Котькуд суредын — нэнэелэн визьмыз

Удмурт Дунне
By Удмурт Дунне 21 октября, 2011 13:50

Котькуд суредын — нэнэелэн визьмыз

В. Михайлов.

Удмурт Республикаысь Национальной музее кылем арня пумын трос калык люкаськиз. Студентъёс, суредасьёс, музейын тыршисьёс, искусствоез дунъясьёс татчы вуизы Удмуртиысь искусство удысысь дано ужасьлэн Вячеслав Михайловлэн творчествоеныз матысьгес тодматскон вылысь.

Вячеслав Михайловлэн, яке кызьы со ассэ шуэ Гиргорей Славилэн, та адӟытонэз сӥземын 30 ар ӵоже суредаськемезлы. Национальной музейлэн кивалтӥсез Раиса Мартынова верамъя, музейын огез бадӟымез экспозиция нимаське «Ми — удмуртъёс». Но Вячеслав Михайловлэсь та выставказэ адӟизы ке, экспозицие ветлонэз ик ӧвӧл ни. Уго удмуртъёслэн улэм-вылэмзы, сям-йылолъёссы, гурт, дор но выжы — ваньмыз со адӟиське Алнаш ёросысь Писэйгуртын вордскем художниклэн ужъёсаз.

— Мынам туж тодматэме потэ Михайловлэн творчествоеныз Парижын улӥсьёсты. Малпасько, азьланяз Удмуртиысь художниклэн суредъёсыз отчы одно ик вуозы, али ми со бордын ужаськом, — шуиз Раиса Мартынова.

Та адӟытонын Гиргорей Славилэн пӧртэм вакытъёсы, 1983-тӥ арысен 2010-тӥ арозь, живопись но графика амалъёсын быдэстэм суредъёсыз люкамын, татын соос ог 100 пала.

— Мынам вань та ужъёсты, артэ пуктыса, адӟеме потӥз, нылпиосме сямен соосты люкай. «Шорт миськон», «Акшан», «Ӝомал», «Берпуметӥ лымы» но мукет суредъёсме лэсьтыкум, пичи дырме тодам вайи. Туж жалясько, пичи дырысеным троссэ вунэтӥ — вукоос, кебитъёс, тыметъёс — ваньзэ сое суредаса кельтоно вылэм. Мар умойзэ лэсьтӥ — со понна тау карисько нэнэелы. Котькуд суредэлэн пуштросаз — солэн визьмыз, — мылкыдзэ усьтӥз усточи.

Зэм но, Вячеслав Михайловлэн картинаосаз учкиськод но, чутрак гуртэ бертэм потыны кутске, отын лымы но тӧдьыгес кадь, тол но чепыллясьгес потэ, зангари но лызгес пиштэ, акшан вакыт но шыпытгес, уед но пеймытгес.

Вячеслав Михайловез сӥлы карыны вуизы алнашъёс но. Алнаш ёросысь киужъёсъя юртэн кивалтӥсь Иван Печников (нялтас вераса, со В. Михайловлэн студентэз вал), ёрос администрациысь культурая управленилэн кивалтӥсез Наталья Антонова но Сырьезьысь «Азвесь гырлы» ансамбльысь кырӟасьёс кузьымъёсын-кырӟанъёсын лыктӥллям аспал эшсэс ӟечкыланы.

Галина Семёнова.

Туспуктӥз Александр Солопов.

Удмурт Дунне
By Удмурт Дунне 21 октября, 2011 13:50