэз семьяямы басьтыса?

Куд-огез пумит луо зэмос анай-атаеныз адӟиськонлы. Психологъёс шуо: нылпи тодыны кулэ ас выжыоссэ, отын номыр уродэз ӧвӧл. Но монэ тужгес сюлмаськытэ вордосэ басьтэмзэс ватыны турттон.

Тросэз малпало, нуныез ас вылазы гожтӥзы ке, со сярысь нылпи юртъёсын, опекая но попечительствоя ёзъёсын гинэ тодозы. Но котырысь адямиослэсь ӵемысь номыре уд ваты. Мурт анай-атай вӧзын будэмзэ пинал палэнысь кылэ, уката ик улоназ шуг-секытъёс дыръя «сюлмоос» шедё. Пӧечи анай-атаез шоры нылпилэн  учконэз воштӥське, сыӵе дыръя семьяысь шунытэз ыштыны кема ик ӧвӧл.

Тодӥсько, монэным тросэз соглаш уз луэ, озьы ке но та югдур шоры мынам аслам учконэ. Берло дыре улон югдур воштӥськиз, сирота нылпиез вордонын номыр уродэз, возьытэз ӧвӧл. Сыӵе анай-атайёсын данъяськыны кулэ. Тросгес верамы, гожъямы ке соос сярысь, калыклэн мылкыдыз но воштӥськоз. Пинал ачиз но отысь ӟечсэ гинэ адӟоз. Мурт пиналэз будэтӥсьёс шоры калык пӧлын учкон ӟечгес луысал ке, анай-атай юрттэттэк кылемъёс трослы ӧжытгес луысалзы.

Та нуналъёсы ми пумиськылӥм Ижысь Светлана но Михаил Юдинъёсын. Кема аръёс ӵош улыса, егитъёс пинал вайыны ӧз быгатэ. Кык аръёс талэсь азьло нылпи юртысь басьтӥзы вить толэзьем нуныез, табере сое ас вылазы гожтыны малпало. Нокинлэсь ватӥськыны уг туртто.

— Мурт нылпиез вордӥсьёс сярысь ми но газетамы ӧжыт ум гожъяське. Тросэз соос пусъё гуртооссылэсь кырыж учкемзэс: коньдон понна, пе, басьто. Одӥгез паймытэ: малы соку озьы шуисьёс асьсэос уг будэто огназы кылемъёсты?

— Мон но таӵе учыръёсын одӥг пол гинэ ӧй пумиськылы ни. Соин но гуртын улӥсьёс сярысь передачаос лэсьтыны шугъяськоно. Малпало, вожъяськисьёс, кырыж учкисьёс шедёзы. Кыллы етӥзъёс асьсэос мед оскалтозы вал мурт пиналэз вордыны, солы сюлэм шунытсэс сётыны. Кыӵе воштӥсько пиналъёс, семьяе сюрыса! Шуом, кин ке огъёзъёсызлэсь бере кыле вал визьмызъя яке вераськыны шугъяське. Нош семьяын улыса, со пинал эшъёссэ но азьпалтыны быгатэ.

Мон трос пол вуылӥ ни школа-интернатъёсы, нылпи юртъёсы. ӧй шуысал: отын нылпиослы урод. Соос сярысь сюлмасько, вӧзазы яратӥсь адямиос. Но со яратон ваньмызлы уг тырмы. Семьятэк кылем пиналъёс трос, нош ужасез котькудӥз вӧзы уд пукты. Шудо луон понна нылпилы кулэ семья.

— Наталья, нылъёсты уг куро-а нылпи юртысь сузэр яке вын басьтыны?

— Мон ачим куинетӥзэ вайыны турттӥсько ай. Малпасько, трос нылпиё анай луон — со шуд. Аслад музъемед, улон коркаед мед луысал на. Таиз пумысен республикаямы ужъёс нуисько.

«Мынам Удмуртие» телеканалысь «Право на счастье» передачаез учкыны быгатоды котькуд четверге 20 час 40 минутэ.

Удмурт Дунне
By Удмурт Дунне 25 октября, 2011 09:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<