Дада ошмес дораз ќтчалоз

Удмурт Дунне
By Удмурт Дунне 26 октября, 2011 12:15

Пичи Пурга ёросысь пичи гинэ Тыло гуртын вордскем писатель Семён Самсонов чеберлыко литератураын ӟеч пытьы кельтэменыз быдэс дуннеысь лыдӟисьёс понна тодмо луэ. Солэн произведениосыз уно выжы калыкъёс доры вуттэмын. Семён Александровичлы туэ 80 арес тырмысал. Таин валче кылем арня вискын Эдэйгуртысь (Бобья-Учаысь) культура юртын, солы сӥзьыса, «Тодӥськом но данъяськиськом» конференция ортчиз.

Пичи Пурга ёросын туэ быдэс ар писательёслы Самсонов агай-вынъёслы сӥземын. Угось соослэн туэ юбилейзы тупа. Верамы ини, Семён Александровичлы — 80, Никвлад Самсоновлы 65 ар тырмысал. Озьы ик соослэн выжыысьтызы потэм писательёслы — Семён Карповлы — 65 арес, Владимир Возняковлы — 50. Тае лыдэ басьтыса ик, ёросын ялэмын вал «Тодӥськом но данъяськиськом» конкурс. Отчы пыриськисьёс Самсонов агай-вынъёслэсь творчествозэс сэрттӥллям-пертчиллям. Вормисе потӥзы нылпиос но, дышетӥсьёс но, культура удысын тыршисьёс но.

Конференция пумын нылпиос писательёслэн произведениоссыя инсценировкаос возьматӥзы, кылбуръёс лыдӟизы. Семён Александровичлэн Володя но Андрей вынъёсыз но кылбуръёс гожъязы. Чуръёссыя чебересь кырӟанъёс чузъяськизы.

Собере ужрад выжиз тужгес но тунсыко палаз: Семён Самсонов нимо премиез сётонэ.

— Ёросамы нырысьсэ та дано премиез сётыны малпамы, Ижысь землячествоен кенешыса, туэ кык муртлы — Семён Александрович Самсоновлэн кузпалызлы Мария Михайловналы но Андрей Александрович Самсоновлэн кузпалызлы Галина Николаевналы, — ивортӥз Пичи Пурга ёрослэн йырыз Михаил Леконцев. — Та ӵектонэз ёросысь депутатъёсын эскеримы. Нокин пумит ӧз луы. Угось писательёслэн кузпалъёссы но удмурт литература понна трос лэсьтӥзы: Мария Михайловна Семён Алексадровичлэсь произведениоссэ ӟуч кылэ берыктӥз, нош Галина Николаевна Андрей Александровичлэн кылбуръёсызъя кырӟан гуръёс гожъя. Чебересь кылбуръёс пӧрмытъя. Писпу юн выжыеныз. Озьыен асьмелы вань кинлэсь адӟем карыны.

Самсоновъёслэн кузпалъёссы, та бадӟым синпель-кузьымез басьтыкузы, синвуаськизы:

— Таӵе-таӵе шумпотонэз адӟомы шуыса, малпанмы ик ӧй вал, — огымысь кадь шуизы соос. — Бадӟым тау кареммы потэ, кузпалъёсмес уд вунэтӥське шуыса,  Пичи Пурга ёрос кивалтӥсьёслы но гуртоослы, школаын дышетскись нылпиослы но дышетӥсьёслы.

Та бадӟым ужрадэ люкаськем калыкез но премиез басьтӥсьёсты ӟечкылаз Удмуртиысь Писательёслэн огазеяськонзылэн тӧроез Егор Загребин. Со пусйиз: та премиез азьланяз элькун премия кароно.

Озьы ик лыдӟисьёс ӵектӥзы Самсоновъёслы сӥзем праздникъёсты Тыло гуртысь Дада ошмессы дорын яке музеязы ортчытъяны.

Та ӵектонъёс ваньмыз лыдэ басьтэмын луозы, оскытӥзы кивалтӥсьёс.

— Премиез арлы быдэ сётъялозы одӥг муртлы гинэ. Мылкыд карисьёслы али ик со вожвылъяськонэ пыриськыны ӵектӥськом ини, — шуэ премиез сётонъя комиссилэн валтӥсь муртэз, библиотекарь Людмила Шумилова. — Сюрес усьтӥськемын, азьланяз со вольыт но ӵошкыт мед луоз.

Любовь Тихонова.

Туспуктӥз Михаил Егоров.

Удмурт Дунне
By Удмурт Дунне 26 октября, 2011 12:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<