Интыям пукыны уг чидаськы!

Удмурт Дунне
By Удмурт Дунне Октябрь 4, 2011 07:40

Интыям пукыны  уг чидаськы!

Школаос ёрмо егит специалистъёслы. Бадӟым люкетэз визьнодасьёс куамын-ньыльдон ар ужало ни. Дышетон удысэ вамыштӥсь егит дышетӥсьёс пӧлысь ог 70 процентэз нырысетӥ вить ар куспын школаысь кошко.

Ижысь 56 номеро гимназиысь удмурт но фин кылъёсъя дышетӥсь Татьяна Фёдоровна Юминалэн но удыссэ чутрак воштон мылкыдыз поталля. Но соку мар сое возе школаын?

-Йылпумъяй Удмурт кун университетысь фин-угор ёзэз — милям группамы нырысетӥ выпуск вал. Отын 5-тӥ курсын дышетскыкум ик, ӵектӥзы 56 номеро гимназиын фин кылъя урокъёс нуыны. Сётӥзы 7-тӥ классэз. Кышкан но, мар но ӧй вал — мыным со ваньмыз туж тунсыко потӥз. Нош диплом басьтэме бере кытчы мынон сярысь кема малпаськыса ӧй улы — вамыштӥ гимназие ик.

Дышетӥсь луон мылкыды пичиысен ик туж бадӟым вал. Туж кельшылӥзы биология урокъёс. Но малы удмурт филфаке мынӥ? Школаямы удмурт кылъя но литературая урокъёсты нуиз Нина Анатольевна Ермокина. Со кадь луэме потӥз, вылды. Но таӵе вамышелэн мукет но мугез вань: ваменэс сямы. 11-тӥ классын дышетскыкум, удмурт кылъя олимпиадае пыриськи. Республикаын ортчись ӵошатсконэ Пичи Пурга ёрослы куинь гинэ инты висъяське вал. Ми ньыль кузя люкаськимы. Озьы мон олимпиадае мынӥ, конкурсэ пыриськытэк. Одӥг классын ӵош дышетскем эше Ольга Титова кыкетӥ интые потӥз — филфаке сое конкурстэк кутом, шуизы. Мон луи куинетӥ. Но конкурсэ уг пыриськиськы вал бере, ӝожомытӥзы: экзаменъёстэк, пе, дышетскыны кутыны ум быгатӥське. Ох, воже потӥз соку — деканатэ пыри но ӝот-ӝот верай: мон одно тӥ дорын дышетско!

Университетын 4-тӥ курсын дышетскыкум, монэ быдэс арлы стажировкае келяллязы Финляндие. Синтэм-пельтэм кучапи кадь мон отын вал. Сюрес вылэ потон азям валэктыса ӧз вуттэ, мар карыны кулэ мон мурт шаерын. Отчы вуэме бере шуизы: бырйы, кыӵе курсъёсы ветлэмед потэ. Фин кылэз сяна, бырйи этнографиез, фин крезьгурез кылзыны ветлӥ. Немец кылъя курсъёсы но пыриськоно кариськи на. УдГУ-ын та кылэз дышетӥ бере, эшъёсылэсь медам кыльы, малпай. Мар вал со! Урокъёс фин кылын мынӥзы. Дышетӥсьлэсь верамзэ финысь удмуртэ нырысь берыктӥсько. Собере гинэ валаны турттӥсько, мар ай кароно немец кылын. Шузимо ни кожасько вал.

Удмурт кун университетын милемлы туж зол пыӵатӥзы: удмурт кыл данын. Та выжыысь мукет кылэз тодӥд ке, туж умой! Малпанэ но ӧй вал: школаысь  кошкеме потоз… удмурт кылын сэрен.

Гимназие лыктэме бере ик шугъяськонъёс кылдӥзы учебникъёсын. Жаляса верано, татчы лыкто ӟучомем пиналъёс. Алевтина Николаевна Журавлёвалэн пособиез уггес тупа милемлы — удмурт кылэз тодӥсьтэмъёслы со секыт йӧтэ. Надежда Прохоровна Боталовалэн 5-тӥ класслы гинэ учебникез потӥз ай, вӧжооссэгес дышетыны номырин.

Гимназие огдыре ужаны лыктӥм университетын ӵош дышетскем эшеным Анастасия Григорьеваен. ӵошен ик басьтӥським «Вамыштомы артэ» дышетскон пособие дасян борды. Туннэ но ас программаосмыя ужаськом. Урокъёсын ӵемысь шудӥськом, кырӟаськом, суредаськиськом… Ярано, классамы вань телевизор, компьютер — урокъёсты радъяны соосын капчигес.

Но ужпум учебникъёс бордын гинэ ӧвӧл. Ужаны кутскеммы бере ик валам: городын удмурт кыл шоры кырыжгес учкыло. Удмурт кылэз дышетӥсь нылпиосты ӟуч огъёзъёссы отӥгес карыны туртто. Оломар вакытъёс вал со сыӵе! Мынам соку киосы воксё юскиськизы. Аслым шуи: школаысь кошконо. Но гимназилэн администрациез буйгатыны выриз: нылпиослэсь удмурт кылэз тодэмзэс ум куре. Удмурт культураен, сямъёсын но йылолъёсын тунсыкъяськонзы гинэ соослэн мед кылдоз. Татьяна Фёдоровна, та уж тӥ вылэ усе, шуылӥзы.

Мон сыӵе адями: маке йырам чилектэ ке, со уж борды ӝегатскытэк басьтӥськоно. Берлолы кельтыса, уз пӧрмы. Озьы Анастасия Григорьеваен нош ик кенешим, тазьы ужаны уг яра, шуим. Кутским команда люкан борды: кыӵе дышетӥсьёс ас предметъёсазы удмурт шӧм пыртыны дась луо? Пумитъяськисьёс ӧй вал. Озьы математикая, ӟуч кылъя, технологияя но трос мукет урокъёсын удмуртлыкез ми ум вунэтӥське.

Бӧрсьысь кык ар ӵоже потамы фольклоръя экспедициосы. Коньдонэн нырысь араз юрттӥз Финляндия, кыкетӥяз — Иж город. Кытчы потон сярысь кема йырме ӧй тӥя — Кечолэз бырйи. Гуртамы ляб дышетскись нылпиослы школа вань — отын улӥм. Отысь дышетӥсьёсты кури нылпиосыным удмурт кылын гинэ вераськыны. Ветлӥмы гуртысь песянайёс-песятайёс дортӥ — кылзӥм-гожъям вашкала кырӟанъёсты-веранъёсты. Нылпиослы туж кельшиз.

Валля арын потам Финляндие. Хельсинкилэн нуналъёсыз ӵапак тупазы. Вань музейёс ужазы дунтэк. Кытчы но  ӧм вуэ соку! Нылпиос фин но, англи но кылъёсты волятӥзы. Бен, гимназиын ми литературной фин кылэз дышетӥськом, вераськон кылзы соослэн мукетгес. Соин ик Финляндиысь куд-ог вуз карисьёсты кури: вераське, пожалуйста, милемын литературной кылыныды. Туж тунсыко вал.

Я, туэ гужем Эстоние потаменымы но ушъясько ини. Гимназиын 9-тӥ классэн кивалтӥсько. Нылпиосы быдэс классэн ветло искусствоосъя школае, калык кырӟанъёсты кырӟаны. Отысь дышетӥсен Михаил Ильич Бегишевен удмурт но фин шудонъёсын аспӧртэмлыко спектакль дасяно кариським. Проект дасям. Макем шумпотӥзы нылпиос Эстоние вуэмзылы. Кырӟамы, шудӥмы — быгатонлыкъёсмес возьматӥмы. Пӧламы ик — фин пиналъёс. Вуылӥм пӧртэм городъёсы. Одӥгез сыӵе шудонъёсмы бере классысьтымы Федя пияшмы доры лыктэм чик тодмотэм воргорон. Тон кытысь, юа, пе. Россиысь. Кытысьтыз? Удмуртиысь. Иське, удмурт — эн вунэты та сярысь, кутьку ул ас шӧдонъёсыдъя. Та вераськон сярысь пияш вань эшъёсыз азьын мадиз. Нылпиос мур малпаськонэ усизы. Таӵе пумиськонъёс бере пиналъёслэн удмурт но фин-угор выжыысь вань калыкъёслэн кылзы, культуразы шоры учконзы воштӥське.

Пичи дыръям мон туж аляк вал. Школаын дышетӥсьёслэсь ӧй кылзӥськылы — верамъёссэс пелям ӧй понылы. Туннэ малпасько ни: кыӵе укылтэм вылӥськем. Но интыям пукыны чидасьтэм сямы али но кылемын. Студент аръёсам ай мон университетлэн ӝог ветлонъя командаяз вал. Удмуртилэсь данзэ но одӥг пол гинэ ӧй утьылы. Кыкетӥ курсын дышетскисько ни вал — турнаськыкум пыдме туж вӧсь кари. Озьы спортэн люкиськоно луиз. Но куинетӥ курсысен дышетскеме потӥз на экономистэ — мынам кык вылӥ образование. Озьы гимназиын мон али дышетӥсь но бухгалтер. Дипломъёсы тузонӟыса уг кыллё.

Бен, та шоры учкытэк, школаысь кошкон мылкыдъёсы дырын-дырын бугырскыло. Котькуд дышетӥсьлэн сыӵе вакытъёсыз луыло, малпасько. Угось нылпиослэсь тон трос мылкыдъёс басьтӥськод. Но аслыд солэсь но трос сётоно луэ. Пинал уг шӧды ке со сярысь сюлмаськемдэ, сое валамдэ — соку ик тыныд тыбырыныз берыктӥськоз. Дышетӥсь нырысь ик зол психолог луыны кулэ, но психолог кулэ аслыз но.

Валля арын кошко гимназиысь, шуисько вал. Директормы шӧдӥз мылкыдме. Сётӥз шаерез тодонъя урокъёсты. Нимысьтыз программа та предметъя ӧвӧл — ачим сое дасяй. ӵектӥз на гимназиысь музеен кивалтыны — сӥземын со Удмуртиысь суредасьёслы, этнографилы. Вань та ужъёс сюпсизы монэ.

Туэ нош малпай: кошкисько та ужысьтым! 7-тӥ классъёсты проектъёс гожъяны дышетыны куризы. Сётӥзы на обществознаниея урокъёсты. Таосыз мон понна воксё вылесь. Озьы котькуд арнянуналэ табере кошке соослы дасяськонлы. Мыным со туж тунсыко — нош ик выйисько ни ужъёс пӧлы. Семьяосы талы уг шумпото, но чидало.

Россиысь анай кылъя дышетӥсьёслэн конкурсазы пыриськеме воксё малпамтэ шорысь луиз. 2009-тӥ ар. Москвае республикаысьтымы огнам мынӥ. Россилэн пӧртэм сэрегъёсысьтыз кызьлэсь ятыр дышетӥсьёс люкаськылӥзы. Соос пӧлын мон малпамтэ шорысь кыкетӥ инты басьтӥ. Келякузы но мыным шуизы вал: эн сюлмаськы, ӧд ке но вормы, яралоз. Конкурсэ дасяськыны юрттӥзы гимназиысь дышетӥсьёс, «Выжы» огазеяськонлэн кивалтӥсез Ангелина Петровна Решетникова трос лэсьтӥз. Но Москвае мынӥ но шугектонэ вуи. Презентациме фонограммаен дасяй вал. Сое лэзьыны ӧз луы. Кырӟано-эктоно луиз крезьгуртэк. Ярано, «Чипчирган» дышетӥз монэ асме сцена вылын возьыны.

Вуоно араз малпамтэ шорысь ик вуи республикаысьтымы «Устоез дышетӥсь» ӵошатсконэ. Финалэ ӧй шедьы вал — ньылетӥ луи. Шумпотӥ талы — ганяк кариськи. Но конкурс азинскытозь, арня кылемын на вал — жингыртӥзы, дасяськы, пе. Финалэ шедем одӥгез дышетӥсь висьыны усем. Арня куспын ӟигары воксё быриз. Но вакчи дыр куспын дасяськыса но, егит дышетӥсьёс пӧлын кыкетӥ инты басьтэмелы туж шумпотӥ.

Пиналъёсы классам туж тыршисесь. Анай-атайёссы шумпотто. Котькыӵе уж борды ӵошен басьтӥськиськом. Классмы но милям гимназиямы одӥгез устоез луэ — анай-атайёс ваньзэ лэсьтыса сётӥзы. Бадӟым тау гимназилэн администрациезлы. Татчы ужаны кутскеме дырысен дас ар тырмиз. Вакчи дыр куспын адӟизы соос тыршемме. ӧй но тодылы, документъёсме малы ке дасяло шуыса. Туэ августэ дышетӥсьёслэн конференцизы дыръя Россиысь огъя тодон-валан сётон удысысь дано ужась ним сётӥзы. Озьы вормонъёс борды кыстӥськон мылкыды нош ик лопырскиз.

Элина Кумачёва.

Удмурт Дунне
By Удмурт Дунне Октябрь 4, 2011 07:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<