Кин ӧз адӟы, со уз вала

Удмурт Дунне
By Удмурт Дунне 18 октября, 2011 09:56

Кин ӧз адӟы, со уз вала

Таиз корка улыны ярамон ини.

Туэ гужем Пугачёвоын пуштылонъёс учырамен, Пичи Пурга ёрос бадӟым изъян адӟиз: куашкамын 3 сюрс 540 хозяйство, эвакуацие шедиз 13 сюрслэсь уно адями.

Кивалтӥсьёс калыкез ӧз куштэ, соку ик лэсьтӥськон уж борды кутскизы. Палэнысен учкыса, каллен ваньмыз радъяське ни, улон азьвыл ӧраз пыре кадь. Но дырын-дырын редакцие чигиськыса жингырто шугадӟонэ шедьылэм адямиос.

Кыӵе зэмос югдур Пугачёво котырын туннэ?

Пичи Пурга ёросын лэсьтӥськон-тупатъян ужъёс мынон понна кыл кутӥсе юнматэмын Удмурт Республикаысь лэсьтӥськонъя но улон инты политикая министрлэн нырысетӥ воштӥсез Рустам Хабибуллин.

— Туннэ лэсьтэмын но тупатъямын 85 процентэз улон юртъёс. Клубъёс, школаос, нылпи садъёс, библиотекаос но больницаос тупатэмын 90 процентэз.

Пуштылонъёс ёрослы но республикалы гинэ ӧвӧл, быдэс Россилы шӧдскымон луизы. Федерал бюджетысь уксё вуэмен, тупатъян-лэсьтӥськон ужъёс дыраз кутскизы. Республикаысь вань городъёсысь лэсьтӥськонъя управлениос та уж борды юнматэмын вал. Туннэ нуналлы тупатэмын но выльдэмын 3 сюрс 164 хозяйство. Со пӧлысь ӝынызэ адямиос ас мылкыд каремзыя тупатъязы.

Пуштылонъёсы шедем гуртъёсысь ваньмыз куашкам юртъеръёс эскеремын. Ньыль толэзь ортчыса но, адямиос выльысь тупатъян-лэсьтон ужъёсын вазисько на. Куд-огез нырысьсэ лыктэ. Со чакламтэ юртъеръёсты выльысь тупатъяно луэ. Вань сыӵеосыз но: вазиськон гожтыса, акт вӧзазы эшшо мукет акт гожъято на. Комиссилы соос доры выльысь потоно луэ. Озьы ужъёс трослы йыло. Валамон, тупатъян кема кыстӥськоз на.

Секыт ужпум военной городокын. Солэн музъемез но, улон коркаосыз но Обороная министерстволэн шуыса лыдъясько. Соин ик ми туж юн алэмын, республикаысь организациос уг быгато отын ужаны. Военной городокез, арсеналзэ вератэк, быдэсак Пичи Пурга ёрослы сётыны чакламын. Та уж йылаз-пумаз вуиз ке, республика быгатоз ни лэсьтӥськон-тупатъян борды кутскыны. Малпасько, та уж октябрь толэзе интыысьтыз вырӟоз. Военной городокын тупатъян-лэсьтӥськон ужъёсты быдэстон вылысь Ижысь 6-тӥ но 9-тӥ трестъёслы висъямын 190 миллион манет.  Огъя сметая городокез тупатъян понна чакламын 416 миллион манет.

З. Токарева вите лэсьтӥськисьёслэсь вуэмзэс.

Туннэ милям ужмы — военной городокысь адямиослы улон интыен юрттон. 113 семья сэрегтэк кылемын. Ми соослы сётӥськом сертификат. Шуге-леке шедем адямиос соя Россилэн пӧртэм  сэрегъёсаз улон инты бырйыны быгато. Шумпотыса верано, туннэ нуналлы 93 адями со сертификатэз басьтӥз ини. Ньылез дась ни. Мукетъёсызлэн йылаз-пумаз вуттэмын ӧвӧл на документъёссы.

Изъян адӟем гуртъёсты оглом ке басьтоно, 265 хозяйстволы федерал бюджетысь 67 миллион манет тыремын ни. Озьы ик ас кужыменызы лэсьтӥськемзы понна 480 хозяйстволы висъямын 27 миллион 437 сюрс манет.

Тупатъян ужъёс трос лэсьтэмын. Валамон, лэсьтӥськись организациос ужзэс рос-прос быдэсто. Но шедё суп-сап вырисьёс но. Ваньмызлэсь ужзэс комиссия эскере. Шекъёс шедьтэмын ӧвӧл шуыса, акт гожтэ. Йылаз-пумаз вуттымтэ объектъёсты выльысь тупатъяны дэмла. Котькуд адямилэн аслаз сямыз, аслаз куронъёсыз. Лэсьтӥськисьёслы но таиз ласянь капчи ик уг йӧты. Ай адямиос ярато бускельёссы шоры учкыны. Солэн озьы лэсьтэмын, нош мынам малы тазьы? Куд-огез эсэпсэ уг шӧды ни.

Пусъеме потэ созэ но: муниципал кылдытэтын ужасьёс, тупатъясь-лэсьтӥськисьёс ньыль толэзь ӵоже шутэтскон нуналъёсты ӧз адӟылэ на. Адямиос соослы тау карыны кулэ. Таӵе югдуре нырысьсэ шедимы, соин ик пумиськыло, дыр, янгышъёс но. Адямиослы юрттоно, липетъёссэс липоно. Тани ӝоген кезьыт нуналъёс вуозы, — пусъе Рустам Хабибуллин.

* * *

— Дас одӥг гурт пуштылонъёсы шедемын шуыса вераськонъёс шонер ӧвӧл, — шуэ Пичи Пурга ёрос йырлэн воштӥсез Леонид Шишкин. — Пӧлазы кык гуртэз пыртоно на. Нырысь-валысь эвакуацие шедемъёслы 1 сюрс манет сётъязы. Бӧрысь Удмурт Республика шуге-леке сюремъёслы 16 миллион манет тыр компенсация сётӥз.

Тупатъян-лэсьтӥськон ужъёсы кыскемын республикаысь 5 городъёсысь — Ижевск, Можга, Глазов, Сарапул, Воткинск — 700 адями. 39 куашкам клубъёс, нылпи садъёс, школаос но мукет объектъёс пӧлысь туннэ нуналлы йылаз-пумаз вуттэмын 31-ез.

Куашкам коркаосты эскерон вылысь Пичи Пурга черкогуртын кылдытэмын нимысьтыз штаб. Отын 30-лэсь уно комиссия ужа. Штабен кивалтэ Удмурт Республикаысь Правительстволэн Тӧроезлэн воштӥсез Ильдар Бикбулатов. Котькуд комиссие пыре куинь адями: тӧроез — Ижысь лэсьтӥськонъя управлениысь специалист, ёзчиосыз — Удмурт Республикаысь МЧС-ын ужась но ёросысь быръем адями.

* * *

Пичи Пургалась культура юртэз тупатъян мынэ на.

Вера Пичи Пурга ёрослэн йырыз Михаил Леконцев:

— Сюлмаськытэ тани мар: туэ ӧч карем кадь куазь жаль гинэ зоре. Адямиослэн липетъёссы пасесь. Тупатъясьёс ваньмыз доры мыныса уг вутто. Нуналлы быдэ, юрттэт курыса,  адямиос муниципал кылдытэтъёсы вазиськыло, соослы маке кузьда черодын  сылоно луэ.

— Нырысетӥ каналысь «Свобода и справедливость» передачаын веразы,   котькудӥзлы шуге-леке шедем муртлы 100 сюрс манет сётоды шуыса. Шонер-а со?

— Со озьы верамын ӧй вал. Калыклэсь йырзэ поромытӥз та передача. Мыным пумозяз вераны ӧз сётэ. Сю сюрс шуыса гинэ вуттӥ, кылемзэ кылъёсме вандыса куштӥллям. Мон верасько вал шуге-леке шедемъёс сю сюрсозь уксё басьтыны быгатозы шуыса. Пӧрмиз мукет сямен.

— Посёлокетӥ комиссия ортчиз ини вал, — вера Пугачёво муниципал кылдытэтлэн йырыз Николай Зворыгин. — Ыштонъёсты лыдъямы-чотамы ни вал. Но адямиослэн выльысь гуръёссы куашканы кутскизы,  фундаментъёссы но корка борддоръёссы, шиферъёссы пилиськылыны шӧтазы. Москваысь уксё висъямзы бере адямиос выльысь вазиськонъёсын лыктӥзы. Комиссия эскеронъёсы нуналлы быдэ пота.

— Нуналаз 100 адями вазиське, дыр, — вераськонмы борды итӥське Пугачёво муниципал кылдытэтын ужась Ольга Павлова. — Субботае но, арняе но ужаськомы. Посёлокын 1 сюрс пала хозяйство лыдъяське. Ыштонъёс адӟиз 575-ез. Со сяна но трос выльёсыз лыкто на. Соослэсь вазиськонъёссэс выльысь эскероно луэ. Сомында отын гожъяськонэз! Ваньзэ пусъёно: кӧня сылэ кирпич, шифер, пияла но мукет. Собере со бумагаосты одӥгтэм Москвае келяно. Отын ини учкозы: шонер-а дунъет пуктэмын. Адямилэн  сберкнижкаяз ку вуоз со уксё, тодмо ӧвӧл. Озьы ик ми ужаськомы Пугачёво котырысь сад-бакча возисьёсын но. Та дыре соослы юрттон вылысь дасямын ни 3 сюрс 769 акт. Пугачёвоысь нылпи сад усьтӥськыны кулэ декабрьлэн кутсконаз.

* * *

86696 номеро военной частьысь военной городокын 500-лэсь уно  адями улэ. Отын куинь, ньыль, вить этажъем 26 куашкам коркаосысь 113 семьялы улон инты висъяны кулэ.

Городокын татчыозь котельной но подстанция тупатъямын ӧвӧл. Соос понна кыл кутэ Россиысь Обороная министерство. Котельноез малпало Пичи Пурга ёрослы сётыны. Нош кытчы ужаны но улыны интыялозы отысь калыкез? Та юанъёслы али одӥг адями но валэктон сётыны уг быгаты.

Пуштылонъёс зол гинэ зуркатӥзы Миндэр, Пичи Бӧдья, Бигерпочинка (Абдульменево), Миндэрвуко (Постольский) гуртъёсты, Яган посёлокез. Яганэтӥ ортчыку, син шоры йӧто война бере кадь куашкам, укнотэм, липеттэм коркаос. Тани 2 этажъем 5 пу коркаос артысь артэ сыло. Кыдёкысен адӟиське: укнооссы пасесь, рамаоссы но пиялаоссы пуктылэмын ӧвӧл. Пугачёвоысен Яган посёлокозь шонерак 2 иськем гинэ луэ. Соин ик Яганын трос юртъеръёс ярантэмесь луэмын. Котыртӥзы ветлӥсез ик ӧвӧл. Ужасьёс но уг адӟисько. Куазь угось жаль-жаль зоре. Иське, кузёосыз кытын ке татын ик, матын уло, дыр. Одӥгаз мунчое пырон ӧс пась вылэм. Нылкышно пыд йылаз пӧсь чайзэ пелляса юэ. Со — Зинаида Токарева.

Тазьы улӥськоды-а шуыса юамысьтым, Зинаида Андреевналэн пушкыз тыриз, бамыз кузя, зор ву кадь, жаль гинэ синкыли вия:

— Быдэс гужем тазьы улӥськом ини. Котырмес мунчое поттам. Куазь пӧсь дыръя чидамы ик вал. Нош али… Зоръёс но кезьытъёс кутскизы ук. Дӥськутмы котме, сисьме. Мунчо азез эстыса уд шунты. Мунчоысь пӧсез потэ но шуак кошке. Кемалы ик со уг тырмы. Инты ӟоскытэн ачим мунчо азьын кӧласько, кузпалы — пушказ. Сиён но татын ик,  плитка вылын, пӧраськом. Милям табере арлыдмы вань ини, пыдъёс но, мугор но, юзыр карыса кынмо. Уката ик ӵукна секыт султыны. Дӥськутэн ке но кӧласьком, шобрет улысь потэм ик уг поты. Ма, султыса но, пӧсь чаен но пӧсь шыд лымен кемалы-а шуналод? Тазьы улыса, висись луиськиз ини. Нош музонъёс сямен пичи пиналъёсын ке луысалмы?

— Бон малы али ке но коркады лэсьтӥське на? Тупатъясьёс ӝегаса вуизы-а, мар-а?

— Выж-липетъёс бордын ик олокӧня выро ини соос. Нырысь ик кирпичлэсь гур ӝутӥзы. Алигес тубай сое эскерыны, эстыса но утчай. Кыске кадь, номыр ӧвӧл. Но мар солэн пайдаез? — Укно рамаос али но лэсьтэмын ӧвӧл на ук. Та вуж коркаосты сэрттыса, выльёссэ лэсьтысалзы ке, ужзы чалякгес мынысал, дыр. Милесьтым коркамес алнашъёс тупатъяло. Кема ик ужаса уг вутто, пятница ӝыт доразы берто ини. Понедельнике гинэ вуо ай. Я тани куазь люкетэ, нунал потэм зорыса улэ.

— Лэсьтӥськисьёслэн дыртытэк ужамзы сярысь кивалтӥсьёслы вераськоды, дыр?

— Ветлыса но жадиськиз ини. Асьсэос но кӧня пол вуылӥзы ини. Ачиз Президент Александр Волков но ми доры ветлӥз. Эн, пе, сюлмаське,  выль корка кадь луоз улон интыды. Мар веранэз, вужлэсь выль уд кары ни.

Токаревъёслэн гинэ секыт югдурзы ӧвӧл. Соосын артэ эшшо таӵе ик 2 этажъем 8 квартираё 5 корка артысь артэ сылэ на. Ку соос шуныт липет улэ пырозы, тодмо ӧвӧл.

— 8 квартираё 2 этажъем коркаез тупатъян-лэсьтон понна 4 миллион манет кошкоз, — шуэ Глазовысь лэсьтӥськонъя организацилэн кивалтӥсез Михаил Геннадьевич Высоцких.  — Одӥг квартиралы 500 сюрс манет мынэ. Выж-липетъёс быдэсак выльдэмын, ӧс-укноос пуктэмын, гурзы ӝутэмын. Уродгес ворсаське на ӧссы. Уж трос.

— Нырысь ик шуг-секытъёс кылдӥзы марлы? — вераськонмы борды итӥське Яган посёлокысь муниципал кылдытэтлэн йырыз Равиль Рахимзянович Ахунов. — Гур лэсьтӥсьёс ӧй вал. Туала арын секыт вылэм соосты шедьты.

Тупатъян ужъёс быро ке но, куд-огез нош вазисько комиссиосы яке муниципал кылдытэтъёсы. Тросэзлы тупатэмзы уг кельшы. Суп-сап, дыртыса, пе,  ужазы. Сыӵе дыръя адями нош вазиськыны быгатэ администрацие.

— Тросэз лэсьтӥськисьёсты уг возьмало ни, асьсэ кужымен  кутско тупатъян ужъёс борды, — шуэ Пичи Пурга администрациын ужась Ольга Петрова.

— Котькудӥзлэн ӝоггес потэ ук лэсьтытэмез. Адямиос туж ик капчи мылкыдын  уг кошко тӥ дорысь.

— Озьы. Туала адямиен секыт ужаны. Ваньмыз керӟегъясько. Куд-огез диктофонэн но доре пыре, озьы судэ сётыны капчигес луоз, шуэ. Лэсьтӥськисьёс дыраз лыктыны уг быгато шуыса, милемыз янгыш карыны туртто, — ӧпкеле администрациын ужась.

— Тросэз малпало, юртъер котырзэс асьсэ кужымен гинэ тупатъялом-лэсьтом шуыса, — пусъе Пичи Пурга муниципал кылдытэтлэн йырыз Любовь Васильевна Логинова но. — Уж борды кутско но, керӟегъяськыны ӧдъяло. Угось котькыӵе ужын усточи луыны кулэ. Умойгес лэсьтон выльысь ми доры вазиськоно. Муниципал кылдытэтамы 5 гурт пыре. Отын 17 бригада ужа. Ай табере куд-огез шиферъёссэс, липетъёссэс но борддоръёссэс ломъёсын выльысь тӥяны кутскиллям. Озьы узырмом кожало, вылды.

— Нунал потэм тазьы ветлыса, ми висись луимы ини, — кӧтӝожзэ вера юрттэт курыны лыктэмъёслэн черодазы кияз вож нуныен сылӥсь нылкышно (нимтулзэ ӧз лэзьы вераны). — Липетмы вия. Дӥськутмы котме. Нылпиос пичиесь. Ку ми доры лыктозы лэсьтӥськисьёс, али ке но вераны уг быгато. Нуналлы быдэ, умоезлы оскыса, бертӥсько: возьмалэ, туннэ одно ик лыктозы, шуо. Соосты витьыса, нокытчы дорысьтым уг кошкылӥськы. Нунал ортче — нош уг вуо.

Зэмзэ но, тупатъясь-лэсьтӥськисьёс ваньмаз мыныса уг вутто. Калык нош, юрттэт курыса, лыктэ но лыктэ. Ӝож мылкыдын дораз бертэ.

Москваысь уксё вуэм бере асьсэ кужымен тупатъян-лэсьтон ужъёсты быдэстон понна висъямын 49 миллион 243 сюрс манет, ваньбур ыштонъёслы — 47 миллион 320 сюрс манет. Лэсьтӥськисьёслы ужамзы понна тыремын 406 миллион манет. Оглом вераса, Пичи Пургае кошкиз 100 миллион манет пала.

Та уксёез басьтон понна Сбербанке пырыны ик уг луы. Черодэ султон вылысь вазь ӵукна, пе, лыктоно.

* * *

Пуштылонъёс дыръя Пугачёвоысь военной лагере Пичи Пурга ёросысь 11-тӥ классэ потэм 120 пиос учыразы. Соослы шутэтскыны но йӧнатскыны шаерысьтымы пӧртэм лагерьёсы но Ижысь «Металлург» санаторие путёвка висъямын вал. Жаляса верано, куд-ог анай-атайёс пиоссэс отчы келяны ӧз дӥсьтэ ни.

Шуге-леке шедем музон нылпиослэсь но тазалыксэс утёнъя югдурез тодэм потӥз. Со пумысен вазиським Тазалыкез утёнъя министерствое.

— Быгатэммыя пуштылонъёсы шедем покчиосты санаторийёсы келялляськом, — вера министрлэн воштӥсез Людмила Гузнищева. — «Юськи» санаторийысь нылпиос ваньзы ик музон интыосын шутэтскизы ини. Санаторийын тупатъян ужъёс мыно на ке но, август шорын со ужаны кутскиз ини. Отчы нылпиос вуизы.

Секыт югдуре шедьылэм 186 нылпиосты чакламы вал  санаторийёсын, курортъёсын но лагерьёсын йӧнатыны. Тросэз Россиысь курортъёсын, кылсярысь, Кисловодскын но Железноводскын шутэтскизы.

Озьы ик мӧйыослы но юрттэт вань. Санаторийёсын йӧнатскыны быгато ужысь но ожысь ветеранъёс, инвалидъёс, ивортӥзы Тазалыкез утёнъя министерствоын.

* * *

Вань на адямилэн вожъяськон сямыз. Бускелезлы тросгес уксё сётӥзы шуыса, куалекъяны кутске. Малы, пе, солы чебергес лэсьтӥзы, мынэсьтым озьы ӧз тупатъялэ. Ӝожтӥськонъёс туж уно. Федерал уксё чотын кин ке но юрт котырзэ ворекъясь каре, чилясь липет улэ пыре. Нош мукетыз, нунал потэм кивалтӥсьёс доры ветлыса, тупатъясь-лэсьтӥськисьёсты ӧтьыса, сюлворыса ветлэ.

Али ульчаын сӥзьыл гинэ ай, ӝоген кезьыт тол нуналъёс кутскозы. Нош мар луоз тулыс, вуоно арын? Пересьёс верамъя, музъем, пе, тулыс шудэ. Нош адями пуш но лулсэр кызьы меда вошъясько?

Любовь Тихонова.

Туспуктӥз Владимир Беломорских.

Удмурт Дунне
By Удмурт Дунне 18 октября, 2011 09:56