Вормеммы понна кулэ музъем

Удмурт Дунне
By Удмурт Дунне 4 октября, 2011 07:24

Удмурт парламентлэн Тӧроез Александр Соловьёв 29-тӥ сентябре пумиськылӥз ветеран огазеяськонъёслэн активенызы. Ужрадэ вуылӥзы афган, чечен ожъёсы пыриськылэмъёс, чернобылецъёс, ветеранъёс-пограничникъёс но МВД-лэн ветеранъёсыз. Ужрадэ ӧтемын вал егитъёсын ужанъя министр Владимир Соловьёв.

Та пумиськон радъямын вал, Челябинск улосысь «Маяк» ядерной комбинатын 29-тӥ сентябре 1957-тӥ арын пуштон луэм нуналлы тупатыса. Специалистъёслэн лыдъямзыя, «Маякын» авария дыръя инкуазе 20 миллион кюри радиация вӧлмем, Чернобыльын — 50 миллион кюри.

Кун Кенешлэн Тӧроез люкаськемъёслы шуиз: тӥ доры лыктон азям юн сюлмаськи — малы асьме калыклэсь та учырез кема ватыса возизы? Чернобыльын шимес учыр ӧй луысал ке, оло, али но асьмеос «Маякез» ӧм тодысалмы. Тӥ, татчы лыктэмъёс, трос чидады, озьы ке но асьме егитъёслы патриотизм мылкыд пыӵатонъя бадӟым уж нуиськоды. Егитъёс но тӥ борды юн кыстӥсько.

Собере А. Соловьёв ветеранъёслы тау кариз Калык фронтлэн ужаз мылысь-кыдысь пыриськемзы понна. Тросэз ветеран огазеяськонъёс асьсэды ӟечен возьматӥзы, Калык бюджетэз дасянэ но Кун Думае быръёнъёсъя дырызлэсь вазь куара сётонэ пыриськеменызы. Удмуртия федерал списоке 34 кандидат ӵектӥз.

Калык фронтлэн ужамезлы йылпумъянъёс лэсьтэмын вал «Огъя Россия» партилэн Москваын 23-тӥ-24-тӥ сентябре ортчем съездаз. Отын меӵак верамын вал: Россилэн вуоно президентэз луон понна нюръяськоз В. Путин.

— Табере партилэн улосъёсысь ёзъёсызлы но чот-чот валамон луиз, мар бордын милемлы азьланяз ужано, — вераз малпанзэ А. Соловьёв. — Россия дуннеысь вить азьмынӥсь кунъёс пӧлы пырыны кулэ, со бордын ужан понна валтӥсь партия вань кужымзэ мед сётоз, вераз В. Путин.

— Съезд юнматӥз Калык программаез но Кун Думае депутатэ кандидатъёслэсь списоксэс. Россилэн Калык программаяз Удмуртилэн куинь проектэз пыриз — Кам шур вамен выж лэсьтон, Иж котыртӥ сюрес ӝутонэз йылпумъян но «Чылкыт ву» проект. Федерал списоке Удмуртиысь ӵектэм 34 адями пӧлысь сюриз 5-ез: А. Волков, Н. Мусалимов, Н. Аброськин, Б. Агаев но М. Питкевич. Но ӧвӧл малпано, та адямиос Кун Думае сюремын ни шуыса. Депутат луон понна соослы зол нюръяськоно на ай 4-тӥ декабре, — шуиз та съездлэн ужаз пыриськем делегат А. Соловьёв.

Тӧро озьы ик тодэ вайытӥз: 2011-тӥ арын 4-тӥ декабре Кун Думае быръёнъёсын ӵош Удмуртиын ортчозы муниципал кылдытэтъёсы быръёнъёс.

— Дас ар талэсь азьло ай Россия куашкан калэ вуэмын вал, со вакытэз али син азе ик пуктыны кышкыт. Странаен кивалтонэ В. Путин вуэмен, югдур пумен тупатскыны кутскиз. Власть кужмоямен, 2009-тӥ арын кризисэз но, 2010-тӥ арын кӧс куазез но вормимы.

Ветеранъёс Кун Кенешлэн Тӧроезлы куд-ог куронъёссэс веразы. Кылсярысь, лэсьтӥськонлы дунтэк музъем висъян сярысь. Удмуртиын законъя дунтэк музъем сётон чакламын трос нылпиё семьяослы гинэ. Ожъёсы пыриськемъёс куризы соослы льготаос тупатыны транспортлы налог пумысен. Таӵе льгота учкемын инвалид ветеранъёслы, но сыӵеослэн туж ӧжытэзлэн машинаоссы вань. Пӧсь интыосын  ми государствомылэсь политиказэ утимы, табере кунмы но ми сярысь ӧжытак коть сюлмаськыны кулэ, вераз ветеран огазеяськонлэн кивалтӥсез С. Морозов.

А. Соловьёв оскытӥз, пумиськонын ӝутэм ужпумъёс парламентысь депутатъёсын эскеремын луозы шуыса.

Егитъёсын ужанъя министр В. Соловьёв вераз, азьланяз но, пе, та воргоронъёс оскымон эшъёс луозы туала нылъёслы но пиослы. Ветеранъёс соослы Атыкай музъемез гажан мылкыд пыӵатозы. Матысь дыре республикаямы кылдытыны чакламын огъя военно-патриотической центр. Со выроз егитъёслэсь мугорзэс кыдатонэн, соосты армие дасянэн но патриот мылкыдзэс ӝутонэн.

Татьяна Банникова.

Удмурт Дунне
By Удмурт Дунне 4 октября, 2011 07:24