Куно пумиталомы ӵемгес

Удмурт Дунне
By Удмурт Дунне 18 октября, 2011 09:18

Куно пумиталомы ӵемгес

Футболъя школаын.

13-тӥ октябре Ижевске вуылӥз Россиысь мугорез кыдатон культурая, туризмъя но егитъёсын ужан политикая министр Виталий Мутко. Шаерысьтымы спорткомплексъёсын тодматскиз, оскытӥз, матысь дыре капчи атлетикая Россилэн чемпионатэз Удмуртиын ортчоз шуыса. 

Россиысь куд-ог министръёс шаерамы 2-3 пол вуылӥзы ини, Виталий Мутко — нырысьсэ. Александр Волков таиз министр доры трос пол йыгаськылӥз, спортсменъёслэн вормонъёссы, шаерамы спортлэн азинскемез сярысь вераз, юрттэт куриз. Озьы Виталий Мутко ас синмыныз адӟоно кариськиз Ижысь спортъя объектъёсты.

Ижысь «Зенит» стадионэз адӟыса, Россиысь министр паймиз. Малы, пе, капчи атлетикая Россилэсь чемпионатсэ куинетӥзэ Чувашиын ортчытоно? Удмуртиын но куно пумитаны луонлык вань. Пыдын бызьылон инты — манеж — синмаськымон. Стадион котырын ик трос аръёс ӵоже лэсьтӥське ни бадӟым йӧ каток. Сое липет улэ пыртыны но йылаз-пумаз вуттыны 200 миллион манет кулэ, шуиз Александр Волков. Вуоно аре лэсьтӥськон ужъёсты йылаз-пумаз вуттыны чакламын.

Котырес ӝӧк сьӧрын пумиськон дыръя но сюлмаськытӥсь ужпумъёсты эскеризы. Удмуртия пыриськоз «Огъя Россия» партилэн спорткомплексъёс пуктылонъя проектаз. Удмурт Республикаысь ёросъёсысь спортъя объектъёсты возьматыку, Александр Волков пусйиз, Удмуртиысь спорт арысь аре азинске. Берло дыре гинэ шаерамы 12 стадион, 9 куас база пуктэмын. Ас кужыменымы Ижын футболэн шудонъя школа лэсьтэмын. Та вакытэ отын 800 пинал мугорзэ кыдатэ. Азинсконъёс басьтыны кутскиз футболэн шудонъя «Зенит-Ижевск» клуб. Шумпотоно, футболистъёсмы пӧлысь 70 процентэз асьме шаерысь луо. Озьы ик Удмуртия кыл кутэ Россиысь сборнойлы куасэн бызьылӥсьёсты но биатлонистъёсты дасян ласянь.

Удмуртиысь спортсменъёслэн сюлмаськонъёссы трос на. Следж-хоккеен шудӥсьёсмы кылем арын Россилэн чемпионатаз вормизы, нош мугорзэс кыдато инбам улын. Конькиен нискыласьёс но Татарстанысь Агрызэ ветло. Арлы быдэ асьме шаерын ортче «Ижысь винтовка» ӵошатскон. Биатлонистъёсты дасянъя школа кылдытэмын ке но, бызьылон сюресъёсыз но ыбылӥськон интыез туала куронъёслы уг тупало. Шаерысьтымы ыбылӥськисьёс но мурӝолъёсын быгатонлыкъёссэс кыдато. Озьы бере, лэсьтоно ужъёс трос, но ваньмыз пыкъяське коньдонлэн тырмымтэез борды. Александр Волковлэсь верамъёссэ Россиысь министр сак кылзӥз.

— Гуртысь спортэз азинтонлы бадӟым саклык висъямдылы шумпотӥсько, — шуиз Виталий Мутко. — Тужгес но синмаськи Иж ӵыпет дорысь великен ворттылон интыдылы. Куд-ог улосъёсын стадион лэсьтыны но ас кужыменызы уг вормо, великен ворттылӥсьёс сярысь верасез ик ӧвӧл. Шумпотӥсько, Удмуртиысь спортсменъёс Россиез ӝутыны юртто. Тыршемды дунъямын луыны кулэ. Удмуртиын спортэз азинтон вылысь 2006-тӥ-2011-тӥ аръёс ӵоже Россилэн бюджетысьтыз 300 миллион манет гинэ висъямын. Умгес дунъяське вылэм ужамдэс, вуоно арысен югдур тупатскоз. Удмуртия пыртэмын луоз 7 улос пӧлы, кудъёсызлы Дуннеысь банк коньдон висъялоз спорт объектъёс пуктыны.

Россиысь спортсменъёс вылӥ дунъяло «Чекерил» спорткомплексэз. Татын нимысьтыз сюресъёс кылдытэмын сноубордэз яратӥсьёслы. Шумпотоно, Удмуртиысь спортсменъёслэн вормонъёссы та удысын но вань. Январе «Чекерилэ» люкаськоз Россиысь сноубордистъёслэн командазы. Азьланяз шаерамы ортчытыны чакламын Европаысь но дуннеысь ӵошатсконлэсь этапъёссэ.

Нимысьтыз вераськизы А. Демидов нимо спорткомплекс сярысь. Та вакытэ отын уй но нунал лэсьтӥськисьёс тыршо. Сое выльдонлы Удмуртилэн бюджетысьтыз 250 миллион манет висъямын. Декабрь толэзе ортчоно «Ижысь винтовка» куноосты пумитаны кулэ ни выльдэм комплексын.

Ижын улӥсьёслэн пӧртэм интыосын мугорзэс кыдатыны луонлыксы вань. Вуоно арысен бадӟым саклык висъяськоз шаерысьтымы мукет городъёслы. Россия юрттоз Вотка, Сарапул, Глазов городъёсын бассейнэн, бадӟым залэн но йӧ катокен комплексъёс пуктонлы. Матысь дыре лэсьтӥськон борды кутскозы. Оскем потэ, спортэз азинтонлы Россия ласянь бадӟымгес саклык висъяськиз ке, шаерысьтымы кужмо спортсменъёслэн лыдзы эшшо но йылоз.

Валентина Емельянова.

Туспуктӥз Константин Ившин.

Удмурт Дунне
By Удмурт Дунне 18 октября, 2011 09:18