Коньдон лыдъямын, ужъёс чакламын

Удмурт Дунне
By Удмурт Дунне 25 октября, 2011 07:54

Кемалась ик ӧвӧл котырес ӝӧк сьӧры люкаськылӥзы Удмурт Республикаысь Кун Кенешлэн Президиумаз пырисьёс. Пумиськонэз нуиз Кун Кенешлэн Тӧроез Александр Соловьёв, отчы пыриськизы ялан ужась комиссиослэн ёзчиоссы. Кенешон радъяськиз Удмурт шаерлэсь вуоно арлы, озьы ик 2013-тӥ, 2014-тӥ аръёслы чаклам бюджетcэ эскерон котыр.

Кыӵе лыдпусъёс чакламын Удмурт Республикалэн матысь аръёслы бюджетаз? Кыӵе удысъёслы бадӟымгес саклык висъяськоз? Та сярысь ивортӥз Кун Кенешысь Бюджетъя, вытъёсъя но коньдон ужпумъёсъя ялан ужась комиссилэн кивалтӥсез Софья Широбокова.

Кунмылэн кисыез

Федерал бюджетлэсь матысь аръёслы проектсэ та нуналъёсы эскеризы Федерацияя Кенешын. Отчы пыриськизы федерал министерствоослэн но ведомствоослэн кивалтӥсьёссы, улосъёсысь ӧтем куноос. Ужрадэ вуылӥз Софья Широбокова но. Кыӵеен адӟиське странамылэн бюджетэз? Тужгес но бадӟым саклык висъяськоз социальной программаослы. Кылсярысь, вуоно арын калыклэсь улон-вылонзэ, тазалыксэ ӟечомытонлы сӥземын луоз 41 программа. Со сяна, матысь аръёсы эшшо но юнмалоз Россилэн оборонаез, кышкытлыклэсь утиськон.

Зэмзэ вераса, федерал бюджетлэн матысь аръёслы проектэз секытэн радъяське, мылкыдзэ шараяз Софья Широбокова. Азьвыл аръёсы сямен ик, со туж юн герӟаськемын мувӧйлы дунъёсын. Бюджетлэн проектаз солэн дуныз одӥг баррелез понна 76 доллар пусъемын. Та лыдпус усиз ке, утчано луоз мукет амалъёс — сотэк матысь аръёслы чаклам бюджетэз быдэстыны секыт луоз. Федерал бюджетлэн вуоно аръёслы проектаз куд-ог лыдпусъёс таяз арын кадь чакламын яке кулэстэмын — ӝутскем лыдпусъёсты уд пумита.

Кыӵе малпанъёсын уло федералъёс? Улосъёс асьсэды асьсэос сюдыны-ӝутыны мед пӧрмытозы. Ку вуоз со дыр — шуг вераны. Угось уж вылын со уг шӧдӥськы на. Улосъёсын бичам вытъёслэн ӝыныезлэсь ятырез федерал центре кошке. Вылаз ик, улосъёслэн пельпум вылазы вуоно арын быдэсак куштэмын луозы училищеосты-техникумъёсты возён, сирота нылпиослы улон инты висъян, ужтэк пукисьёслы пособие тырон, политикая репрессие улэ шедемъёслы, Чернобыль аварилэсь бервылъёссэ утялтэмъёслы льготаос висъян но мукет удысъёс. Со вие ик федерал центр 2012-тӥ арысен ас вылаз басьтэ полициез возёнэз.

Софья Широбокова шараяз мукет лыдпусъёсты но: берло 3 ар куспын странаысьтымы узыръёслэн но ёрмисьёслэн кусыпсы унояз 7 но ӝыны поллы (азьвыл аръёсы 6 поллы вал). Тужгес но узыр улӥсьёслэн карзы — Ханты-Мансийск. Тӥни таӵе «емышъёсыз» странаямы ортчем кризислэн, пусйиз С. Широбокова.

 

Калык куара

Кызьы туэ быдэсъяськиз шаермылэн бюджетэз? Туэ 9 толэзь куспын бичамын 68 миллиард 700 миллион манет тыр вытъёс. Со пӧлысь 44-ез кошкиз федерал кисые, 19-эз — асьме бюджетэ, кылемез — муниципал кылдытэтъёсы. Софья Широбокова оскытӥз: туэлы чаклам социальной программаос быдэстэмын луозы сю процентлы.

Вуоно арлы чаклам бюджетын, азьвыл аръёсы сямен ик, нырысетӥ интые потӥз социальной удыс. «Огъя Россия» партилэн кивалтӥсезлэн Владимир Путинлэн кичӧлтэмезъя радъям «Калык фронт» движенилы луыса бюджетэз сэрттонэ-пертчонэ пыриськиз огшоры калык но. Котькуд ёросын ортчизы проектъёслы сӥзем конкурсъёс. Соос пӧлысь тужгес устоосыз пыртэмын луозы шаерамы быдэсъяськись программаосы — соосты быдэсъяны коньдон висъяськоз республикамылэн бюджетысьтыз. Тунсыко: «Калык бюджетэ» вуэм 124 ӵектон пӧлысь 79-эз пыртэмын матысь аръёслы чаклам бюджетэ. Куд-огез туэ 1-тӥ сентябрьысен быдэсъяськыны кутскизы ни: тодон-валан сётӥсьёслэсь уждунзэс 30 процентлы но бюджет удысын тыршисьёслэсь уждунзэс туэ 1-тӥ октябрьысен  6 но ӝыны процентлы йылтон. Кызьы ивортӥз Софья Широбокова, республикаысьтымы ваньмаз 311 поселениосын та нуналъёсы радъясько калык кылзонъёс — отчы пыриськисьёс мылкыдзэс верало муниципал кылдытэтъёслэсь бюджетсэс кылдытон пумысен.

 

Радызъя но малпамъя

2012-тӥ арлы чаклам бюджетлэсь проектсэ чаклано ке, доход люкетэз 33 миллиард 233 миллион манет пала чакламын, со пӧлысь 28 миллиардэз — шаермылэн аслаз доходъёсыз, со вытъёс чотын бичаськись коньдон. Вуоно арын солэн быдӟалаез, туэен ӵошатыса, 13 процентлы тросгес люкаськоз. Бюджетлэн расход люкетэз 42 миллиард 900 миллион манет тыр усёз. Со пӧлысь 72 процентэз чакламын социальной удысэз ӝутонлы.

Кыӵе воштӥськонъёс витё бюджетлэсь вуоно арлы проектсэ кутэмен валче? Али одӥг нылпи будэтэм понна уждунлэн 1 сюрс манетысьтыз выт уг басьтӥськы. Кык пинал вордэм понна — 2 сюрс манетысь. Вуоно арысен кык нылпи будэтӥсь анай-атайёслэн уждунысьтызы 2 сюрс 400 манетысьтызы выт уз бичаськы, куинь пинал понна — 5 сюрс 400 манетысь, куиньлэсь тросгес нылпи вордэм понна — котькудӥзлы быдэн 3 сюрсысь.

— Милемлы вазиськизы Чернобыле ветлэмъёс, — шуиз Софья Широбокова. — Соос автотранспорт воземзы понна вытъя льготаос куро. Туннэ нуналлы соослэн ваньзэ-ӧвӧлзэ 55 машиназы. Льгота висъян 165 сюрс манет тыр усёз. Вазиськонэн потӥмы Удмурт Республикаысь Правительство азе. Соос милемлы дурбасьтӥзы ке, чернобылецъёслы льгота вуоно арысен висъяськоз.

Бюджетмылэн дефицитэз арлы быдэ уноя. Но отын пусъем ужрадъёс уз быдэсъяське шуыса кышканэз ӧвӧл. Ваньмыз улонэ пыӵалоз радызъя но чакламъя, пусйиз С. Широбокова. Вуоно арлы бюджетлэсь проектсэ сэрттон-пертчон чакламын туэ 29-тӥ ноябрьлы — ӵапак соку ортчоз Кун Кенешлэн сессиез.

Елена Никитина.  

Удмурт Дунне
By Удмурт Дунне 25 октября, 2011 07:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<