Йырзэ берыктӥз гуртэз

Удмурт Дунне
By Удмурт Дунне 4 октября, 2011 07:41

 Грак ёросысь Вылӥ Эгра (Пуклё) гуртын 1944-тӥ арын вордӥськем Анатолий Майоровлэн бадӟымесь луонлыкъёсыз вал КГБ-ын ужаны, разведчик кариськыны. Та удысэ кыткиськыны курисез шедьылӥз уго. Ма, пичи гуртын кыдам удмурт воргорон калыкез огпол гинэ ӧз паймытъя кунгож сьӧрысь ньыль кылэз тодэменыз. Со шатыр поттыса вераське англи, немец, француз но испан сямен. Ас вакытаз кык диплом басьтӥз: дышетӥсьлэсь но психологлэсь. Со сяна, йылпумъяз Вылӥ партшколаез. Но улонзэ быдэсак герӟаз дышетон удысэн. Маин сокем гочатӥзы меда сое пиналъёс?

Анатолий Майоров — Даниил Майоров (1889-1923) кылбурчилэн, «Гудыри» газетлэн редакторезлэн матысь ӵыжы-выжыез. Анатолий Николаевич котьку тодэ вал: ӵужмуртэз удмурт кылэ нырысьсэ берыктӥз Александр Пушкинлэсь «Сказка о рыбаке и рыбке» произведенизэ. Со ик удмурт кылэ берыктӥз калыке вӧлмем «Ах, зачем эта ночь», «Славное море — священный Байкал», «Звенит звонок, и тройка мчится» но трос музон ӟуч кырӟанъёсты. Апинян Даня (озьы шуо вал кылбурчиез грак палъёс) пьесаос но гожъяз: «Онись», «Удмурт сюан». Сокем дано муртэн ӵыжы-выжы луэменыз данъяськыса, пичи Толя калык азьын ӵемысь вералляз Даниил Майоровлэсь чуръёссэ:

Мон — майор,

Мон — куанер,

Мынам таӵе манер…

Соин, лэся, еж муртлэн йыраз нокызьы уг тэры вал таӵе малпан: кызьы собыдӟа кылбурчиез виыны дӥсьтӥллям? Нош Апинян Даняез, вордскем палъёсаз бертэм муртэ, тӥрен олокӧня люкетлы кора но мурӝолаз куштэ Тит агаез. Вашкала сямъёсъя уго атай юрт пичиезлы пилы кыле. Но йыружзэ ватыны уг быгаты, сое тюрьмае пукто.

Нялтас вераса, Пуклёын Даниил Майоровлэн юртэз туннэ но утиськемын. Дано кылбурчилы сӥзем музей но ужа. Огез ульчалы солэн нимыз сётэмын. Куке-соку сопалась колхоз но Майоровлэсь нимзэ нуллӥз.

1930-тӥ аръёсы, собере отӥяз но Даниил Афиногеновичез сьӧдмасьёс сюрылӥзы, сое националист шуылӥзы. Колхоззылэсь но нимзэ ӝог воштӥзы.

Анатолий Майоровлэн гинэ ӵыжы-выжыез сярысь малпанэз ноку ӧз вошъяськылы. Аслыз шуылӥз кадь: мон но калыкмес югдытонэн выро. Ма, школаын дышетскыкуз, улон шоры та выллем учкеменыз, ёзъёсызлэсь тыш но сиылӥз. Кылсярысь, Грак шор ёзо школае 8-тӥ классэ выжемез бере огез ӟуч пияш Майоров шоры урдӥськиз: тон, пе, вотяк, эшшо улонэз пожалод-а…

* * *

Кин тодэ, оло, ӵапак таин сэрен ик Толя кема бырйыны выриз: кин луоно — врач яке дышетӥсь? Отӥяз малпаз: эмъясьёс монтэк но вань, нош калыкез кунгож сьӧрысь кыллы валэктӥсьёс ӧжыт, уката ик — гуртъёсын. Тодаз лыктӥз, дыр, соиз но: 9 агай-апайёс пӧлын одӥг мурт ке но вылӥ образование басьтыны кулэ. Озьы пыриз Удмурт пединститутэ. Зэм, соку ик адӟиз: кунгожсьӧр кылъёсты кыткыны мылкыд карисьёс пӧлын городскойёс гинэ. Но приёмной комиссия дунъяз удмурт пияшлэсь англи кылын матэгес тодматскыны мылкыд каремзэ. Анатолий Майоров но ас азяз ужпум пуктӥз: фамилие понна ӵыжы-выжыосылы гордэктоно уз луы — ижъёслэсь устогес дышетско. Лекциос бере я соос азьын лаборантское пыроз, магнитофонэз лэзёз но кассетаысь англи кылын вераськись муртэн ӵош ачиз но часъёсын лабыртоз. Ӝоген курсаз тужгес устоез луиз. Тунсыкъяськыны кутскиз немец, француз но испан кылъёсын.

Кин тодэ, макем зол азинскысалзы со аръёсы тодон-валанъёсыз. Но 3-тӥ курсысен Майоровез басьтӥзы армие. 1963-тӥ ар. Сюриз Германие. Танкист. Киос выро, пыдъёс бызьыло, нош йырвизь сыноме. Мар кароно дышетэм кылъёсты вунэтонтэм понна? Юлтошъёсын англи сямен уд бӧтьырты. Собере йыраз шуак чилектӥз малпан: политзанятиосысь конспектъёсты англи кылэ берыктыса гожъяно, малпаськонын но та амалэз кутоно.

Зэм, таӵе выросэныз нокызьы  ӧз тэрытӥськы капитанэз. Конспектъёссэ эскерыны ӧдъяз но — мар гожъямын, уг вала. Майоровлы соку зол йӧтӥз.

Кыко арня ортчыса, частязы кожиз подполковник, юаз: кин ма вылэ ӝожтӥське? Вань возьдаськонзэ вунэтыса, Анатолий куриз: выжтэ, пе, монэ мукет азе, англи кылы вунэмлэсь кышкасько. Майоров озьы сюриз нимысьтыз назначениея батальонэ. Татын со 2 ар ӵоже радиопереводчик вал. Лушкем кылзӥськылӥз Америкалэсь но Западной Германилэсь куспазы вераськемзэс. Асьме солдатъёслы сак чаклано вал: вошъясько-а частьёссы, кӧня отын адямиез, кин командиръёссы.

Мар секретнойзэ тодӥды шуыса юасько но, Майоров чалме. Тодэм иворъёсты уг вуза шуыса, кылме, пе, сётӥ. Но огзэ пусйиз ик: ӟеч ужамез понна сое туж куро вылэм военной разведкае кыльыны. Удмурт пединститутэ запрос но ысъязы: кӧня курсэз йылпумъяз, кыӵе предметъёсты дышетӥз ни. Но таид формазэ вылысьтыз куштӥз. Удмуртие берто, шуиз, семьяелы, пе, матэгес карисько, соослы юрттӥсько.

Анатолий Майоров армиысь англи кылэз эшшо ӟечгес тодыса бертӥз. Удмурт пединститутын солэсь ӟеч студент ӧй вал. Сое туж куризы пединститутэ кыльыны, дышетӥсьмы, пе, уг тырмы. Туж ӧтё вал КГБ-лэн Москваысь вылӥ школаяз тодон-валанзэ муромытыны. Татчы со огвадес ачиз но йыгаськылӥз. Экзаменъёссэ ваньзэ ӟеч сётӥз, но тазалыксэ эскеронын пиртэшез шараяськиз: бергась пуконын ӧз чида. Комиссия ялӥз: ми татын переводчикъёсты ум дасяське — разведчикъёсты. Нош тӥ дась ӧвӧл парашютэн тэтчаны — йырды берга. Зэм, берлогес, кылъёсын ӟеч эшъяськемзэ тодыса, Майоровез со комиссия ик берен ӧтьыны ӧдъяз. Таяз рад тазалыкез но ӧз чуты. Но пиосмуртэ нокыӵе Москва но, Иж но ӧз гочаты ни. Сюлэмысьтыз ӧз потэ гуртоосызлэн кылъёссы: тон асьме выжы калыкмес югдыто шуид вал. Будэтӥзы: анай-атаед но пересь ни, нош гуртысь дышетӥсьёслы корказэс эстыны пу дунтэк сёто, тыл понна уг тыриськыто, мумид-бубидлы та туж бадӟым юрттэт луоз.

* * *

Жаляз-а Анатолий Николаевич Грак ёросаз бертэмез пумысен? Котькыӵе вакытъёсыз вал, дыр. Ма, сотэк-а шуэ:

— Вылӥ Эгра шор ёзо школаын ужаны кутскеме бере кайгырыны ӧдъяй: малы меда дышетон системамы палдурес? Одӥг школа ке но ушъяськоз шат нылпиосты англи кылын капчиен вераськыны дышетэменыз? Уз. Малпаське ай, ку спортсмен уногес вормон басьтоз: арняяз куинь час мугорзэ кыдатыса яке куинь нунал бызьылыса-позыръяськыса? Куинь нунал ӵоже пӧсяз ке, валамон ни, трослы кужмогес луоз. Англи сямен вераськыны кутскон понна но нуналлы быдэ кызь вить минутэн ке но дышетсконо. Сотэк-а дворянъёслэн но офицеръёслэн нылпиоссы кунгожсьӧр кылъёсты асьсэ вордскем кылзэс музэн тодылӥзы? Нош асьмелэн арняяз кык час висъямын англи кыллы. Та малпан сюлэмме ик вырӟытъяз.

Югдурысь потон понна Анатолий Майоров урокъёссэ пӧртэм сямен ортчытъяны ӧдъяз. Дышетскисьёссэ, соосыз быгато-а, уг-а, ялан куре вал англи сямен вераськыны. Шуэ вал: чукча «моя твоя не понимать» лулӟе ке но, сое ваньзы валало. Урокъёссэ учкыны вуо вал пӧртэм ёросъёсысь дышетӥсьёс. Ма, Алнаш ёросысь Асан совхоз-техникуме ужаны выжемез бере Гракысь пиналъёс, дышетӥсьсылэсь ӵыдытэк, ваньзы сямен техникуме пыризы.

Нош Асан пала вуттӥз сое семьяез. Школаязы Кезысь чебер нылмурт вуиз. Анатолий Николаевич соку ик синмаськиз Галина Сергеевналы. Егит математиклэн мукет туганэз вань шуыса, чик ӧз куректы. Шуиз: таид одно ик мынам луоз. Ӝоген кузпалъяськизы. Но анай-атай юртъерын трос кузя улыны секытгес луиз — егит Майоровъёс Алнаш ёросэ выжыяськоно кариськизы. Татын уго уж но ӵектӥзы. Визьноданэн вырон сямен татын Анатолий Николаевич кивалтӥз механизацияя отделэн.

* * *

Зэм, кин тодэ, макем вылэ ӝутӥськысал Майоров, КГБ-ын ужасалыз ке. Нош дышетон удысын солы будыны ӧз сётэ. Шонергес вераса — дунъяны но данъяны ӧз валалэ. Ачиз-а ӧз вала. Техникумын но пичи адями ӧй вал, собере Асан техникум шор ёзо школалэн директорез но вал, парторгын но бызьылӥз. Ачиз уно сюлмаськиз юлтошъёсызлы дано ним сётыны юрттон понна. Нош кивалтӥсь аслыз ачиз ним уз сёты ук. Мукетъёсыз ӧз валалэ, лэся. Собере ним басьтон понна весь одӥг азьын ужано, дыр. Нош со школа директорысь но ас мылкыдызъя кошкиз. Азьвыл кузёез берытскиз но часъёс курыны ӧдъяз уго, биология урокъёсты, пе, нуысал. Нош школаын со предметэн визьнодась вал ни. Ёросысь кивалтӥсьёс но зӥбыны ӧдъязы, лэся: эшмылы часъёс сёт​, ас дышетӥсьтэ улля. Нош кызьы янгыштэм муртэ уллялод? Майоров шуиз: психологлэсь дипломзэ басьтӥ бере, та удыслы бадӟымгес саклыкме висъяло, директорлэсь пуконзэ азьвыл кузёезлы ик берыкто. Малпамын — лэсьтэмын. Психологын кык ар ӵоже возиськыны тыршиз ик. Отӥяз та удысысь но кошкиз — кивалтӥсен улон шоры учконзы пӧртэм луиз. Нош психологъёслэн куронзы вань: аслад улонэд уг пӧрмы ке, муртэ эмъяны, уката ик нылпиосты визьманы, правоед ӧвӧл.

Озьы ке но Анатолий Николаевич ӧз ышы — районын ӟеч дышетӥсьлы кулэяськись школаос быриллямтэ. Арлыд люкай ке, шутэтско ни, малпа вал. Но пенсие потэмез бере но сое ас доразы кыскасьёс сюро. Али, кылсярысь, со бускель Татарстанысь Вандэмо (Монашево) школаысь нылпиосты визьнода. Семьязэ шутэтскон нуналъёсы сяна уг адӟы. Галина кузпалыз картсэ ческыт пыжиськемен пумита. Марина нылыз шумпоттэ дышетон удысын басьтэм вормонъёсыныз, филолог со. Аня нуныкаез пианинозэ улӟытэ. 7-тӥ классын дышетскись нылаш, крезьгур кисьтыны быгатэменыз, калыккуспо конкурсъёсы но пыриськылэ, отын ӟеч интыос басьтэ. Та ик мынам вормонъёсы, шуэ Майоров.

Елена Сараматова.

Удмурт Дунне
By Удмурт Дунне 4 октября, 2011 07:41