Возьдаськись Пушкин

Удмурт Дунне
By Удмурт Дунне 28 октября, 2011 11:33

Возьдаськись Пушкин

«Дартэн» тодматскон.

Тыло школаын 89 пинал дышетске, татын тодон-валан люкало Кузьымгуртысь но Тылоысь нылъёс-пиос. Шӧдӥське: куд-огез «Удмурт дуннеез» лыдӟо, одӥг-огез гожъяськыны но йӧндыро.

Удмурт кылъя но литературая дышетӥсь Елена Смирнова верамъя, «Ӟечбур!» газетэн эшъясько Надя Антонова, Марина Попова. Кузьымгуртысь Юля Лебедева 7-тӥ классын дышетске. «Удмурт дуннеын» Тол бабайлы ыстэм гожтэтэз вормисе потӥз.

— Выпускникъёсмы сярысь верано ке, Елена Елькина мыло-кыдо гожъяське. Со  удмурт кылъя олимпиадаосын вормылӥз, школаез зарни медален йылпумъяз, Удмурт кун университетэ пыриз. Вова Кочановмы пичи классъёсысен ик кылбураны кутскиз вал. «Ӟечбур!» газетын солэн «Кӧня кизили инмын?» сборникез но потӥз. 9-тӥ классэ йылпумъяса, Варзи-Ятчи школае мынӥз. Отын Пушкин шуыса исаны кутскиллям но, возьдаськем-а, мар-а. Али кылбура на меда, ӧйтӧд, Ижысь гурт хозяйствоя академиын дышетске. Туннэ нуналлы куаш-куаш гожъяськисьёсмы ӧвӧлгес. Мон котькуд урокам пиналъёслы шуисько: лыдӟе «Удмурт дуннеез», гожъяське отчы. Котькуд номерын кельышлы материалъёс вань. Алигес  «Дартэз» нош ик возьматъяй. Шуисько, лыдӟе ай удмурт кенъёс сярысь материалэз, Италие бызем Лариса Монаколэсь гожтэмзэ. Тӥни кинъёслэсь адӟем кароно. Тырмоз ини шымыртӥськыса пукыны, асэныд данъяськоно, утчаськыны быгатоно, дӥсьтӥсь луоно, — шуэ Елена Герасимовна.

Кузьымгуртысь Надя Антонова 8-тӥ классын дышетске:

— Мыным туж кельше егитъёслы приложениды. «Дартын» возьматӥськоды городысь но, гуртъёсысь но нылъёсты-пиосты.  Сыӵе материалъёсты лыдӟыса, валаськод: удмурт кыл егитъёслы юрттэ вылӥе потыны, вормонъёс басьтыны. Тросэз гуртысь егитъёс, городэ кошкыса, уг йыромо, соос котькытчы вуттӥсько, тунсыко уло, пӧртэм адямиосын эшъясько, кунгож сьӧры потало, ужало. «Дартын» конкурсъёс, мода, фестивальёс, адӟем карымон егитъёс, культура сярысь гожъямъёс трос, ваньмыз со тунсыко милемлы но, гуртысь нылъёслы-пиослы. Соосты лыдӟыса, тросэзлэн возьдаськон сямзэ вормемез потоз, дыр.

Галина Семёнова.

Удмурт Дунне
By Удмурт Дунне 28 октября, 2011 11:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<