Котькуд бускель дуно

Удмурт Дунне
By Удмурт Дунне 25 октября, 2011 08:55

Котькуд бускель дуно

Николай Ямаковез удмурт калык ӟеч тодэ. Со выжыезъя пор ке но, удмуртъёслэн пӧртэм кенешъёсазы но огазеяськонъёсазы пыриськылэ. Туж чебер но лякыт вераське удмурт кылын. 20 ар ӵоже ини Ижын улӥсь поръёслэн «Ижевск марий» огазеяськонэнызы кивалтэ.

— Нокин уз малпа, тӥ пор выжыысь шуыса. Удмурт кылын синмаськымон  вераськиськоды.

— Мон вордски Грак ёросысь Пор Вожой гуртын. Кык аресам анай-атайёсы улыны выжиллям Алнашлы матысь Пор Гондыргуртэ. Пусйыны кулэ: татын милям ваньзы удмурт кылын верасько.  Милесьтым одӥг иськеме гинэ Удмурт Гондыр гурт интыяськемын. Ми отчы тямыс классозь дышетскыны ветлӥмы. Тон удмурт, пор яке ӟуч шуыса, нылпиос ог-огзэс ноку ӧз ултӥялэ.

— Атайды дышетӥсь вылэм, соин вордскем гуртысьтыды кошконо луиды, дыр?

— Зэм. Вазен дышетӥсьёсты огинтыязы ӧз возе. Гуртысь гуртэ дышетыны лэзьылӥзы. Мон нырысетӥ нылпи. Бӧрысь эшшо куатез сузэр-вынъёсы вордскизы на. Атае Иван Ямакович Ямаков Удмурт Гондыр школаен кивалтӥз. Ас вакытаз Елабугаысь пединститутэз йылпумъяз. Историен дышетӥсь вал бере, шаертодонъя урок нуылӥз. Пор пиналъёсыз анай кылынызы дышетон амал но шедьтӥз. Ми но со программая дышетскимы ай. Атаймы туж умой адями вал. Нокин со сярысь алама кыл ӧз вералля. Туж трос гожъяськиз, «Алнаш колхозник» газетын печатласькылӥз. Улонысь кошкемез бере ини атайлэсь «Мариец я» нимо книгазэ поттӥмы. Отын со граждан ож вакытэ но со бере Алнаш, Грак но Менделеевск палан улӥсь поръёс сярысь гожтэм. Атай но удмурт кылын ӟеч вераськылӥз. Котькыӵе выжыысь калыкез гажалляз. Кема аръёс ӵоже поръёслэн «Мари ушем» огазеяськонзылэн кенешаз ужаз.

Пичи дырысеным кылбурчиен Иосиф Бобровен эшъяськи. Можга педучилищеез йылпумъяса, монэ ужаны келязы Удмурт Гондыр гуртэ ик. Отын  ми Иосиф Петровичен ӵош ужамы, эшшо но юнгес эшъяськимы. Ог-огмылэн сюанъёсамы но юмшамы. Ма, али ке но ми соин ӟеч кусып возиськомы. Иосиф Петровичен ӵош гожтэм «Тонэ малы ӧй возьма» кырӟанмы но вань.

Собере Удмурт кун университетысь физико-математической факультетэ дышетскыны пыри.

— Но малы ке мукет удысэ кыстӥськиллямды.

— Мон пичи дыръям ик кырӟаны-вераны яратӥсько вал. Ялан концертъёс пуктыса ветлӥськиз. 5-тӥ классын дышетскыкум, атай мыным, кык-куинь толэзь ужам уждунзэ люкаса, почта пыр баян басьтӥз. Фотокружоке но ветлылӥ. Отын но туж тунсыко потылӥз. Собере атае фотоаппарат басьтӥз. Шӧдӥз, лэся, мылкыды та удысэ золгес кыстӥське шуыса. Уйёсы одӥгнам туспуктэмъёсме кыштыр гинэ поттылӥсько вал.

Школаын ӧй ужа, шуыны уг луы. Физикалы но математикалы Ижысь 56-тӥ но 69-тӥ школаосын дышетӥ. Собере Устинов ёросысь Пионеръёслэн юртазы выжи. Отын али ке но ватсаса тодон-валан сётон бордын ужасько. Улонэ  нылпиос пушкын ортче. Ваньмон дыры шеде ке, видеофильмъёс лэсьтылӥсько. Поръёслэсь одӥг ужрадзэс но уг кельтӥськы. Ма, удмуртъёс но ӵемысь ӧтчало. Видеофильмъёсы витьтонлэсь уно лыдъясько ини.

— Тӥ бадӟым семьяын будэмын.

— Бадӟым семья адямиез ужаны дышетэ. Сыӵе семьяын будэм нылпи сюлмо   луэ. Тани кузпалы Зоя Валентиновна Каракулино ёросысь Ныргында пор гуртын вордскемын. Соос семьяязы 10 нылпи. Ог-огенызы тупаса, валче уло. Ма, ми но озьы ик, ог-огмы доры куное ветлӥськом.

Зоя Валентиновна Глазовысь пединститутэз йылпумъяз. Кӧня ке школаын ужаса, шутэтскыны потытозяз, Ижысь механикая заводысь архивын тыршиз. Ми соин кык пи но ныл будэтӥм.

Пиосы ачим сямен УдГУ-ысь физматын дышетскизы. Мон кадь ик туспуктонэн вырыны ярато. Саша но, Игорь но кыкназы ик операторлэсь ужзэ бырйизы.

— Ужась-тыршись луэменыды но калыкез яратэмысьтыды ик Ижын улӥсь поръёсты огинэ люкамды потӥз, луоз?

— Со сярысь мон кема малпаськылӥ. Удмуртиын 10 сюрслэсь уно пор калык улэ ук. Кызьы ке, малпасько, соосты огазеяно вал. Со вакытэ ӵапак мыным юрттӥсьёс шедизы: Ижын улӥсь пор пиос Юрий Яковлев но Пётр Николаев. Соослы луыса 1991-тӥ арын усьтӥмы мари культурая центр. 1997-тӥ арын «Ижевск марий» огазеяськонмы кылдӥз. Котырамы уно пор калыкез люканы быгатӥмы.

— Огазеяськонды тунсыко ужрадъёс ортчытъя.

— Зэм. 1918-тӥ арын поръёслэн 1-тӥ Съездазы постановление кутӥллям: калыкмес данъяно. Ми та куронэз азинтӥськом. Арлы быдэ «Национальной геройлэн нуналыз» ужрад ортчытъяськом. Фин-угор выжыысь пӧртэм калыкъёс отчы шумпотыса пырисько.

— Тӥледыз пӧртэм удмурт ужрадъёсысь но ӵемысь адӟылоно.

— Со мыным тунсыко потэ. Мон Удмурт музъем вылын улӥсько ук, тодыны кулэ солэсь кылзэ, культуразэ, историзэ но туннэ улонзэ. Ог-огдэ яратытэк но гажатэк, кызьы улод та дунне вылын. Уката ик асьмеос одӥг фин-угор выжыысь потэмъёс луиськомы. Соин ик котькытчы вутскыны тыршисько. Нылпиосме но калыкез яратыны дышетӥсько. Соос мыным паймо: тон удмурт-а, пор-а, ӟуч-а, шуо.

— Тӥляд огазеяськонды ӟеч кусып возе Марий Эл Республикаен. Асьтэос но отчы ӵем гинэ вуылӥськоды, дыр.

— Вуоно арын Марий Элын поръёслэн Съездзы луыны кулэ. Отчы одно ик милемыз но ӧтёзы. Ми со дырез чидатэк витиськом.

— Тӥледлы но шуд усиз фин-угор калыкъёслэн «Палэзян» фестивалязы пыриськыны.

— Ми отчы шумпотыса пыриськимы. Эшъяськон юртын мордваосын ӵош «Ош пеледыш» («Тӧдьы сяська») коллективенымы (мон та ансамблез кылдытӥ вал) концерт возьматӥмы. Учкисьёс туж шуныт пумитазы. Мылкыдмы умой кылиз. Кыдёкысь шаерысь вуэм куноосын ӟеч кусып тупатӥмы. Азьланяз ог-огенымы ӵош, тупаса ужаломы, шуимы.

— Азьланезлы но чаклам ужрадъёсты трос, дыр?

— Ӝоген ми Эшъяськон юртын кореецъёсын ӵош концерт пуктомы. Эшшо одӥг шумпотонмы вань на: 10-тӥ декабре поръёслэн огазеяськонзылы 20 ар тырме. Али солы дасяськиськом.

Любовь Тихонова.

Удмурт Дунне
By Удмурт Дунне 25 октября, 2011 08:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<