Дукъялэн сиёнэз лыс, мынам — газет

Удмурт Дунне
By Удмурт Дунне 28 октября, 2011 11:31

Дукъялэн сиёнэз лыс, мынам — газет

А. Чернова, Р. Лесников.

Алнаш ёросысь Тыло школа туэ коркатуй лэсьтӥз. Одӥг липет улэ интыяськизы нылпи сад но, школа но.

Выль школа пуктэмен, одӥг урамазы асфальт кисьтӥллям. Табере татӥ туфлиен но ортчыны луэ. Но та ульчазэс гуртоос так но Тапочки урам, пе, шуо. Мар бордысь со потӥз, котькудӥз вералоз. Та ураме корка пуктэм Демьян Степанов, колхоз гараже разнарядкае тапочкиен васькем, мукетъёсыз, пе, резина сапегъёсын, кунчиозязы ик дэриен колӟаськемын. Гуртоос Демьянэз адӟиллям но абдраллям. Со дырысен урамлэн мукет нимыз ик ӧвӧл, Тапочки но тӥни. Та сярысь «удмурт дуннеосын» пумиськонын вераз Пётр Чернов писательлэн апаез Акулина Константиновна Чернова.

Акулина Чернова — Ужысь ветеран, 32 ар почтаын тыршемын. 82 аресъем песяй газет-журналъёсты али но мыло-кыдо лыдӟе.

— «Советской Удмуртиез», одӥг чурзэ но кельтытэк, лыдӟисько вал. Газеттылэн выль нимыз нырысь сюлэмъям ӧй вал. Табере дыши, эшшо но яратыса лыдӟисько. Выль рубрикаосты но кылдо, гурт улонэз но котыр ласянь возьматӥськоды, кӧня паймымон но визьмо адямиосын тодматӥськоды. Сараматовады паймытъя, азьло ведӥнъёс сярысь гожъяз, кураськись но кариськылӥз, табере лэчыт ужпумъёсты ӝутэ, — мылкыдзэ усьтэ Акулина Константиновна.

— Газетлэн вылыз котькыӵе медло, пуштросэз бордаз мед кыскоз, — веранзэ мытэ Кузьымгуртысь библиотекарь Галина Митрофанова. — Гуртоосмы библиотекае ӵем вуыло. «Удмурт дуннеез» подшивкае вурӟыса уг вуттӥськы ке, киысь кие кошке, вожмаськыса куро. Соин ик кылем арын аслам уксёеным библиотекае «Удмурт дуннеез» гожтӥ ини. Арлыдоос огвакыт юаса гинэ уло вал Михаил Атамановлэсь бамзэ. Владимир Шкляевлы но дышо кадь ини, бадӟым черк праздникъёс азьын Инмарлы сӥзем бамдэс утчало, «Оскон» потӥз-а ни шуыса, юало.

Арлыдо лыдӟисьёсмы, малпанъёссэс сяна, дэмланъёссэс но веразы. Родион Лесников татысь ветеранъёслэн огазеяськонэнызы кивалтэ:

— Газеттэс лыдӟисько но паймисько, кыӵе визьмо удмуртъёсмы асьмелэн вань. Но мынам мукетсэ вераме потэ. Туала законъёс ӵем вошъясько, выльдӥсько. Ми, пересьёс, сьӧразы ум вуиське, куддыръя валатэк но кылиськом. Законъёс, юридической визь-кенешъёс, выльдӥськонъёс сярысь тросгес печатлалэ, — индылэ Родион Семёнович.

«Удмурт дуннеын» потӥсь материалъёсты урокъёсын но кутыны луоно. Тыло школаын газетэнымы тодматыны, матысьгес эшъяськытыны сюлмаське автормы Елена Герасимовна Смирнова.

— Елена Герасимовна учительскойын но, котькуд линейка азьын но газеттылы реклама лэсьтэ, пиналъёслэсь но, милесьтым но юа: гожтӥськид ни-а «Удмурт дуннелы», сое одно ик лыдӟоно, — шуэ дышетӥсь Надежда Ивановна Тугбаева.

— Ма, озьы, дукъялэн сиёнэз лыс шуэм выллем, нош мынам — весь газет, газет. Тунсыко гожъяськоды бере, тросгес калык мед лыдӟоз, пиналъёс мед тодозы, тӥледын кусып мед тупатозы кадь йӧтэ, — мылкыдзэ усьтэ Елена Герасимовна.

Галина Семёнова.

Удмурт Дунне
By Удмурт Дунне 28 октября, 2011 11:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<