Дыр вуэ кырӟаны, дыр вуэ черк ӝутыны

Удмурт Дунне
By Удмурт Дунне 28 октября, 2011 11:21

Дыр вуэ кырӟаны,  дыр вуэ черк ӝутыны

Туннэ нуналэз Пичи Пурга ёросысь Брангуртын улӥсьёс возьмазы 60 арлэсь кема. 1947-тӥ арын татын куашкатӥзы черксэс. Со дырысен Брангуртэз черкогурт шуизы ке но, гырлыос татын ӝыны даурлэсь ятыр ӧз жуге ни. Но гурт калыклэн сюлмаз ватыса возем ӟеч малпанэз быдэсмон пала берытскиз. Туннэ черк ӝутыны чаклам интые из понӥзы.

Таӵе ужез вырӟытыны нырысь ик юрттӥзы Брангуртысь песянайёс. Одӥг но ӝыны ар талэсь азьло соос потӥзы «Евровиденилэн» Россиысь финалаз. Мар веранэз, кылемын на меда табере соослы паймымтэ мурт? Нош быдэс дуннелы тодмо луэм песянайёс чеберъяськыса озьы ӧз выре, шараязы асьсэлэсь пыдлось малпанзэс — гуртамы, пе, черк ӝутоно вал.

Кытчы пыризы обросъёс?

Брангурт куке-соку волостьлэн шорсюлмыз вал. Гуртын улӥз асьсэлэн купечсы но, пуктӥзы школа но, из черк но.

— Калыкмы кема аръёс ӵоже Инмарлы осконэн улэ, — шуэ гуртлэсь историзэ котькинлэсь зол тодӥсь шаерчи Николай Петров. — Тани нырысетӥ черк ӝутскиз 1865-тӥ арын. Талы уксё сётӥз Елабугаысь купеч Ф. Чернов. Выль черкез Троицалы сӥзизы. Нырысетӥ священнослужитель луыса Брангуртын ужаз Аристарх Авакумов. Со бӧрсьы та черклы 15 арзэ сӥзиз нырысетӥ удмурт просветитель Иоанн Васильев. 27 арзэ гуртын тыршиз мукетыз тодмо удмурт учёной но священник Григорий Верещагин.

Калык сюлмаз Инмарен улӥз. Туж дунъяз но яратӥз гурт черкез. Зэмзэ вераса, черклэн фундаментэз лябгес вылэм, соин йырин борддорез но тэшкаса кошкиз. Николай Петров, архивъёсын бугыръяськыкуз, адӟылӥз куд-ог вуж туспуктэмъёсты. Соосъя вераны быгатэ: 20-тӥ даурын черк сокем ушъяськымон ӧй вал ни, корказез но кырыжаз. Озьы ке но пересьёс туж ушъяллязы вӧсяськон интылэсь пушсэ. Татын, пе, номырин ӵошатонтэм чылкыт но югыт кужымез вал.

Но вакыт воштӥськиз. Черкын берлозэ пылатэм нуныос пӧлы шедиз на Брангуртысь песянайёслэн старостазы — Галина Николаевна Конева. 1938-тӥ арын сое чукынӥзы. Вуоно араз ини черкез ворсазы. Нош Быдӟым ож бере вӧсяськон юртлэн берпум нуналъёсыз матэктӥзы.

— 1947-тӥ арын гуртэ вуизы нефтяникъёс. Соос тямыс квартираем юрт ӝутӥзы. Отчы гуръёс пуктоно луиз. Нош кытысь кирпич? Соин черкез куашкатыны малпазы. Куинь тракторен лыктӥзы. Черклэн тэшкам интыез борды гозыосын но тросъёсын думиськизы. Тракторъёс кыскизы но — вӧсяськон юрт, кӧня ке юдэслы тӥяськыса, куашказ, — та нунал сярысь тодэ ваёнъёссэ толонэз сямен вера Галина Николаевна. — Соку ик черкысь обросъёсты тылэ куяны кутскизы. Нош гурт пиналъёс мудорез тылскемысь кыско но — дор палазы тапыр! бызё.

Мӧйыос со обросъёсты сандыкъёсазы, корка сигъёсазы ватылӥзы. Озьы ик куд-ог черк гырлыосты но гурт калык дораз нуиз. Куашкатэм черкез 2 ар куспын сэрттӥзы. Кирпичъёсыз бадӟымесь вал, табере сыӵеоссэ уг ни потто, шуэ Г. Конева. Со кирпичъёсын гуртоос гуръёс ӝутъязы. Соин Брангуртысь вашкала изъёсты али но шедьтыны луоз на.

Ужез вырӟыто песянайёс

«Евровидениысь» бертэм песянайёс доры куноос пумтэм ветлыны ӧдъязы. Россиысь уно газет-журналъёсысь но телеканалъёсысь журналистъёс татчы сюрес лёгизы. Ӧз вунэтэ асьме кивалтӥсьёс но. Песянайёсын тодматскыны вуылӥз Кун Кенешлэн Тӧроез Александр Соловьёв. Соку шоу-бизнесын воректэм выль «кизилиос» кивалтӥсьлы черк пуктон сярысь малпанзэс веразы. Александр Васильевич  куриз Пичи Пурга ёрослэсь йырзэ Михаил Леконцевез проект дасяны, оскытӥз, мукет юрттэт но луоз шуыса.

Кыӵе черк кулэ брангуртъёслы?  Та сярысь калык вераськиз гурт кенешын. Кин ке тодаз вае вашкала юртэз — со, пе, тӧдьы буямын вал, соин сыӵе ик пуктоно, шуо. Мукетъёсыз горд кирпичлэсь черк ӝутыны ӵекто. Инъет чотын чаклазы Дэри ёросысь Якшур гуртысь черкез, но татын со одӥг куполэн гинэ. Нош брангуртъёслы куинь куполэн кельше, озьы ик черклэсь пырон палзэ но мукетгес лэсьтыны чакламын.

— Проектлэн огъя дуныз — 10 миллион манет, — вера Брангурт администрацилэн йырыз Михаил Бектуганов. — Нырысетӥ ужъёс быдэстэмын ни. Черк пуктон интыын музъем межамын, лэсьтӥськонлы оглом 1 гектар висъяське. Вӧсяськон юрт выль интые пуксёз — школа, клуб, вашкала купеч корка  котыре.

Черксы ӧвӧл на ке но, гуртоослэн батюшказы али ик вань ни. Виктор баӵко татчы 60 иськемысь вуылэ. Брангуртын 90-тӥ аръёсысен вӧсяськон корказы вань, соин священник доры люкаськон понна уг ёрмо. Черк луиз ке, ми баӵкомылы гуртын улон инты но шедьтом, шуо песянайёс. Уго батюшка улыны кулэ аслаз приходаз, калыкез вӧзын.

Лэсьтӥськонэз вырӟытыны нырысь ик юртто Брангуртысь песянайёс.

— Милемыз кытчы ке ӧтё ке, мынонлэсь ум кышкаське, — шуэ коллективлэн кивалтӥсез Ольга Туктарева. — Табере песянайёслэн улонзы выльдӥськиз кадь. Соос калыкез дыртыто — фундамент кисьтыны ми уксё люкамы ни, шуо.

Вожзэс уз поттэ, дыр, Брангурт нылкышноос, соослэсь пичияк ватоссэс усьтӥ ке. Концертъёсын поттэм гонораръёссэс артистъёс куиньлы люко. Огез мынэ черклы, кыкетӥез — культурая юртлы, куинетӥез — пенсизы вӧзы.

Кырӟасьёс коньдон сьӧры уг уйисько, пӧртэм зулёнъёсты пелязы уг поно. Кытчы ке ӧтё ке, сюрес вылэ потыны дасесь. Доразы кыльыны быгато кык муген гинэ — кузпалзы висе яке скалзылэн кунян ваён дырыз вуэ ке.

«Пучоко» кырӟанысьтызы кылъёс песянайёслэн улоназы выжы лэзизы, ява. «Дыр вуоз — ми дась луом, куаш-куаш ужаса сётом», — гожтӥз кырӟанлэн авторез — 80 арессэ ортчем Зарбатова Лизапай.

— Паймымон ук со! Лизапаймы пинал дыръяз Балезино чугун сюрес лэсьтон вылын ужамын. Нош поездэн ветлэмез ӧй вал, — шуэ Ольга Туктарева. — 83 аресаз со нырысьсэ пуксиз поездэ, мынӥз Москвае, Кремль дворецысь сцена вылэ потаз!

Кызьы шунало

vip-учкисьёс

8 пол кырӟазы-эктӥзы ни песянайёс Кремльысь Съездъёслэн дворецазы. Берлозэ — 17-тӥ октябре. Со гинэ мар ай. Октябре артистъёсмы 18 нунал гастрольёсын ветлӥзы. Сюрес вылын кизьнылыны но кутскизы, озьы ке но мылкыдзы лоба!

2-тӥ октябре Брангуртысь усточиосты пумитаз Франция. Татын ортчиз Дуннеысь телевиденилы сӥзем фестиваль — солэн шорсюлмыз луизы Россилэн нуналъёсыз. Нырысетӥ канал татчы нуиз асьмелэсь песянайёсмес. Зэм, Канныез вань артистъёслы адӟыны ӧз кылды — 5 мурт гинэ Францие потаз. Песянайёс вискын но ог-огзылы вожъяськон мылкыд кылдӥз вал, дыр.

— Мон аслэсьтым интыме мукетъёслы но сётысал, — шуэ  Ольга Туктарева. — Мед мукет песянайёс но дуннеез адӟозы. Но продюсерлэн мылкыдызлы пумит уд кариськы ук.

Со понна мукет интыосы ваньзы ӵош — 8 кузя — мыныны быгато. Франциысь вуыса, кизилиосмы доразы 6 часлы пыразы. Табере сюрес нуиз Екатеринбурге — татын песянайёсты ӧтизы итальян дизайнерлэсь дуно бутиксэ усьтонэ. Котыр горд коверъёс, ваньмыз чиля-мальдэ. Котьмае адӟылэм vip-зал туж кезьыт учкиз удмурт дэремен но пыдазы кутъёсын пӧрмытскем кенакъёс шоры.

Таӵе секыт югдур шер тупалляз: зал дасямтэ, микрофонъёс кык гинэ. Коть али ик берытскы но кошкы. Эшшо песянайёс шоры клоунъёс шоры кадь учкыны ӧдъязы на ке, сюлмаськиз Ольга Туктарева. Соин песянайёслэн коллективенызы кивалтӥсь азяз ужпум пуктӥз: залэз вырӟытоно, милемлы мед синмаськозы.

Быгатӥзы ук! Кык кырӟан интые артистъёс 7 кырӟан быдэстӥзы. Висказ Ольга Николаевна коллектив сярысь мадиз. Залысь синъёс шуназы. Бӧрысь поездэ дыртӥсь песянайёсты адямиос котыртӥзы. Итальян куноос асьсэ кылын маке вераны выро, брангуртъёс поездэ дырто. Озьы бутик усьтонэ вуэмъёс паймымон песянайёсын фотое пуксьыны курисько вылэм.

Татысен сюрес пырак нуиз ни Эстоние — удмурт кизилиосмы пыриськизы Фин-угор калыкъёслэсь нуналъёссэс пусъёнэ. Кӧня ке нунал ӵоже пӧртэм сценаос вылын асьсэды возьматӥзы. 8 пумиськон тупаз. Уката пӧсь йӧтӥз берпуметӥ нуналаз — соку удмурт культуралы сӥзем нунал радъяськиз. Нылкышноос перепеч но пыжизы, ӝӧк выл тыр удмурт сиён-юон дасязы, пӧсятэм но лэсьтӥзы. Эшшо калыкез шулдыртӥзы. Брангуртъёс котырын шунам эстонъёс нокызьы кошкыны уг ни валало. Нош песянайёслэн арлыдзы вань бере — амалтэк жадизы. Тӥни сыӵе вылэм со — учкисьёслэн синмаськемзы.

Эстониысь бертыкузы, брангуртъёс кожизы Пскове. Татын соосты пумитазы культурая дворецысьтызы ужасьёс. Возьматӥзы городзэс, уката но паймымон потӥз Псковско-Печорской монастырь. Та храм 500 ар ужа ни. Власть вошъяськыку но, черк одӥг нуналлы но ӧз пытсаськылы.

Песянайёслэн бертон сюрессы эшшо Москвае кожылӥз на. Кремль дворецын нырысьсэ ортчиз Приволжск федерал округысь культуралы сӥзем фестиваль. Удмурт шаерлэсь яркыт луэмзэ возьматӥзы брангуртъёс но. Соосын ӵош — «Айкай» театр, «Малпан» группа но «Розовый слон» студиысь эктӥсьёс.

— Жадён вань ке но, со сэрыт ортчоз, — шуэ Ольга Туктарева. — Милемлы али синмаськисьёс вань бере, со дырез кутоно.

Кунгожсьӧръёс Брангуртысь песянайёслы пумтэм синмасько ке но, нылкышноос ярато потаны Удмуртиысь сцена вылэ. Тани ноябрьлэн кутсконаз ини соос концерт сётозы Пичи Пургалась культурая юртын.

Кыӵе малпанъёссы азьланезлы? Тазэ артистъёсмы шара уг верало. Инмарен валче улӥм ке, ваньмыз быдэсмоз, шуо.

Алёна Ионина.

Туспуктӥз Константин Ившин.

Удмурт Дунне
By Удмурт Дунне 28 октября, 2011 11:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<