Котькуд эмъясьлы — миллион!

Удмурт Дунне
By Удмурт Дунне 25 октября, 2011 08:52

Котькуд эмъясьлы —  миллион!

Пичи Пурга ёросысь Юськи санаторий.

Кылем даурысь 90-тӥ аръёсты кышкыт уйвӧтсэс кадь тодазы ваё на эмъясьёс: йӧнатон тӥрлык вужмемын-куашкамын, больница боддоръёс пурысесь, кирпичен-кирпичен усьылоно кадесь, уг тырмо эмъюмъёс, висисьёс асьсэос басьто вата, бинт…

Туннэ югдур мукет. Владимир Путинэн ӵектэм «Тазалык» нацпроект чотын кунысьтымы эмъян удыс пыд вылаз султыны ӧдъяз. 2006-тӥ арысен кутскыса, республикаямы вуиз уно эмъян тӥрлык, радъяськиз диспансеризация, уждунзы йылӥз терапевтъёслэн, педиатръёслэн но соос бордын ужась эмъясь сузэръёслэн…

Удмуртиез азинтонлы сӥзем программаын но нимысьтыз саклык висъяськиз эмъян удысэз юнматонлы. Озьы «Огъя Россия» партилэн азьлане йыгмыт учкемезлы, Россилэн но Удмуртилэн уртче тыршемзылы луыса республикаямы огез бӧрсьы мукетыз усьтӥськизы анайлэсь но нунылэсь тазалыксэс утёнъя, сюлэм но сэр висёнъёсын, лек пыктосъёсын нюръяськонъя, сюрес вылын шудтэм учыръёсы шедемъёслы юрттэт сётонъя но мукет центръёс.

 

Пурысь борддоръёслэсь мозмытскон

Эмъясьёс туннэ азьлане бадӟым осконэн учко. Пусйымон: талы сюро выль но выль мугъёс. Озьы туэ апрель толэзе Россилэн Правительствоезлэн Тӧроез Владимир Путин вераськиз эмъян удысэз юнматонъя «Улонлэн ӟечлыкез. Тазалык» выль программа кутон сярысь. Солэн валтӥсь ужпумез: кунамы улӥсьёслэсь лыдзэс йылэтон. Озьыен, тросгес вордскыны кулэ нылпиос, адямиослэсь улон вапумзэс кузёмытоно. Мар кароно та понна? Ӟеч специалистъёсты дасяно, эмъян учреждениосты туала тӥрлыкен узырмытоно. Эшшо: больницаосысь пурысь боддоръёслэсь мозмытсконо — отын тупатъян-выльдон ужъёс ортчытоно. Апреле Кун Думаын ӟырдыт вераськон бере кема ик дыр ӧз ортчы, проект улонэ пыӵаны кутскиз. Тодмо луиз: шаерысьтымы эмъян удыслы Москваысь ог 4 миллиард манет вуоз. Вӧзаз ог 2 миллиардэз висъяськоз на Удмуртилэн бюджетысьтыз.

Кызьы азинтӥсько туннэ ужъёс? Кыӵе воштӥськонъёс витё на республикаысьтымы эмъясьёсты? Та ужпумъёсты эскеризы Тазалыкез утёнъя, Лэсьтӥськонъя, архитектурая но улон инты политикая, Экономикая, Коньдон ужпумъёсъя но мукет министерствоосысь кивалтӥсьёс, эмъян учреждениослэн валтӥсь врачъёссы. Ужрадэ пыриськизы Кун Кенешлэн Тӧроез Александр Соловьёв, Кун Кенешысь Тазалыкез утёнъя, демографияя но семья ужпумъёсъя ялан ужась комиссилэн кивалтӥсез Светлана Кривилёва, Москваысь Николай Аброськин генерал но мукетъёсыз.

— Нырысь ик ӟечен пусъёно: республикамылы 4 миллиард манет Москва юнме шорысь уг висъя, — пусйиз Светлана Кривилёва. — Асьмеос оскытыны-возьматыны быгатӥм: эмъян удысмес юнматон понна ӧжыт ум лэсьтӥське.

Программаен чаклам коньдон пӧлысь ог 3 миллиардэз больницаослы висъямын ни. Тупатъян ужъёс мытэмын 74 учреждениын, 46-яз ар пумозь соос йылпумъяськыны кулэ. Та вакытлы быдэсак выльдӥськемын республикаысьтымы наркологияя центрысь реабилитацияя ёз но Ижысь 7 номеро больницалэн нуны ваён юртэз.

— Шаерысьтымы 6-яз больницаосы вуиз ни эмъян тӥрлык но, — кенешон дыръя пусйиз тазалыкез утёнъя министрлэн воштӥсез Татьяна Дёмина. — Ар пумозь мукет эмъян учреждениос но узырмозы на. Талы ог 535 миллион манет кошкоз.

 

Кырыжам сюрлыос

«Улонлэн ӟечлыкез. Тазалык» программалы луыса, эмъян удысын паськыт кутӥськыны кутскозы компьютеръёс. Табере эмъясьёс доры гожтӥськыны луоз Интернет пыр — ма, куд-ог больницаос та амалэз али ик пыӵато ни. Регистратураосын ужасьёс висисьёслэн карточкаосынызы уз выре — ваньмыз электрон амалэн лэсьтӥськоз. Интернет кулэ телемедицинаез азинтонлы но — эмъясьёс экран пыр ог-огзылы визь-кенеш сётыны, секыт операциосы пыриськыны быгатозы.

— Та ужез радъянлы 124 миллион манет чакламын, — пусйиз Татьяна Дёмина. — Со пӧлысь 99 миллион манетэз — Россилэн бюджетысьтыз.

Россилэн бюджетысьтыз ик нимысьтыз коньдон висъяське 14 аресъем пиналъёслэсь тазалыксэс эскеронлы. Республикаямы 742 сюрс манет вуиз ни. Со чотын ог 5 сюрс нылъёс но пиос эскеронъёс пыр ортчизы.

— Ваньзэ-ӧвӧлзэ 14 сюрс 230 муртэ учкыны чакламын, — вераз тазалыкез утёнъя министрлэн воштӥсез.

Эскеронъёс возьмато: быдэ вуись егитъёс пӧлысь 8 процентсэ гинэ тазаен лыдъяны луэ. Ог 37 процентэзлэн шараясько кема кыстӥськись висёнъёссы, 30 процентэзлэн синзы ляб адӟе, 28 процентэзлэн сюрлыез кырыжтӥськемын. Котькуд витетӥезлэн пиналлэн али ик шӧдӥське ни азьланяз нуны вордонэн герӟаськем шугъяськонъёссы.

Та программа нылпиослэсь тазалыксэс эскерем сяна, азьланяз соосты йӧнатон борды басьтӥськоз.

Сюлэм висён лэзёз

Ог 2 арня талэсь азьло Владимир Путин калыклэсь улон-вылонзэ ӟечомытонъя эшшо 5 проект ӵектӥз. Кыкез соос пӧлысь герӟаськемын тазалыкез утёнэн. Кыӵе со проектъёс?

Нырысетӥез сӥземын егит специалистъёсты гуртъёсы кысконлы. Медициная вузъёсты йылпумъясьёслы Москва быдэн 1 миллион манет висъяны дась, гуртэ бертӥзы ке. Проект улонэ пыӵаны кутскоз 2012-тӥ арын 1-тӥ январьысен. Но Ижысь медициная кун академиысь студентъёс, республикаысьтымы эмъясьёсты дасянъя колледжъёсын дышетскисьёс пӧлысь 80-эз туннэ ик гуртэ мыныны дась луэмзэс веразы ни.

Кыкетӥез проект герӟаськемын вылӥ технологиосты кулэ карись эмъян юрттэт сётонэн. Туннэ Россиын арлы быдэ 323 сюрс мурт туж секыт но дуно операциос пыр потоно луэ — тросэз соос лэсьтӥсько бадӟым городъёсысь клиникаосын гинэ.

— Асьме республика туэ, 2 сюрс 11 квота курыса, Москвае вазиськиз вал,  — вераз тазалыкез утёнъя министрлэн воштӥсез Людмила Гузнищева. — Висъязы 1 сюрс 788 инты. Со — сюлэм но сэр висъёнъёсын курадӟисьёслы, секыт шуккиськыны шедемъёслы, нуны вордыны быгатӥсьтэмъёслы но мукет. Палэнысь клиникаосын йӧнатӥськемъёс пӧлысь 374-ез — нылпиос.

«Огъя Россия» партия выль проектсэ ӧй ӵектысал ке, республикаысьмы 300 пала адями, вылӥ технологиосын клиникаосы черод возьмаса, жадьысал. Россиын таӵеос ог 60 сюрс пала люкаськысалзы. Но табере оскон кылдэ: Москва соослы висъялоз 2 но ӝыны миллиард манет.

— Туэ ар пумозь ик черодын сылӥсьёс юрттэт басьтыны быгатозы, — ватсаз Светлана Кривилёва. — Али дасясько документъёс.

Нялтас вераса, Нырысетӥ элькун больница, сюлэм но сэр висёнъёсъя, лек пыктосъёсъя но син йӧнатонъя центръёс вылӥ технологиосын юрттэт сётыны быгато ни — отын ужало вылӥ тодон-валанъёсын специалистъёс, вань туала куронъёслы тупась тӥрлык. Нош Нырысетӥ элькун больницалы но сюлэм но сэр висёнъёсъя центрлы Россия квотаос висъя. Туэ палэнысь ог 200 мурт йӧнатӥськиз ни дорамы.

 

* * *

Япониын адямиослэн улон вапумзы 93 арес. Асьмелэн матысь аръёсы со 69-озь вуыны кулэ. Кын корт куртчон вакытазы куло воргоронъёс, тросэз — шуккиськон учыръёсы шедьыса, юыса. Адямиосты погырто на сюлэм но сэр висёнъёс, лек пыктосъёс. Специалистъёс оско: вань та черъёсты вормыны луоз, эмъян удысэз кужмоятыса.

Элина Кумачёва.

Удмурт Дунне
By Удмурт Дунне 25 октября, 2011 08:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<