Дышетӥсьёслы — юрт!

Удмурт Дунне
By Удмурт Дунне 18 октября, 2011 09:42

Туэ апреле Россиысь Правительстволэн кенешоназ эскериськиз визьнодасьёслэсь уждунзэс экономикаын шоро-куспо уждунозь вуттон сярысь юан. Правительстволэн Тӧроез Владимир Путин соку ӵектӥз дышетон удысэз азинтонъя программа юнматыны. Сое быдэсъянэз ас вылаз басьтӥз «Огъя Россия» партия.

Ортчиз кӧня ке толэзь. Шаерысьтымы котькудӥз сямен дышетон учреждение ас вылаз шӧдӥз ни выль тулкымъёсты. Кыӵе выльдӥськонъёс шумпоттӥзы? Кыӵе воштӥськонъёс витё азьланяз? Та ужпумъёс сэрттэмын-пертчемын алигес радъяськем паськытатэм кенешонын. Отчы пыриськизы Президент А. Волков, Кун Кенешлэн Тӧроез А. Соловьёв, парламентысь Тазалыкез утёнъя, демографияя но семья ужпумъёсъя но Наукая, дышетонъя, культурая но егитъёсын ужан политикая ялан ужась комиссиослэн кивалтӥсьёссы С. Кривилёва но Н. Сударикова, дышетонъя но наукая министр Андрей Кузнецов. Вераськонэ пыриськизы вузъёслэн ректоръёссы, ёросъёсысь но городъёсысь дышетонъя управлениослэн кивалтӥсьёссы, школаослэн директоръёссы но мукет. Ӧтемын вал Москваысь нимысьтыз куноос — Россиысь Дышетонъя академиысь академик, профессор С. Бондарева но армиысь генерал, «Дышетӥсьёслы юрт» проектлэн Удмуртияя координаторез Н. Аброськин.

Россиын дышетон удысэз азинтонъя выль программалэн дуныз — 120 миллиард манет. Улосъёсы со вуыны кулэ 2011-тӥ-2013-тӥ аръёс ӵоже. Туэ кутыны чакламын 20 миллиард манетсэ. Кытчы кошкоз сомында коньдон? Школаосы дышетон, сиён пӧран тӥрлык, компьютеръёс басьтонлы, чылкытлыкъя куронъёсты быдэсъянлы, визьнодасьёслэсь тодон-валанъёссэс будэтонлы но мукет. Вазен талы кулэ коньдонэз улосъёс ас кисыосысьтызы поттоно луо вал. Табере сое шыръяны луонлыксы кылдэ. Но ваньмыз та огшоры малпамын ӧвӧл. Шыръяськем коньдон кошкыны кулэ дышетӥсьёслэсь уждунзэс будэтонлы.

— 2010-тӥ арын пусйим Дышетӥсьлэсь арзэ, — тодаз вае дышетонъя но наукая министр Андрей Кузнецов. — Соку мылкыдмы ӝожмытгес вал: нокыӵе воштӥськонъёс ӧз ортче. Тросэзлэн соослы осконзы но кысыны кутскиз. Но Владимир Путин, «Огъя Россия» партия гижысь-пиньысь басьтӥськизы визьнодасьёслэсь данзэс будэтон борды. Удмуртиысь дышетон удыслы со чотын 255 миллиард 317 сюрс манет вуиз ни. Та вӧзы ог 20 но ӝыны миллион манет ватсаз на республикамы.

Отӥяз дышетонъя но наукая министр нимысьтыз дугдылӥз куд-ог лыдпусъёс вылэ. Шуом, туэ 1-тӥ сентябрёзь шаерысьтымы дышетӥсьёслэн шоро-куспо уждунзы 9 сюрс 700 манет пала вал, табере 12 сюрс 685 манетозь йылӥз ни. Будоз со азьланьын но. Берло дыре гинэ химия, физика, биология но мукет предметъёсъя 429 классэ лаборатория тӥрлык басьтэмын, школаосы 440 пала автобусъёс вуэмын, толэзьлы быдэ ог 9 сюрс дышетӥсьёс классэн кивалтэмзы понна ватсаса коньдон басьто. 75 сюрс пала 1-тӥ-5-тӥ классъёсын дышетскисьёс ӵукнаосы дунтэк сисько. Ог 75 процентэз тэшкылиос нылпи садэ ветло — Россиын та одӥгез ӟечез лыдпус.

— 20 ар талэсь азьло ваньмыз куашкамын вал, — пусйиз Президент Александр Волков. — Пыд вылэ султыны капчи ӧз йӧты. Но шонер сюрес вылын сылӥськом — таиз ӟеч шӧдӥське. «Огъя Россия» партилэн кичӧлтонъёсызлы луыса берло аръёсы республикаямы трос воштӥськонъёс ортчизы. Кӧня ке ар талэсь азьло гинэ шаерамы куашкан калэ вуэм 67 школа вал на. Али — 11. Ужпум пуктэмын: матысь аръёсы соос интые пуксёзы ӵыжак вылъёсыз, туала куронъёслы тупасьёсыз.

А. Волков нимысьтыз дугдылӥз гуртоос вылэ. Республикаямы улӥсьёс пӧлын соос 30 процентэз луо.

— Со 30 процент асьмемыз, городын улӥсьёсты, йӧлын, вӧйын, сӥльын сюдэ, — азьланьтӥз веранзэ Президент. — Шаермы сиён-юон поттонъя Россиысь устоосыз 10 улосъёс пӧлы пыре. Гуртоос тыршо бере, соослы пуктоно школаос, стадионъёс… Удмуртия та сюрестӥ йыгмыт вамыштэ.

 

* * *

Мар тужгес шумпоттӥсез возьма шаерысьтымы ды-шетӥсьёсты? Удмурт театре люкаськемъёс кичабонъёсын пумитазы Николай Аброськин генераллэсь верамзэ:

— Череповецын ортчем кенешон дыръя Правительстволэн Тӧроез Владимир Путин вераськиз дышетӥсьёслы улон инты басьтыны юрттон пумысен. Табере та малпан но улонэ пыӵаны кутскиз.

Вераськон мынэ тани ма сярысь: Россия дась луэ дышетон удысын тыршисьёслы 8 но ӝыны процентъем кредит висъяны. Дунызлэсь 10 процентсэ гинэ нырысь тыроно луоз. Сое басьтӥсьёслэн арлыдзы лыдэ уз басьтӥськы.

Удмуртиын «Дышетӥсьёслы юрт» проектэз радъяны оскемын Николай Аброськинлы. Али тодмо ни: кык юрт матысь дыре пуктӥськоз. Одӥгез Ижысь Вотка шоссеысь «Столичный» пичи районын. Отчы пырыны быгатозы дышетӥсьёс, эмъясьёс, артистъёс но бюджет удысын мукет ужасьёс — таӵе решение кутӥз республика. Кыкетӥез юрт ӝужалоз Машиностроительын. Таяз улон интыос висъяськозы дышетӥсьёслы гинэ, дунтэк. Соос служебной лыдъяськозы.

— Али вераськонъёс мыно Вотка, Сарапул, Глазов городъёсын таӵе юртъёс пуктон пумысен, — ватсаз Николай Аброськин.

 

* * *

Мар вите кун дышетӥсьёс-лэсь? Та ужпум вылэ нимысьтыз дугдылӥз Москваысь профессор Светлана Бондарева.

Россиысь Дышетонъя академия нимысьтыз эскеронъёс ортчытӥз: кӧня дырзэс висъяло анай-атайёс нылпиоссылы. Тодмо луиз: покчи классъёсы ветлӥсьёслы — ог 3 чассэс, шор классъёсын дышетскисьёслы — 1 но ӝыны чассэс, бадӟым классъёсы ветлӥсьёслы — ӝыны чассэс. Анай-атайёслэн дырзы ӧвӧл: соос сюлмасько семьязэс сюдон сярысь — ужано.

— Мар пӧрме? — азьланьтэ веранзэ Светлана Константиновна. — Нылпиосты визьман усе дышетӥсьёс вылэ. Куд-ог школаосын куштӥськизы психологъёслэсь, социальной педагогъёслэсь. Юнме! Али школаосын дышетыны кутскизы светской этикая курсъёсты. Туж кулэ маке! Нылпиос ог-огзэс дунъяны кутскозы.

Нош вераськонзэ профессор йылпумъяз тазьы:

— Пыраклы син азям кылиз нырысетӥ дышетӥселэн тусыз-буйыз, куараез. Со монэ али но шонер сюрес вылтӥ валтэ кадь. Озьы котькуд визьнодась сярысь вераны мед быгатозы нылпиос. Дышетӥсь улэ ке соослэн тодэ ваёнъёсазы, иське, со юнме дырзэ ӧз быдты, ас бӧрсяз ӟеч пытьы кельтӥз.

Элина Кумачёва.

Удмурт Дунне
By Удмурт Дунне 18 октября, 2011 09:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<