Выльдӥськон сюрес вылын

Удмурт Дунне
By Удмурт Дунне 14 октября, 2011 10:11

Выльдӥськон сюрес вылын

2000-тӥ арын 15-тӥ октябрьысен шаермес азьлане валтэ Президент Александр Волков. Огинтыын лёгаськыса улон ортчиз. 11 ар куспын лэсьтэмын бадӟым вамышъёс. Кыӵе гинэ удысэз эн чакла — котькытын выльдӥськон, ӝутскон. Соосты  адӟыны луэ быдэстэм уж пыр, со сярысь верало нимаз адямиос но. 

2001-тӥ-2011-тӥ аръёсы Удмурт Республикаын

калыкез улон-вылонын утён удысын пуктэмын,

выльдэмын 505 юрт:

216-ез — дышетон удысын, пӧлысьтыз 150-эз — школа

113-ез — тазалыкез утён удысын

38-эз — социальной удысын

48-эз — культура удысын

54-ез — спортъя бадӟым объектъёс.

 

Та объектъёс пӧлысь 258 юрт быдэстэмын

ёрос центръёсын но гуртъёсын:

141-ез — дышетонын, пӧлысьтыз 121-ез — школа

28-эз — тазалыкез утёнын

32-ез — социальной удысын

24-ез — культураын

30-эз — спортъя объектъёс.

 

Аслад борддоръёсыд сьӧрын шуныт

Туэ республикаын пуктыны чакламын 500 сюрс квадрат метр улон инты. Пӧлысьтыз 300 сюрс квадрат метрез люкаське нимаз адямиослэн юрт ӝутэмзы чотын.

Куинетӥ арзэ бадӟым саклык висъяське егит семьяослы. Президентлэн «Егит семьяослы — улон инты» программаезъя 5 сюрслэсь уно кузпалъёс квартира басьтозы капчиятэм кредит чотын. Ар йылпумъяськытозь, аслаз липет улаз пыроз 2 сюрс 570 семья.

Лариса Новикова, «Егит семьяослы — улон инты» программае пыриськем мурт:

— Иже лыктыса, 6 ар ӵоже семьяеным мурт квартираостӥ ветлӥм. Кузпалэным ӵош уждунмылэсь бадӟым люкетсэ улон инты понна тыриськом вал. Кылсярысь, 2010-тӥ арын толэзьлы быдэ 7-8 сюрс манет сётылӥм. Таӵе йыр висён туж шугъяськытӥз, соин малпаськылӥм ни общежитиын комната басьтон пумысен.

Президентлэн ялэм программаяз соку ик пыриськыны ӧм быгатэ. 5 толэзь ӵоже  документъёс бичамы. Та ужез йылаз-пумаз вуттыса, банкысь 1 миллион 280 сюрс манет кредит басьтӥм. Квартира басьтон понна ӧм жалялэ машинамес но — выль «семёркамес» вузамы но коньдонзэ нырысетӥ взнос чотын сётӥмы. Озьы кылем ар пумын улыны потӥмы ни кык висъетэн квартирае.

Табере котькуд толэзь кредит тыриськом — 9 сюрс манет. Но таиз — асьмелэн липетмы понна.

 

Культура котыре кыстӥськон

Шаерамы искусство но культура удыс понна ужа 1 сюрс 500-лэсь трос учреждение. Арлы быдэ театре но концертъёсы ветлэ 30 процентэз калык, музее пыро-пото 25 процентэз улӥсьёс. Библиотекае книга басьтыны, газет-журнал бугыръяны вамыштэ 38 процентэз калык. Культура учреждениосы ветлӥсьёс пӧлысь 70 процентэз — нылпиос но егитъёс.

Валентина Рассомахина, Кизнерысь киужъёсъя юртэн кивалтӥсь:

— Туж шумпотӥськом, Кизнерамы таӵе чебер культура юрт ӝутӥзы шуыса. Киужъёсъя центрмы азьло интыяськемын вал вуж юртын. Кабинетъёс пичиесь, соин ик трос нылпиосты, уно калыкез дорамы ӧтьылыны-дышетыны луонлык ӧз шедьылы. Столярной цехез отын бадӟымгес вал, но вуэн, шуныт сётонэн шугъяськонъёс кылдылӥзы. Нош али ми тыршиськом культура юртысь кыкетӥ этажын. Кибашлыослы висъямын вить вӧл-вӧл, шуныт, югыт кабинет. Мыло-кыдо ужаны татын вань луонлыкъёс кылдытэмын.

Табере ми клубын ужасьёсын, ог-огмес утчаса, ум бызьылӥське ини, вань ужрадъёсты ӵош ортчытъяськом, ог-огмылы юрттӥськом, татын пичи но бадӟым залъёсмы вань. Нылпиос но татчы тросгес ветло, бадӟымъёс но экскурсиосы, выставкаосы мыло-кыдо вуыло.

 

Вирсэръёс

Удмуртиын 18 сюрс иськем автомобиль сюресъёс. Соосты утён но выльдон понна Правительствоын юнматэмын нимысьтыз программа. 2010-тӥ-2015-тӥ аръёсы республикаямы тупатъяно 1 сюрс иськем сюресъёсты. Со сяна, ӝутоно 165 иськем улос сюресъёсты, выльдоно 1 сюрс 604 иськем гурт сюресъёсты.

Олег Гарин, транспортъя но сюрес хозяйствоя министр:

— Сюрес лэсьтон удысын тужгес пусйымонэз — Ижлэн шундыпуксён палаз котыр сюрес ӝутон. Солэсь берло люкетсэ быдэстӥм 2009-тӥ арын. Туэ милям министерствомы азьын уката бадӟым ужпумъёс сыло. Табере котыр сюрес кулэ шоркарлэн шундыӝужан палаз.

Таяз аре федерал бюджетысь 609 миллион манет субсидия вуиз. Вераны кулэ: быдэс Россилы сюресъёсты тупатъянлы чакламын вал 5 миллиард манет. Шумпотымон: Удмуртия та коньдонлэсь бадӟым люкетсэ кыскыны быгатӥз. Таӵе вормонъёсмы ӧй луысалзы, республикаысь кивалтӥсьёс та уж понна ӧй ке сюлмаськысалзы. Уго федерал бюджетысь субсидия вӧзы ватсано на вал шаерысьтымы уксёез — 189 миллион манет. Со чотын лэсьтэмын луозы 62 иськем гурт сюресъёс.

Оскон доры — удмурт кылын

Выльысь ӝутско черкъёс но. Выльдон ужъёс йылпумъяськизы Юкаменск ёросысь Ёжгуртын. Реставрация мынэ на Сарапул ёросысь Мазуниноын но Яромаскаын, Каракулино ёросысь Галановоын но Колесниковоын, Сьӧлта ёросысь Валамазын но Яр ёросысь Уканын.

Галина Шушакова, УдГУ-ысь филология наукаосъя кандидат:

— Туж умоен учкисько шаерамы выль черкъёс пуктон шоры. Октябрь революцилэсь азьло но удмурт калык черке ветлӥз, пиналъёссэ чукынылӥз. Зэм, совето аръёсы та сям уретӥськиз. Озьы ке но удмурт калык котьку сюлмаз Инмарен улӥз. Фольклор экспедициосы поталлякум, трос пол кылылӥ мӧйыослэсь удмурт кылын чирдэмъёссэс.

Ижын Дун-чылкыт Михаиллэсь соборзэ куашкатэм интыяз ик выльысь пуктозы шуыса тодэме бере туж шумпотӥ. Табере мылкыды уката ӟеч. Малы ке шуоно та черклэн Вералы, Надеждалы, Любовьлы но София анайзылы сӥзем приделаз ортчо удмурт кылын службаос. Татын чирдо удмурт баӵкоосмы — Николай но Павел. Студентъёсмы но черке кыстӥсько. Удмурт калык котьку оскись но вӧсяськись вал. Малпасько, асьмелэн оскон мылкыдмы табере уз ни уретӥськы.

Удмурт Дунне
By Удмурт Дунне 14 октября, 2011 10:11