Гуртлэн улонэз нылпиос бордын

Удмурт Дунне
By Удмурт Дунне 28 октября, 2011 11:10

Гуртлэн улонэз нылпиос бордын

Сюмси ёросысь Пижыл станциысь школа-сад усьтӥськиз туэ.

1990-тӥ аръёсы пиналъёс ӧвӧлэн нылпи садъёслэсь юртъёссэс мукет удысъёслы сётъязы. Буш уд возьы ук. Озьы каризы быдэс Россиын. Но пумен, ӟеч улонлы оскыса, семьяос будыны кутскизы. Таин валче садъёсы черодъёс кылдыны ӧдъязы. Ма кароно? Та юанэз сэрттон-пертчон борды 2007-тӥ арын ик басьтӥськиз Удмуртилэн Президентэз Александр Волков. Москваысь нокыӵе косон-курон вуэмын ӧй вал на, нош со юртъёсты выльысь берыкъяны кутскиз покчиослы. Соин валче 2010-тӥ арозь республикаысьтымы городъёсын тупатъян ужъёс ортчытэм бере ужаны ӧдъяз 32 нылпи сад, 2-сэ ӵыж-выльзэ ӝутӥзы. Со дыре ик оптимизациен валче нылпи садэз пыртыны ӧдъязы школа библиотекаен я медпунктэн одӥг липет улэ. Озьы ортчем аръёс ӵоже пуктэмын вал 16 объект.

Ас вакытаз нылпи садысь буш улӥсь сэрегъёсты сётылӥзы спортзаллы я крезьгуръя кабинетлы. Но малы садлы, шуом, кык актовой зал? 2006-тӥ-2010-тӥ аръёсы соосты одӥген келляны кутскизы, интыязы выль группа усьтыса. Озьы республикаямы 4 сюрс 727 инты кылдӥз. Туэ чакламын эшшо 1 сюрс 341 инты усьтыны. Бюджетысь солы 345 миллион манет висъямын.

 

Син пӧртман ӧвӧл та!

Валамон ни: табыдӟа вормонъёсты адӟытэк ӧз кыле Москваын. Ӟечен пусъе Удмуртилэсь азинсконъёссэ Россилэн Президентэз Дмитрий Медведев но.

— Ижысь 274 номеро нылпи сад 1990-тӥ аръёслэн кутсконазы ворсамын но вузамын вал. Но кыкетӥ арзэ ни солэн борддоръёсаз нош ик чузъяське пиналъёслэн серекъям куаразы. Отчы ветлэ 110 пинал. Соос понна дунтэк ужало пӧртэм кружокъёс но секциос. Та ласянь Удмуртия туж адӟем карымон ужа. Вужзэ тупатэмен гинэ уг буйга, выльзэ но ӝутэ, — Федерацияя Кенешысь но Правительствоысь адямиос азьын шуиз Дмитрий Медведев.

Сюлмаськонъёс бадӟымесь, йырвизез ужатытэк, соосты уд быдэсты. Но шумпоттӥсез но вань. Кылсярысь, Россиысь устоез нылпи сад конкурсын вормисе потӥзы Глазовысь 40 номеро но 11 номеро нылпи садъёс, кивалтӥсьёссы Елена Худякова но Лариса Лосева дипломъёсын пусъемын.

— Собыдӟа вормон туж бурдъя, — шуэ Елена Худякова. — Нылпиосмы пичиесь на кадь, нош макем соос шумпотӥзы устоез луэммылы — али ик ваньзэ валало. Огез пияшмы юа: табере, пе, мукетъёсыз милесьтым адӟем карозы но, асьмеды котьку умой гинэ возёно на-а? Анай-атайёс но данъясько. Асьмелэн но эшшо золгес ужаммы потэ.

Зэмен ик, Россиысь устоез сад луон — бадӟым дан. Тросэз со сярысь малпаны ик уг дӥсьто. Ма, куд-огез пичиесь вормонъёссы понна но шумпотэмысь дугдэмын ӧвӧл на. Кылсярысь, Сюмси ёросысь Пижыл станциысь калык туннэ ке но уйвӧтын кадь улэ. Татын  туэ 1-тӥ сентябрьлы усьтӥськиз уго школа-сад. Чакламын со 54 дышетскисьлы но 36 тэшкылилы. Табыдӟа праздникез соос дасо ар возьмазы. Вашкала школа юртсэс, медаз куашка шуыса, пыкъяса возизы ни вал. 1949-тӥ арын пуктэм нылпи садзэс нош воксё но огдырлы 2009-тӥ арын пытсаллязы — Роспотребнадзорын ужасьёс усьтыны ӧз лэзе уго, туж урод ни, пе. Соин ик школа-сад ӝутэмлы пижылъёс нырысь-валысь ӧзгес оске. Но со син пӧртмам кадь ӝог пуктӥськиз.

Анай-атайёс но, татысь дышетӥсьёс но пусъё: улыны мылкыдмы ик, пе, ӝутӥськиз.

Жаляса верано, вань гуртъёсын таӵе дворецъёс ӧвӧл на. Удмуртиын туннэ ог 80 нылпи сад тупатъямез кулэ каре. Нош 4-зэ коть али ик куашкаты — сокем уродэсь соос. Тае тодытэк-адӟытэк уг уло вылӥ кивалтӥсьёс, соосты но сыӵе югдур висьытэ. Озьы Ува каргуртысь 6 номеро нылпи садзы интые али лэсьтӥське ӵыж-вылез. Вавож черкогуртысь но 2 номеро нылпи садзэс ӝоген воштозы — солы проект дасяське ни. Куинетӥез века на Яр ёросысь Биграгуртын. Ньылетӥез мылкыдзэс сӧре Дэри ёросысь Люкшудья гуртын улӥсьёслэсь. Та берлооссэ куашкатыны но интыязы выльзэ пуктыны чакламын 2014-тӥ арозь. Сыӵе лыдпусъёсты вераз Удмуртиысь Дышетонъя но наукая министерствоысь калыклы материально-технической юрттэт сётонъя отделэн кивалтӥсь Василий Сусеков.

 

Кышъет уг юртты

Василий Сусековлэн лыдпусъёсызлы пумит ваземзы потоз, дыр, Можга ёросысь Можга черкогуртын улӥсьёслэн. Туэ вазь тулыс уго татысь садэз пытсазы. 58 пинал ураме кылиз, шуыны луоз. Пӧсь гужем но ортчиз ни, сӥзьыл зоръёс но вуизы, нош тэшкылиослы туннэ ке но липет ӧз сюры на…

Можга черкогуртысь нылпи садлы 39 ар. Кирпичлэсь ӝутэм юртъер ноку буш ӧз кыльылы. Нош туннэ со тышкам пуны кадь огназ сылэ. Нылпиос котыртӥз бергало ик. Оло шудонъёссылэсь мӧзмо, оло воспитательёсынызы пумиськон утчало — ӧйтӧд. Но соосты юртъер доры матэ но уг лэзё — борддоръёсыз пилиськыса шори вайяськыны кутскемын. Кин тодэ, тол вылтӥ вормозы на-а соос липетсэс.

— Ижъёс вуылӥзы ни дӥнямы. «Удмуртгражданпроект» огазеяськонын тыршисьёс садэз учкизы но ялӥзы: тупатъян ужъёслы туж трос уксё кошкоз — капчигес выльзэ пуктыны. Проект-смета лэсьтон понна гинэ кулэ 1 миллион 900 сюрс манет. Районын собыдӟа уксё ӧвӧл, — шуэ Можга муниципал кылдытэтлэн йырыз Сергей Пономарёв.

— Ма, садлэн юртъерез одӥг уй куспын гинэ ӧз пилиськы, дыр, ук…

— Пилиськем интыоссэ кышъяны вырылӥмы ни олокӧня пол. Гипс но пасьёсаз кисьтамы. Толыкез ӧвӧл. Нылпиосты отчы лэзьыны кышкыт.

— 58 пинал собере урамын будоз-а? Школады бадӟым, нош дышетскисьёсты ӧжыт, шуо. Оло, одӥг-кык классэз ке но тэшкылиослы висъяно.

— Школамы, зэмен ик, пичи ӧвӧл. Нылпиосмы но ичи уд шуы — 115 кузя. Дорамы ветло на артысь Вишур гуртысь пиналъёс. Со сяна, бордаз ужа искусствоосъя школа. Соин ик классъёсты садлы висъян сярысь вераськыны уг луы. Ми мертаськемын ини ог 10 иськемлы палэнэ пуксем Кватчи гуртысь сад шоры. Татын со паськыт. Отын милемлы 2 группа усьтыны туртто. Куд-ог анай-атайёс ог дасо пиналэз отчы асьсэ машинаен нулло ни. Ёросысь дышетонъя управление но кылдэм югдурысь потон амал утча. Автобус но висъялом, шуо, нылпиосмес Кватчие нуллон понна. Но туннэ ми шофёр ум шедьтӥське. Кинлы гинэ ум вазиськиське, я бадӟым кыл кутонлэсь кышкало, я кыӵе ке мукет муг шедьто. Водителе дунтэк дышетыны келяломы шуыса ялонэн но потамы ни — вазиськисез ӧвӧл. Сюресэз но тупатыны ми дасесь.

— Асьтэлэн но нылпиосты пичиесь на, лэся.

— Бадӟымез школае ветлэ ни, пичиезлы 1 арес но 4 толэзь. Соин ик нылпи сад ӧвӧл шуыса, ачим но куректӥсько. 2010-тӥ арын 18 пинал вордӥськиз. Туэ эшшо ог дасо люкаськозы, вылды, ар пумозь. Но матысь дыре югдурмы уз воштӥськы, дыр. Кивалтӥсьёс нырысь ик ӝутом, шуо, Можга ёросысь Удмурт Сюгаил гуртысь нылпи садэз. Таид 2000-тӥ аръёслэн кутсконазы ик пытсаськиз ни. Отын пиналъёссы милесьтым но трос. Таослэсь улон-вылонзэс радъяса гинэ, ми борды басьтӥськозы.

Со дыре ик кылӥськиз: нылпи садлэсь ваньбурзэ пумен тус-тас каро ни. Садлэн азьвыл кивалтӥсез Лариса Куршина шуэ:

— Зэмен ик, ваньбурмес артысь гуртъёсысь садъёсын курисьёс сюризы ни. Трос шудонъёсмы, койкаосмы кошкизы Вишуре но Кватчие. Берлояз асьме нылпиосмес но интыяны медо кадь. Но анай-атайёслэн пиналъёссэс сокеме лэзьямзы уггес поты. Зор-кот дыръя сюрес уродгес луэ уго. Соин ик куд-ог мумыос выльысь декрет отпуске потыны медо, тэшкылиосмылы 3 арес тырмытозь, пе, дорамы пуком. Юн ӝожомисез но шеде: нылпи садмы ӧвӧл бере, черкогуртмы но пумен быроз, вылды. Ма, картъёссы так но палэнын ужало, арняосын семьяоссэс уг адӟыло. Сьӧразы ик кошкозы, дыр, пумен.

— Кватчиысь сад вань пиналъёстэс дораз тэрытоз-а?

— Ма, куд-огез дораз пукыны медэ бере, ваньзылы койка сюроз, вылды.

— Мар чотын бен Кватчиын инты сюриз?

— Куд-ог кабинетъёссы буш улӥзы. Ӵапак соосты ик выльдӥзы-утялтӥзы. Югдурмес умоятон вылысь мон ачим «Удмуртгражданпроектын» ужасьёслы ӵектӥ вал: оло, кык этажъем садмес одӥг этажъем кельтомы, пась липетсэ басьтыса. Соку уго черкогуртамы одӥг-кык группа ке но возьыны луысал. Но талы соглаш кариськись ӧз луы. Одӥг этаж кельтон понна гинэ но ой-ой кӧня уксё кулэ.

Ярам коть, шумпоттыны выриз Можга районысь дышетонъя управленилэн кивалтӥсез Альфат Исымбаев:

— Сюгаилын югдурзы, зэмен ик, юзыресгес. Соин ик Президент шуиз, нырысь отчы 70 нылпилы чаклам сад ӝутом. Но Можга черкогуртэз но ум вунэтӥське. Шофёр но пумен шеде ни кадь. Нылпиоссэс Кватчие ӝоген нуллыны кутском. Сюрессы вольыт ӧвӧл. Но сое но каллен тупатъялом. Гуртлы бырыны ум сётэ.

 

Вуж ке но, асьмелэн

Таӵе югдуре вуэмзы сярысь ёросысьтызы мукет садъёсын но тодытэк уг уло. Валамон ни: черкогуртъёсты жаляло.

— Милям асьмелэн но садмы ӵыж-выль ӧвӧл ке но, музонъёслэсь улонзэс адӟыса, маке вылэ ӝожтӥськыны ик возьыт потэ ни, — шуэ Пичи Сюга садысь нянечкаын ужась Раиса Соковикова. — Шумпотӥськомы ни соизлы но: бадӟым гуртъёсын сямен, дорамы тэшкылиос черодын но уг сыло. Солэсь ортчыт — группаямы пинал уг тырмы. Ваньмыз-ӧвӧлэз пичиосмы 57 кузя. Дӥнямы ветло Пичи Копкаысь экеос-дыдыос. Артэгес ик сылэ шор ёзо школа, медпункт. Кин тодэ, гуртмы али кыӵе улысал меда, та юртъёс ӧй луысалзы ке. Гуртлэн улонэз уго сад бордын. Табере уже уката капчи мылкыдын ветлӥськомы — уждунмы будӥз уго. Азьвыл 4 сюрс 400 манет киям вуэ ке вал, кылем толэзе 6 сюрс басьтӥ ни. 27-тӥ арзэ ужасько. 100 манет но гуртын бадӟым коньдон ай. Татын пудо вордонлэсь гуртоос куштӥськизы ни уго. Ма, уж ӧвӧл бере, картъёсмы городын тыршо. Кин но со каре улыны кошке ик. Но соос сьӧры шонтэм уг поты на. Сюгамы ик сюлэмлы матын. Нош нылпи сад луиз ке, азьланяз но нылпиос вордӥськозы.

Елена Сараматова.

Удмурт Дунне
By Удмурт Дунне 28 октября, 2011 11:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<