Йыртэмасьёс синмасько… вуж «Москвичлы»

Удмурт Дунне
By Удмурт Дунне 4 октября, 2011 07:47

Йыртэмасьёс синмасько…  вуж «Москвичлы»

Туэ 8 толэзь ӵоже Удмуртиын лушкамын 186 машина. Пӧлысьтызы 70 процентэз луо вуж автомобильёс.

МВД-ысь 3 номеро оперативно-розыскной частьлэн кивалтӥсез Вячеслав Киселёв верамъя, «Москвичъёслы» но «копейкаослы» синмасько быдэ вуымтэос но, машина запчасть вузасьёс но. Кылсярысь, толалтэ одӥг шутэтскон нунал куспын Ижысь егитъёс 5 автомобиль лушказы. Пуксё, бензинэз бырытозь, ворттыло но кытчы сюрем кельто. Быдэ вуымтэ пиос табере кыл кутытэмын.

Кылем арняе шаерамы ортчиз «Автомобиль» ужрад, шедьтэмын 8 лушкам машина. Пӧлысьтыз огез федерал розыске ялэмын вал. Дуно машинаез 2007-тӥ арын Санкт-Петербургын лушказы. Бӧрысь йыртэмасьёс сое вузазы Ижысь воргоронлы. Машиналэсь двигатель но кузов номеръёссэ тупатъязы, мукет документъёс лэсьтӥзы. Но выль кузёлы шукрес машинаяз кема ворттылыны ӧз кылды. Табере джип берыктэмын азьвыл кузёезлы.

Вячеслав Киселёв пусъе: машинаосты уката трос лушкан шаерамы вал 2006-тӥ арын. Ижын гинэ 222 «корт вал» кузёез дорысь кошкиз. Со аре 27 процентсэ гинэ учыръёсты сэрттыны быгатӥзы. Туэ 6 толэзь куспын 57 процентэз машинаос кузёоссылы берыктэмын. Россиын таӵе лыдпус чик ушъяськымон ӧвӧл — шараясько 14 процентэз гинэ машина лушкан учыръёс. Полициын ужасьёс верамъя, Удмуртиын югдур ӟеч. Машина лушканэн вырись группировкаос куашкатъямын, йыртэмасьёс пытсэт сьӧрын пуко. Со вакытэ ик таӵе учыръёсты сэрттон-пертчон бордын ужало полициысь устоосыз оперативникъёс.

 Елена Скворцова.

Удмурт Дунне
By Удмурт Дунне 4 октября, 2011 07:47