Куара уз ыш сюрес вылын но

Удмурт Дунне
By Удмурт Дунне 14 октября, 2011 09:57

— Кызьы калыкез пырто  быръён списокъёсы?

С. Лебедева.

— «Россия Федерациысь быръён праволы гарантиос но  референдуме пыриськон право сярысь» федерал законъя избирательной участокъёсысь списокъёсы адямиосты пырто, улон интызэс чакласа; списокъёсы озьы ик пыртыны луэ огдырлы улон интыя пусйиськемъёсты (временное пребывание) но открепительной удостоверениен муртъёсты — таяз учыре адями ачиз, участоке лыктыса, ивортыны кулэ.

 

— Ку но кытын мон тодматскыны быгато бырйисьёслэн списокенызы?

М. Соболев.

— Интыосысь быръёнъя комиссиос куара сётӥсьёслэсь списоксэс дасяны кулэ быръён нунал дырозь 20 нуналлэсь азьвыл. Соин тодматскыны быгатэ та участокын улӥсь котькудӥз быдэ вуэм мурт. Янгышъёс  сюрыку яке нимтулыз списоке шедьымтэ дыръя со вазиськыны быгатэ комиссие. Гражданинлэсь сыӵе куронзэ комиссия 24 час ӵоже эскерыны-тупатыны кулэ, янгышъёс быръён нуналэ шараяськыку — 2 час ӵоже.

 

— Быгатӥсько-а мон аслэсьтым куараме  мукет участокын сётыны?

М. Меркушева.

— Ялан улон интызылэсь палэнын куаразэс сётыны быгато  кыӵе ке мугъя  сьӧрлон огдырлы пусйиськемъёс, частьсылэсь палэнын службазэс нуись военнослужащийёс, вис карытэк ужась предприятиосын тыршисьёс, куара сётон дыре сменазы укшаку. Но со понна гожтыса ивортоно быръёнъя комиссие куара сётытозь куинь нуналлы вазьгес.

 

— 4-тӥ декабре мон командировкаын луо. Кытысь  басьтоно открепительной удостоверение?

М. Кузнецов.

— Сыӵе документ басьтыны тӥляд луонлыкты вань улосвылысь (территориальной)  быръёнъя комиссиысь куара сётон дырозь 45-20 нуналлы азьло. Соос интыяськемын  ёрос центръёсын. Яке 19 нуналлы азьло интыысь (участковой) комиссиысь. Таосыз интыясько улон интыдылы матын.

Открепительной удостоверение сётӥське заявлениея гинэ, отын тӥ пусйыны кулэ  сое курон мугдэс. Басьтэмды бере та бумагаен быръён нуналэ куарадэс сётыны быгатоды сюрес вылын но — вазиськоно луоз матысяз участоке.

Со сяна, открепительной удостоверениос сётӥськыны быгато эмъюртын кыллисьёслы, пытсэт сьӧрын пукисьёслы учреждениысь администрацилэн доверенностезъя нимысьтыз оскем мурт пыр.

  Дасяз Ижысь Ленин ёросысь быръёнъя комиссилэн

тӧроез Валентина Рылова.

Удмурт Дунне
By Удмурт Дунне 14 октября, 2011 09:57