Кытчы ӧтё — мыноно

Удмурт Дунне
By Удмурт Дунне Октябрь 21, 2011 08:11

Кытчы ӧтё —  мыноно

Ёрос центръёсын дась юрттыны визь-нодэн но, коньдонэн но.

— Дышетсконме йылпумъяме бере арлэсь кема ортчиз ни, ёросамы дипломея уж уг шедьтӥськы. Семьяе ӧвӧл на, соин  сьӧрло но кошкыны дась. Кылэме вань, сыӵеослы уже интыянъя службаос нимысьтыз юрттэт сёто шуыса.

Ольга Булатова.

Ува ёрос.

Та юанлы пыр-поч валэктон сётэ Ува ёросысь Калыкез уже интыянъя центрысь специалист Ольга Дьячкова.

— Зэмен но, Удмурт Республикаысь ужъя рынокысь югдурез тупатон вылысь кутэм нимысьтыз программая (ВЦП) сыӵе юрттэт чакламын. Мукет интые ужаны выжисьёслы сётӥське кызьы ке визь-кенешен, озьы ик коньдонэн юрттэт. Зэм, одно ик лыдэ басьтӥське, сылӥськоды-а тӥ  учётын безработной сямен. Уд на ке, вазиськоно центре, зэм, таяз учыре малпандэс быдэстон понна дыр тросгес кулэ луоз. Специалистмылы вазиськыкуды, одно ик вералэ сьӧрлон ужаны мылкыддэс. Со юрттоз тӥледлы пӧртэм улосъёсысь вакансиос утчаны. Со сярысь тӥледлы одно ӝегатскытэк ивортылозы.

— Калык пумен дыше туала амалъёсты кутыны — асьсэос сайтъёс пыр утчасько. Шуом, Сочие ӧтё лэсьтӥськисьёсты, экскурсия ортчытъясьёсты. Сыӵе уж сётӥсьёсын тодматскыны-кенешыны ветлон вылысь коньдон висъяськоз-а?

— Уз. Кин тодэ, кыӵе солэн зэмос мугез, озьы кун коньдон чотын быдэс Россиез котыръяны луоз. Юрттэт сётӥське  уже интыяськисьёслы гинэ — со сярысь солэн документъёсыз луыны кулэ. Сыӵе дыръя, визь-нодэн юрттэм, уж сётӥсен кенешем, огкыл гожтыны юрттэм сяна,  келяно адямилы  коньдон компенсация тыриське.

— Мар отчы пыре, кӧня луэ быдӟалаез?

— Быдӟалаез котькуд учыръя пӧртэм, со сюрес дун бордысь потэ, угось кин ке интыяське бускель  улосэ, кин ке Москвае, кин ке Уйпала.

Билет дун сяна, берыктӥське поездын валес котырлы быдтэм уксё, пассажирез страховать карем взнос.

Озьы ик тыриське суточной нимаськись коньдон: 100 манет котькуд нунал понна. Но пусъем интые суткалэсь ӧжыт  мынӥсьёслы та уксё уг сётӥськы.

Выль интыын кунокуаын яке патерын улэм понна коньдон сётӥське Росссия Федерациысь Правительстволэн 2002-тӥ арын 2-тӥ октябре кутэм 729 номеро постановлениын юнматэм нормативъёсъя. Соя служебной командировкаын  улон инты понна  нуналаз  550 манетозь кутыны луэ. Но отчёт понна одно луыны кулэ зэмос расходъёсты возьматӥсь документъёс. Шуом, гостиница сылэ ке нуналаз 300 манет, солэсь трос уз сётӥськы. Документъёстэк (шуом, вань учыръёс, куке дунтэк инты сёто яке ӵыжы-выжыоссы, тодмооссы дорын уло) тыриське 12 манет (та лыдпус озьы ик юнматэмын 729-тӥ  постановлениын).

— Нош сьӧрло куриськисьёс трос луизы ке, луоз-а ваньмызлы юрттыны?

— Малпасько, луоз. Али сыӵе учыръёс трос ӧвӧл, адямиослы дышем интыысьтызы вырӟыны секыт, тросэзлэн ужтэк пукисьёслэн семьяоссы, юртъерзы вань. Нош мылкыд карисьёс трос луыку, бюджетысь коньдон нырысь ик висъяськоз  сокращение улэ шедемъёслы, специальностьсыя уж шедьтыны шугъяськисьёслы, асьме республикаысь ёросъёсы выжисьёслы.

— Куд-огез кышкало документъёсын бызьылонлэсь…

— Ваньзэ та ужез быдэстэ Калыкез уже интыянъя центрысь специалист.

— Нош палэнэ  келям адямиды  ужаз ке ӧз поты?

— Вань правоос но кыл кутон учыръёс огкылын пусъемын. Нялтас вераса, интыяськем бере но уж интыяз ассэ умойтэм возиз яке ас мылкыдызъя кошкиз ке, вань коньдонзэ берыктоно луоз. Со сярысь специалист  азьло ик пыр-поч валэктэ.

— Ольга Андреевна, таӵе  луонлык ВЦП сётэ ни  куинетӥ арзэ. Вань-а ёросысьтыды кошкисьёс?

—  Быдэс элькунмыя учконо ке, Ува ёросын югдур урод  ӧвӧл кадь, но  кошкисьёс вань: 2 ар но 9 толэзь ӵоже  та программае пыриськиз  8 мурт.

2009-тӥ арын ёрослэн палэназ кошкиз 3 мурт: кыкез Краснодар улосэ, огез — Нижний Новгородэ. Эдуард А. интыяськиз  Новороссийскысь  чорыг калтон компание,  Анна А. — отысь кафеысь официантэ. Иван П. — Нижний Новгородысь экологияя центре инженере.

3 муртэ сьӧрло интыян понна бюджетысь висъямын 106 сюрс 227 манет.

Кылем арын милям службамы пыр палэнын уж шедьтӥз кыкез. Николай М. 20 ар ӵоже ӟеч интыын тыршиз, валтӥсь инженер, участоклэн начальникез, мастер вал, но «Удмуртдорстрой» огазеяськонын воштӥськонъёсын валче со кошконо луиз. Москваын ас удысэзъя ик уж шедьтӥз, участокъя начальнике кутӥзы.

Валентина С. али тырше Краснодар улосысь Тимашевск городын делопроизводительын.

Озьы 2010-тӥ арын 104 сюрс 330 манет кулэ луиз.

Туэ та дырозь программае пыриськиз 3 мурт. Елена К. кошкиз Татарстанысь Набережные Челны городэ. Ужа курьерын. Ёросамы кылиз нылпиез, но нылкышно ӝоген сое сьӧраз нуыны малпа, уго отын улонэз пумен радъяське ни.

Оксана Л. Уваын ужаз «Увадрев-Холдинг» огазеяськонын валтӥсь мастер луыса. Малпаз Тольятти городын шудзэ утчаны. Интыяськиз жилищно-коммунальной компание инженере.

Анна С.  Ижысь гурт удысъя академиын пудо эмъясьлы дышетскиз, туэ диплом басьтӥз. Но Уваын удысэзъя инты ӧз сюры, нылмурт инты шедьтӥз Сарапулысь, али отысь пудо эмъянъя клиникаын ас удысэзъя  тырше.

Туэ кыдёке кошкисьёс ӧй вал бере, коньдон трос ӧз кошкы — ваньмыз 37 сюрс 333 манет гинэ.

Огкылын вераса, утчаськиськод ке, маке но сюре. Та амал тужгес тупамон егитъёслы: кин тодэ, кытын тынад шудэд.  Дорын пукыса, нокин  ки  вылаз ваньбур уз вайы. Нош татын сюлмаськонзэ но,  расходъёссэ но ас вылаз кун басьтэ.

Галина Антонова.

Удмурт Дунне
By Удмурт Дунне Октябрь 21, 2011 08:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<